Te reo o te feiā mo’a i te mau mahana hope’a nei
Te tahi ha’amaita’ira’a hau
Roberto Atúncar Nieto
Lima (Peru)
Fa’ahōho’ara’a nā Ale + Ale, Morgan Gaynin
I te pi’ira’ahia vau ’ei ’episekōpo nō tō mātou pāroita, nō fānau noa mai nei tā’u vahine ’o Carmen i tā māua tama mātāmua. I terā taime, ’ua fifi māua i te pae moni. ’Ua riro roa mai ’ei ’ohipa urupu’upu’u mau te fa’afāna’ora’a i tō’u ’utuāfare ’e te ha’apa’ora’a ’e te aupurura’a i te mau melo o tā mātou pāroita.
I te hō’ē sābati, ’ua ’ite au i te hō’ē metua vahine ’ōtahi ’e tāna e maha tamari’i ri’i i roto i te purera’a ’ōro’a. Tei ni’a ’oia i te pārahira’a hope’a roa o te fare purera’a ’e tē fa’aitoito ra ’oia i te tāmarū i tāna mau tamari’i. ’Ua ’ite au i tōna mau fifi pae faufa’a ato’a, ’aita rā ’oia i ani noa a’e i te tauturu. Haere noa te mau hepetoma, e haere mai ’oia i te purera’a ’e tāna mau tamari’i i te mau sābati ato’a.
I te hō’ē mahana, ’ua ’aufauhia vau. ’Ua ha’amaita’ihia vau i te tahi moni hau, fa’aoti atura vau e fa’a’ohipa i te reira nō te ho’o i te tahi taiha’a nō te rave i te mau tātā’ira’a tahito i ni’a i tō’u fare. ’E tē haere ra vau i te mātete, puta mai nei i roto i tō’u ferurira’a te hōho’a o teie tuahine ’e tāna mau tamari’i. ’Ua tae mai te mana’o e fa’a’ohipa i te moni hau nō te ho’o i te mā’a nā rātou. ’Ua pi’i au ia Carmen nō te fa’a’ite iāna e aha te mana’o i tae mai nō te rave i teie ’ohipa. ’Ua fāri’i ’oia i te reira.
Tē ho’oho’o ra vau i te mā’a, ’ite a’era vau i te tahi faraoa monamona. ’Ua mana’o vau ē, e hina’aro paha te mau tamari’i i te tahi monamona. ’Ua fa’a’ī au e piti pūtē mā’a ’e tere a’era vau i te fare o teie tuahine.
’Ua pātōtō vau e rave rahi taime i ni’a i te ’ūputa rā’au pē. I terā taime tē reva ra vau, matara mai nei te ’ōpani. « Bishop, ’o ’oe terā », te reo ïa o te tuahine. Horo mai nei tāna mau tamari’i nā muri mai iāna.
Nā ’ō atura vau, « E mā’a tā’u i ’āfa’i mai nā ’outou. »
’Ite a’era hō’ē o nā tamāhine i te faraoa monamona ’e pa’a’ina a’era tōna reo : « Monamona ! » Tāpiri mai nei tōna mau taea’e ’e mau tuahine ma te ’ana’anatae. ’Ua haru mai te hō’ē tamāhine hitu matahiti iā’u i roto i tōna rima. Nā ’ō maira oia ē « Mauruuru Bishop ! »
’Ua hi’o vau i roto i tō rātou fare ’e ’ite atura tō’u mata i te hō’ē pāni i ni’a i te tahua tē hōroi ra teie tuahine i te ’ahu. ’Aita tā rātou e ’aira’amā’a ’e tei ni’a noa i te tahua te marū nō te ta’oto. ’Ite ihora vau i tō rātou ’ati rahi. ’Ua fa’anaho vau i te tahi mea ’ia noa’a tā rātou ’aira’amā’a ’e te ro’i.
’Ua tauturu teie ’ohipa iā’u ’ia ’ite ē, tē arata’i nei te Fatu i tāna mau tāvini ’e tē ha’amaita’i nei ’oia ia rātou. ’Aita i tītauhia te tahi pi’ira’a ta’a ’ē nō te tauturu i tō tātou mau taea’e ’e mau tuahine. Tītau-noa-hia ’ia tū’ati i te Vārua, ’ia ’ite mai ’o tei hina’aro i te tauturu, ’e ’ia vai ineine nō te riro ’ei mauiha’a i roto i te rima o te Fatu.