Te Aroka ae e Tei ibukin te Kakoaua
Tera ae e bon nanonaki n reken te kakoaua?
E rinnako Elis nakon te Moanrinan ao e tekateka irarikin raoraona ae Armando.
“Mauri!” E taku Titita Russo. “Tia kaukiira n te anene.”
E anene Elisa ma kain ana kiraati. “Te onimaki titebo ma te koraa ae uarereke: ngkana e unikaki, e rikirake” (Aia Boki n Anene Ataei, 96).
E tibwatibwai beebwa ao kureiaon titita Russo. “Iangoa nanon te bwai ae ti aneneia,” e taku. “Ngkana ko unika koraan te onimaki, e rikirake nakon te koaua. Ngkai korea tamneina bwa e kanga taraan am koaua ngkana ai aron te aroka.”
E a kamwataua taraakin ana beebwa Elisa ae akea kanoana. Ataei ake tabeman a moana aia korotamnei. Elisa e kaninganinga ana korotanmei Armando. Arokana are e korea tamneina iai kaina ae eti rake ma baana aika rawata. E taraa n ae titebo ma te basil are e rikirake iaon ana kamama n ana auti. Tao anne kanga bon aekan taraan ana koaua naba! E koona ana kureiaon ao e korea tamnein teuana ae aekakin naba ana tamnei Armando.
“Taiaoka kauka ami boki aika tabu nakon Aramwa 32,” e taku titita Russo.
A wareka aron unikan te koraa inanom ao n namakina rikirakena. Elisa e taraa arokana are e tei ibukin te koaua. Iai ana koaua? Tera ae tao e nanonaki n anne? E tangiria ni kan titiraki ma e rootia te maamaa.
Ngke e a bwara te kiraati, e kawara Elisa Titita Russo.
“Ko taraa n ae e aki rau am iango. Iai te bwai ae riki?” E titiraki Titita Russo.
E a manga baraaki n taraa riki ana korotamnei. “I aki koaua raoi bwa iai au koaua. I aki ataia bwa tera nanon anne.”
E moangare Titita Russo ma te tangira nakon Elisa. “Akea te Kaangaanga. Ko uringnga bwa tera te onimaki?”
E katoua atuna Elisa. “Kakoauaan baika ti aki noori?”
“Eti anne!” E taku Titita Russo. “Baikara bwaai tabeua aika ko onimakinii?”
E rang bebete te titiraki anne. “I kakoaua Tamara are i Karawa ao Iesu Kristo. I ataia bwa A tangirai.”
E moangare Titita Russo. “Ko a tibwa tia n tibwaua am koaua! Te koaua bon te bwai ae ko kakoaua ibukin te euangkerio.”
E iangoia teutana Elisa. “Nanona bon iai au koaua?”
“Eng!” E tabekarake ana boki aika tabu Titita Russo. “Ao ko uringa bwa teraa ae ti warekia n te bong aei? Ko ribanaa te koraa ni karaoan bwaai n aron te roko nakon te taromauri. Ngkanne am koaua e na rikirake ni matoatoa.”
E namakinna Elisa bwa kanga e a mataata. “Ngaia anne bukin ae ti korei tamnein ara koaua n aron te aroka?”
“Bon ngaia raoi anne. Ibukina bwa te aroka e rikirake teutana imwin teutana,” e taku Titita Russo. “Ai bon aron naba taian koaua. A aki bane ni kaoti n tii te taina. A rikirake teutana inanon taia.”
E a rau nanon Elisa ibukin arokana are e a tia ni korea tamneina. Ngke e roko ni mweengana, e korea “Arokau ae e Tei ibukin Au Koaua” irarikin ana korotamnei. E katekea ieta irarikin ana kainiwene. E ataia bwa ana koaua e a moanna n rikirake. Ao e tangiria n reitanako irirakin Iesu bwa e aonga ni rikirake ni bubura!