E tāmau ānei au i te tai’o ?
I te matahiti i ma’iri ’ua rave mai au i te hō’ē buka i te fare vaira’a buka, nō ni’a i te hō’ē tamāhine tei ha’amata i te hō’ē blog. ’Ua mana’o vau e buka au terā nō te mea hō’ē ā matahiti tō māua te tamāhine i roto i te ’ā’amu ’e e rave ato’a tō’u metua vahine i te blog. Nō reira ’ua mana’o vau e buka te reira e tūru’i atu i ni’a iho.
Ma’a ’api noa tā’u i tai’o ’e tē fa’ahiti faufa’a ’ore ra te tamāhine i te i’oa o te Fatu. ’Aita te mana’o au roa i roto iā’u i te tai’ora’a vau i terā tuha’a. ’Ua tāmau noa rā vau i te tai’o, ma te ti’aturi ē, ’o terā noa taime. ’Ua tai’o vau i te tahi atu ā mau ’api, ’e terā fa’ahou mai.
’Ua parau atu vau i tō’u māmā i tā’u i tai’o mai. ’Aita vau i ’ite e tāmau ānei i te tai’o ’aore rā ’aita. ’Ua nā ’ō mai tō’u māmā ē, tei iā’u ra te mā’itira’a. ’Ua hō’ē rā tōna mana’o ē, e ’ere paha ïa i te fa’aotira’a maita’i e tāmau i te tai’ora’a mai te mea e parau taua tamāhine ra i te mea ’ua ’ite tātou e parau hape. ’Ua nā ’ō mai tō’u māmā ē, e ’ere iho ā i te mea maita’i mai te mea e fa’ahiti faufa’a ’ore ’oia i te i’oa o te Fatu.
’Ua mana’o a’era vau e hi’o vau mai te mea e tupu fa’ahou ā te reira, nō reira ’ua ho’i au i roto i te buka. ’Ua ’itehia mai iā’u ē, e peu mātau nō teie tamāhine te fa’ahiti-faufa’a-’ore-ra’a i te i’oa o te Fatu. Fa’aoti a’era vau e fa’aho’i i te buka i te fare vaira’a buka ma te fa’aea i reira tā’u tai’ora’a.
’Ua ’oto vau i te mea ’ua fa’ahiti faufa’a ’ore te ta’ata pāpa’i i te i’oa o te Fatu. I tō’u fa’aho’ira’a i te buka i te fare vaira’a buka, ’ua tae mai te mana’o ’oa’oa ’ua rave au i te mā’itira’a tano. Tē pe’e ra vau i « tā’u mau fa’aturera’a nō te ’evanelia » i roto i tā’u buka Fa’aro’o i te Atua tei nā ’ō ē : « E tai’o vau ’e e māta’ita’i au i te mau mea ana’e e auhia e te Metua i te Ao ra. » ’Ua ’ite au ē, tē tīa’ihia ra tātou ’ia fa’a’ohipa i te i’oa o te Metua i te Ao ra ’e o Iesu ma te tura ’e te fa’atura.