Elder Hans T. Boom
General Authority Seventy
Sa dihang otso anyos pa si Elder Hans T. Boom, ang iyang pamilya mibalhin gikan sa Amsterdam padulong sa siyudad sa Breda, nahimutang sa habagatang bahin sa Netherlands. Ang iyang amahan, usa ka Dutchman kinsa midako sa Indonesia ug usa ka kinabig sa Simbahan, mibati nga ang iyang pamilya kinahanglan nga mobiya sa dakong siyudad ug mobalik ngadto sa lugar sa iyang katigulangan.
Ang panahon nga gigahin ni Elder Boom uban sa iyang pamilya nianang gamay nga branch nagbansay kaniya sa pagserbisyo sa Simbahan—serbisyo nga iyang gihatag sa iyang tibuok kinabuhi ug padayon nga ihatag sa iyang bag-ong calling isip General Authority Seventy.
“Kon unsa ko karon ug ang tanan nga anaa kanako utang nako sa Ginoo ug sa mga oportunidad nga Iyang gihatag kanako sa pagkat-on ug paglambo,” siya miingon.
Natawo niadtong Hulyo 13, 1963, sa Amsterdam ngadto ni Hans ug Ankie Boom, si Hans Theodorus Boom mao ang ikaduha nga kamagulangan sa upat ka anak sa mga Booms. Ang iyang mga ginikanan mitudlo sa ebanghelyo diha sa ilang panimalay ug miawhag sa ilang mga anak sa pagtrabaho og maayo.
Sa edad nga 18, si Elder Boom miserbisyo sa England London East Mission. Pipila ka bulan human sa iyang misyon, nahimamat niya ang iyang umaabut nga asawa, si Ariena Johanna “Marjan” Broekzitter, sa usa ka komperensya sa young adult sa Simbahan. Ang duha naminyo niadtong Hulyo 27, 1984, sa Rhoon, Netherlands, ug nasilyo paglabay sa tulo ka adlaw sa London England Temple. Aduna silay tulo ka anak nga lalaki.
Si Elder Boom mitrabaho isip sekretarya sa prinsipal sa Markenhage College ug isip recruiter alang sa Franchise Development Benelux. Panahon sa iyang pagkatawag isip General Authority, nagtrabaho siya isip sales manager sa MacLean Agencies.
Si Elder Boom nakaalagad isip Area Seventy, magtatambag sa kapangulohan sa stake, presidente sa Young Men sa stake, presidente sa branch, ug magtatambag sa kapangulohan sa branch. Sa panahon sa iyang tawag, nagserbisyo siya isip magtutudlo sa institute ug temple ordinance worker sa The Hague Netherlands Temple.