Te Kairi nakon te Tia Tabe Rawawata bwa e na Tei ni Korakora
E maeka te tia korokaraki i California, USA.
Teuana te kibu e kona ni karekea te bitaki korakora—n te kaboo n te tabe rawawata naba.
Ngke I moana reireiu n te kauarinan, e kaoai te tia kairi n te tabe rawawata bwa N na tabe rawawata.
“Mmm … e rabwa moa,” I kaeka. “Tiaki au taarena.”
Ma e teimatoa ni kaoai. I nanon wiiki.
N tokina, I a kataia. E bon eti: I rang tangira te tabe rawawata. E rang kaokoro n te moan tai; rabwatau e tuai man kakaraoa aei mai mwaina. Ma i rikirake n tangira te namakin ni kataneiai. I tangiriia naba kaain au tiim ao taian kaboo. Ao e rikirake n tamaroa au kekeiaki!
Ngkai te tabe rawawata ai bon mwakoron raoi maiu. I kataneiai ni katoa bong uoua ke teniua te aoa, ni karaoa te toro iaon te bukiniwae, itiaki ao n ikatikitiki, ao n rarawekai. (Ao ko aki ataia bwa tera bwaai akanne, tai raraoma—ai uana naba ma Ngai!)
N aron bwaai aika mwaiti, te tabe rawawata e tangira te tai ae maan ao te tataonannano, ao n tabetai e kona ni matoatoa anne. Raoiroina bwa, au utu a bon kakaungai naba, e ngae ngkana I ngureakina marakiu (e riki n angiin te tai). Tamau e katauraoa te aiti ni kamwaitoro ao taeka ni kaunganano ibukiu n okiu man au kataneiai. Ao tinau n taainako e keiaki n anganano bwa i aonga n ira te kauaba.
Tabeua te ririki n nako,I kaea teuana te kauaba i Philadelphia, Pennsylvania, USA. I rang ingainga ni kauaba ni kaaitaraia taan tabe rawawata man aonon nako te aba, ma i raraoma teutana ibukin raroau mairouia au utu. Ni kabebetea, e berita tinau bwa e na kanakoa ana rongorongo iaon koroboki aika tabu rinanon te tareboon ao iango aika tamaroa ni katoa bong.
Te tairiki are i mwain te kauaba, tabeman ataei a botaki ni kukurei. N au iango e na rang nakoraoi te nako, ngaia are ngai ao raoraou ti nako n nooria. Ma n te tai ae e waekoa I ataia bwa tiaki aei ibukiu. Iai ataeinimwane aika a manging, a moko, ao a taetae buaka, ao ni mwaie n ae aki riai. I ataia bwa I riai n aki mena ikekei, ma I raraoma bwa mwina a na kangaa kain au ruu. Ke a na kangaa taan kabotoa ake tabeman.
Ngkanne iai te bwai ae roko n au iango:
“Teei n Taabo Aika Tabu.”
Bon teuana mai ibuakon au kibu aika maten nanou, ao teuana are e kanakoa nakoiu tinau n te ingabong anne: Reirei ao Berita Aika Tabu 87:8: “Mangaia are, teei n taabo aika tabu, ao n aki mwaing, ni karokoa bongin rokon te Uea; bwa nooria, e tawe rokona, e taku te Uea. Amen.”
I aki ataia bwa bukin tera tinau e kanakoa nakoiu te kibu anne n te bong anne, ma bon teuana ae I a tia ni mateakinna ni maiu ae bwanin. I kamatenanoa ngke waniua au ririki, ao n ae okioki e kauringai n ninikoria, n ongotaeka, ao n tei ibukin baike I kakoauai.
“Teei n Taabo Aika Tabu.”
“Nang maawa nako,” I tuanga kain au ruu. I kabwarabwara taekan te kibu are e kanakoa nakoiu tinau n te moaningabong anne. “Aio tiaki te tabo ae I riai n tei iai.”
Raou n au ruu e tuangai neiei bwa e aki kan mena ikekei, naba. Neiei e bon mweengabuaka naba ma e aki kan taonnako n tii ngaia bwa e rawa n nooraki bwa e konaaki. E karabwaai ibukin are I karaoia, ao ti oki rikaaki.
N te ingabong are imwina, ti kunea bwa imwin are ti nako, ataei ake a mena n te botaki ni kukurei a reke ao a kamaunaaki araia man te kauaba ibukin te manging ao kabonganaan taian turaki.
Ngke tao I aki wirikirikinaki bwa N na uringa ana kibu tinau, tao e na kamaunaaki naba arau man te kauaba. I moanna n te tai anne, ngaia are I rang karabwarabwa bwa I ira te kauaba. (Ngai irou I karabwa tinau ni katoa bong ibukin ana rongorongo are e kanokoi n te tareboon.)
Te tokanikai n te tabe rawawata e bon rang ootara ao waekoan karekean te kakabwaia mani kawakinan tuua. Ma Reirei ao Berita Aika Tabu 87:8 e aki kangai, “Teei n Taabo aika Tabu bwa ko aonga n tokanikai n te kauaba n te tabe rawawata.” Ao Ioane 14:15 e aki kangai, “Ngkana ko tangira te kakabwai ae tawe, kawakini au tua nako.” Te Uea e kakabwaiaira ibukina bwa E tangiriira. Ao ti kataia n riki n tabu ao n ongotaeka ibukina ti kakoaua ao ti tangira te Uea.