Milton Camargo
Unang Magtatambag sa Kinatibuk-ang Kapangulohan sa Sunday School
Miabut og hapit usa ka tuig alang ni Helio da Rocha Camargo, kanhi ministro sa laing simbahan, aron makahukom nga magpabunyag sa Ang Simbahan ni Jesukristo sa mga Santos sa Ulahing mga Adlaw. Wala madugay niana, ang iyang asawa, si Nair Belmira da Rocha Camargo, nakahukom nga mosunod sa ehemplo sa iyang bana ug magpabunyag usab.
Nianang higayuna, si Nair mabdos sa ilang anak nga lalaki, kinsa ilang ngalanan og Milton. Ang hiniusang desisyon sa mga Camargo nga magpasakop sa Simbahan mopanalangin sa kahangturan sa umaabut nga mga henerasyon sa ilang pamilya.
Si Brother Milton da Rocha Camargo natawo niadtong Marso 10, 1958, sa São Paulo, Brazil. Si Brother Camargo, gipaluyohan niadtong Abril 6, 2019, isip Unang Magtatambag sa Kinatibuk-ang Kapangulohan sa Sunday School, miingon nga napanalanginan siya nga nagdako isip miyembro sa Simbahan.
“Ang Ginoo nakaila kanato sa tagsa-tagsa,” miingon siya. “Ang iyang mga plano alang sa matag usa kanato mas dako pa kay sa atong mahunahuna.”
Nahimamat ni Brother Camargo ang iyang asawa, si Patricia, samtang ang iyang amahan nagdumala sa Brazil Rio de Janeiro Mission sa ulahing bahin sa dekada 1970. Ang magtiayon naminyo niadtong Enero 4, 1980, usa ka tuig human si Brother Camargo miuli gikan sa pagserbisyo isip full-time nga misyonaryo sa Portugal Lisbon Mission. Sila adunay tulo ka anak.
Sa sayong katuigan sa ilang kaminyoon, ang mga Camargo nagpuyo sa Rio de Janeiro, diin si Brother Camargo nakahuman og bachelor’s degree sa civil engineering gikan sa Instituto Militar de Engenharia. Wala madugay nadawat niya ang master of business administration degree sa Brigham Young University.
Sa tibuok niyang panarbaho, si Brother Camargo mipahinungod sa iyang panahon ug kusog sa pag-edukar sa uban. Nakatrabaho siya sa pipila ka mga unibersidad, lakip ang Laureate Brazil Online Education, Universidad Tecnológica de México, ug sa labing bag-o ang BYU-Pathway Worldwide isip bise presidente sa kurikulum.
Si Brother Camargo nakaserbisyo isip Area Seventy, presidente sa Brazil Porto Alegre South Mission (1997–2000), magtatambag sa kapangulohan sa Brazil Missionary Training Center (2002–5), bishop, stake mission president, ug presidente sa korum sa mga elder.