Parau poro’i a te feiā fa’atere o te ārea
Tā’atihia i te mau ha’amaita’ira’a mure ’ore nā roto i tā tātou mau fafaura’a ’e te Fatu
« I aroha te Atua i tō te ao, ’e ’ua tae roa i te hōro’a mai i tāna tamaiti fānau tahi, ’ia ’ore ’ia pohe te fa’aro’o iāna ra’ ’ia roa’a rā te ora mure ’ore » (Ioane 3:16).
’Ua māuruuru roa vau i tō tātou Metua i te Ao ra nō tōna here maita’i hope roa i tāna mau tamari’i ato’a.
E rave rahi o tātou tē nā roto nei i te tahi mau ’ati teimaha o te orara’a. Hō’ē ’ati rahi roa a’e, ’o te mo’era’a ïa te hō’ē ta’ata herehia i muri a’e e rave rahi matahiti poiherera’a. E nehenehe te reira e hi’ohia ’ei ’ohipa ti’a ’ore nō ’ō mai i te Atua ra, te parau pāpū a’e rā, e tāmatara’a mo’a ïa o te orara’a nō ’ō mai i te hō’ē Metua here i te Ao ra tei hina’aro ’ia tupu rahi tātou i roto i te fa’aro’o ’ia ti’a ia tātou ’ia riro mai iāna te huru.
’Ua heheu mai tō tātou Fatu ’o Iesu Mesia i tōna hina’aro i te peropheta Iosepha Semita, tei hepohepo roa i tōna fifi ’a pārahi ai ’oia i roto i te fare tāpe’ara’a nō Liberty :
« ’E mai te mea e hurihia atu ’oe i roto i te ’ārua, ’e ’aore rā i roto i te mau rima o te feiā taparahi ta’ata, ’e e tu’uhia atu te utu’a pohe i ni’a ia ’oe na ; mai te mea e hurihia atu ’oe i roto i te moana ra ; mai te mea e tāpo’ipo’i mai te ’are tūpa’ipa’i ia ’oe na ; mai te mea e riro mai te vero pūai ’ei ’enemi nō ’oe na ; mai te mea e ha’aputuputu mai te mau ra’i i te pōuri, ’e e ’āmui mai te mea ri’i tumu nō te fa’aapiapi i te ’ē’a ; ’e tei hau roa atu ho’i, mai te mea e hamama mai ai nā ta’a nō hade iho i te vaha i hamama-roa-hia i te tītaura’a ia ’oe na, ’a ’ite mai ’oe, e tā’u tamaiti nei ē, e noa’a ia ’oe te ’ite i te ’ohipa nā roto i teie mau mea ato’a nei, ’e e riro ho’i ’ei maita’i nō ’oe na.
« ’Ua haere roa atu te Tamaiti a te Ta’ata i raro a’e i teie mau mea ato’a ra. ’Ua hau ānei ’oe iāna ra ?
« Nō reira, ’a tāpe’a noa nā ’oe i tō haere’a, ’e e vai noa te autahu’ara’a ia ’oe na… ’eiaha e mata’u i tā te ta’ata nei e rave, nō te mea e vai noa te Atua i pīha’i iho ia ’oe na ē a muri ’e a muri noa atu » (Te Parau Ha’api’ira’a ’e te mau Parau Fafau 122:7-9).
’Aita i maoro a’enei, i roto i te hō’ē hāhaerera’a aupurura’a, ’ua haere mātou i te hō’ē fare ’ua fa’aru’e mai te tāne ; ’ua tāvini ha’apa’o maita’i ’oia ’ei ti’a fa’atere nō te ’Ēkālesia. ’Ua hepohepo roa tāna vahine iti ’e ’ua ha’amata tōna fa’aro’o i te paruparu nā reira ato’a tōna hina’aro e haere i te purera’a ; ’ua ’āpe’e ato’a atu te mau tamari’i i tō rātou metua vahine. ’A putuputu ai mātou ’e teie ’utuāfare i terā po’ipo’i nō tō mātou tere, tei reira ato’a te mau tamāhine ’e te mau mo’otua, ’ua fa’a’ite atu mātou i te here o tō tātou Metua i te Ao ra ’e o Iesu Mesia nō rātou tāta’itahi.
’Ua fa’aha’amana’o atu mātou i teie tuahine iti i te mau fafaura’a mo’a tāna ’e tā tāna tāne i rave ’a rave rahi matahiti i teienei i roto i te hiero mo’a o te Fatu. Maoti tā mātou mau parau ri’i tāmāhanahanara’a, turuhia e te mana’o au o te Vārua Maita’i ’e tō mātou here pāpū iāna ’ei taea’e i roto i te ’evanelia, ’ua marū tōna ’ā’au ’e ’ua ’oa’oa ’oia i te ōra’a mai te mau ha’amana’ora’a au nō tōna tā’atira’a hiero i roto i tōna ferurira’a ’e tōna ’ā’au.
E mea mo’a roa tā tātou mau ’ōro’a i te hiero ’e te mau fafaura’, ’e ’o te fa’a’itera’a mau ho’i nō te here o tō tātou Metua i te Ao ra ia tātou. Teie mau ha’amaita’ira’a hanahana tei parauhia ia tātou nā roto i teie mau fafaura’a mo’a, e tae noa mai ïa mai te mea e vai ha’apa’o maita’i tātou ē tae noa atu i te hope’a.
’Ua fa’a’ite atu vau i teie ’utuāfare ē, ’ua fa’aru’e mai tā’u vahine iti ’aita i maoro a’enei, ’e tē mihi roa nei au iāna i te mau mahana ato’a. E sātauro teie mo’era’a rahi ’o tā’u e amo noa ē tae noa atu e haere atu vau i roto i te orara’a nō muri iho, ’ua fa’a’ite rā vau ia rātou i tā’u fa’aotira’a e tāmau noa i te tāvini i tō’u Fa’aora ma tō’u ’ā’au ato’a ē tae noa atu i te hope’a, ma te ’ite ē, ’ia tae i te hō’ē mahana, e fārerei fa’ahou vau i tā’u vahine iti ’e e ora ’āmui māua ma te ’oa’oa ’e te pōpou ē a muri noa atu.
’A tāmau ai mātou i te aupuru i teie ’utuāfare iti, ’ua fa’a’ite pāpū atu mātou nō te rima aroha mahora o te Fa’aora, ’e tāna anira’a ia rātou ’ia ho’i mai i te purera’a ’e ’ia ’oa’oa i te mau ha’amaita’ira’a o te ’evanelia. ’Ua fāriu vau i ni’a i te mau melo tāta’itahi o teie ’utuāfare, ma te ha’amata nā ni’a i te metua vahine, ’e ’ua nā ’ō atu vau :
« Tē fāri’i ra ānei ’oe i teie anira’a a tō tātou Fa’aora ? E haere ānei ’oe i te purera’a ’ōro’a i te sābati ? »
’Ua fāri’i rātou tāta’itahi i teie anira’a. Mātou nei te mau tāvini ha’eha’a a te Fatu, ’ua ’ī roa ïa tō mātou ’ā’au i te ’oa’oa ’a ’ite ai mātou i teie mau vārua tātarahapa i te haerera’a i mua nō te haere mai i tō rātou Fa’aora ! ’Ua tae mai tō’u mana’o ē, tē ’oa’oa nei tō te ra’i ’ia tā’ati ai tātou i te tahi ’e te tahi, i roto i te ’ati ’e i roto i te fa’aro’o.
E ’ere te rave-noa-ra’a i te mau fafaura’a mo’a, ’o te ha’apa’ora’a tāmau rā i te reira tē tā’ati ia tātou i te feiā tā tātou i here. Nā te ’ohipa mana rahi o te tāra’ehara a tō tātou Fa’aora ’e te ’atu’atu-tāmau-ra’a i tō tātou fa’aro’o nā roto i te pure, te tuatāpapara’a pāpa’ira’a mo’a ’e te tāvinira’a e hōro’a ia tātou i te pūai tītauhia nō te fa’aruru i te mau tāmatara’a o te orara’a.
’Ua ’ite tō tātou Fa’aora ’o Iesu Mesia i te mau ta’ata ato’a e māuiui ra. Tē toro tāmau nei ’oia ia tātou i tōna rima aroha ’e te here. Tē ani nei au i te mau ta’ata ato’a e fa’aruru ra i te mau tāmatara’a pa’ari o te orara’a, noa atu ā te reira, ’ia haere mai i te Fa’aora ’e ’ia ’oa’oa i te tāmā’ara’a i tāna ’aira’amā’a ’a rave ai ’outou i te ’ōro’a i te mau sābati ato’a, ’e ’a rave ’e ’a tāpe’a ai ’outou i te mau fafaura’a mo’a i roto i tōna hiero. ’A nā reira ai ’outou, teie te mau parau fafau ia ’outou :
« Nō reira, ’eiaha e rohirohi i roto i te ’ohipa maita’i, nō te mea tē ha’amau atu nei ’outou i te niu nō te hō’ē ’ohipa rahi roa. ’E nā roto i te mau mea iti nei e tupu mai ai tei rahi roa ra. Inaha, tē tītau nei te Fatu i te ’ā’au ’e te mana’o ’ana’anatae ; ’e e ’amu ho’i te feiā ’ana’anatae ’e te feiā ha’apa’o maita’i i te mā’a maita’i nō te fenua nō Ziona i teie mau mahana hope’a nei » (Te Parau Ha’api’ira’a ’e te mau Parau Fafau 64:33-34).
Tē fa’a’ite pāpū nei au ē, te mau fafaura’a tā tātou i rave i te bāpetizora’a, ’ia fāri’i ana’e tātou i te autahu’ara’a mo’a, ’e teie mau ’ōro’a e ravehia nei i roto i te hiero, ’ua tā’amuhia i te mau ha’amaita’ira’a rahi roa a’e tā te Fatu i fa’aineine nō tātou. Nā roto i tō tātou ha’apa’o maita’i i teie mau fafaura’a, ’a fa’aitoito ai tātou ē tae noa atu i te hope’a, e fāri’i mai tātou i te mau ha’amaita’ira’a ato’a i parauhia e te Fatu, nā roto i te i’oa mo’a o tō tātou Fatu ’o Iesu Mesia, ’āmene.