Kamatebwaian Rongorongo man te Maungatabu ni kabuta (2018 ao 2019)
Aia reirei burabeti aika a maiu, taan mamata, ao taan kaotioti a kona ni katauraoa te kairi mai eta ibukin aia mwakuri te kooram n unimwaane ao te Bootaki n Aine. Ni wiki ake e na kamatebwaiaki iai rongorongo man te maungatabu, te beretitentii man te kooram n unimwaane ke te beretitentii n te Bootaki n Aine e na rinea te rongorongo man te maungatabu ae e na kamatebwaiaki, ae boboto iaon kainnanoia membwa. N taai tabetai, te bitiobi ke te beretitenti n te titeiki e kona naba n rinea te rongorongo. A riai taan kairiiri ni kamatatai aia rongorongo kaain te Moan Beretitentii ao te Kooram n Abotoro n te Tengaun ma Uoman. Ma, kaain te beretitentii a kona n rinea teuana te rongorongo man te maungatabu ae e a tibwa tia n nako, ni kaineti ma kainnanoia kaain te Ekaretia ao te kairiiri mai iroun te Tamnei.
A riai mataniwi ao taan reirei ni kakaai kawai ake a na kaungaia membwa ni wareka te rongorongo are e rineaki imwain taina. A riai ni kaungaia membwa bwa a na roko nakon te taromauri n tauraoi n tibwauai koaua n te euangkerio ake a tia n reiakin ao aia iango bwa a na kanga ni mwakuri koaua akanne. Iango n anga reirei aika a oti inano, aika a boboto iaon reirei ake a reiakinaki n te boki ae Reirei n ana kawai n Anga Reirei te Tia Kamaiu, a kona ni buokia membwa n reirei man rongorongo n te maungatabu ni kabuta.
Quentin L. Cook, “Te Rairaki ae e Nene ao n Reitinako iroun Tamara are i Karawa ao te Uea Iesu Kristo”
Tao a na kan tibwatibwa membwa i bon imarenaia n ongora bwa tera aia namakin ngke a ongo bitaki ake a kabwarabwaraki n ana rongorongo Unimwane Cook. Ngkana arona bwa iai raoraoia ae tiaki kaain te Ekaretia ae e na titirakinia bwa bukin tera e karaoi bitaki aikai te Ekaretia, tera aia kaeka? Kaungaia bwa a na ukeri kaekan taian titiraki man ana rongorongo Unimwaane Cook. Tera ae ti kona ni karaoia n tatabeman ao n utu nako, ao n te kooram ke te Bootaki n Aine, n taraia raoi bitaki aikai a kakoroi nanon baike e kataningai te Uea? Bwa mwakoron naba te maroro aei, ko kona naba n tibwauai reirei man ana taeka ni kaukuki Beretitenti Nelson ake e kaungaia membwa bwa a na “tauraoi ni butimwai” bitaki aikai.
Ronald A. Rasband, “Tai Tabeaianga”
Ana rongorongo Rasband e kaoti tabeua taian kibu ake a kona ni buokira ni katoki raraoma nako ake tao iai iroura n taai aika kakamaku ake ti maeka inanona ngkai. Tuangia kaain te Ekaretia bwa a na kamatebwai koroboki aika tabu ni karekei reirei ake a kona n tibwauaia ma temanna ae e maakui taai aika a na roko. Tera riki ae a kona n tibwaia man ana rongorongo Unimwaane Rasband? E kanga te maaku ni “[kakerikaaka] aia taratara natin te Atua”? Kaoia membwa bwa a na tibwa aroia n tokanikai iaon taian raraoma ao ni maeka ma te onimaki.
David A. Bednar, “Booti Bwaai ni Kabane Inanon Kristo”
Iangoia bwa ko na uota te robu ao te beba ae ko korei iai baika ko na karaoi. Kaoia membwa bwa a na maroroakina te kaokoro imarenan taraan taian koaua n te euangkerio ao ana burokuraem te Ekaretia bwa kanga te robu ao tarakia bwa kanga te bwai ae e na karaoaki ibukin botoniango nako ao mwakuri. Kaungaia membwa bwa a na kakaei reirei man katoto n ana rongorongo Unimwaane Bednar. Tera ae e nanonaki ni “booti Bwaai ni Kabane Inanon Kristo”? (taraa I-Ebeto 1:10). Tera ae ti kona ni karaoia bwa ti na karekea te berita are e taekinaki ni kabanean ana rongorongo Unimwaane Bednar?
Dallin H. Oaks, “Te Koaua ao te Baire”
E na kanga ootara ni “koaua n te euangkerio aika kaokaki” ni buokira n te tai are ti kaitara iai ma te totoko nakon ara koaua ao baike ti maiuakin? Ni kaeka te titiraki aei, a kona membwa n rinanoi katoton koaua aika kakaawaki n mwakoro II ana rongorongo Beretitenti Oaks. A kona naba n rinanoi katoto bwa a kanga koaua aikai ni mwakuriaki (taraa mwakoro III). E na rangi ni ibuobuoki nakoia membwa karaoan te kataneiai bwa a na kanga ni kamanenai tabeua mai ibuakon koaua aika kakaawaki aikai ni kaekai kabuakaka nakon ana reirei ke anuan te Ekaretia.
D. Todd Christofferson, “Teimatoa ao n aki Kamwaingingaki n Am Onimaki iroun Kristo”
Ko kona ni moana maroroakinan te rongorongo aei man korean te rain iaon te burakiboti Te Ungannano n tabon te rain are teuana ao Motinnano n aron Kristo n are teuana. Kaoia membwa bwa a na wareki barakaraba ake a moanaki man Tera ae ti kona n reiakin man katoto ake n ana rongorongo Unimwaane Christofferson are e kaungaira bwa ti na matoatoa man teimatoa inanon tain te karawata? (taraa naba Aramwa 36:27–28). Kaungaia membwa bwa a na tibwauai rongorongoia aomata ake a kinai bwa a tia ni kaota te motinnano nakon te euangkerio n ai aron Kristo, e ngae ngke a kaitara ma te karawawata.
Ulisses Soares, “Ti Teuana Ngkami inanon Kristo”
Ni kaineti ma are e taku Unimwaane Soares, e kanga te karaanga are Amazon n tei ibukia kaain ana Ekaretia Iesu Kristo? Tera ae e reireinira te kabotau aei iaon korakoraia membwa aika a boou nakon te Ekaretia? Ti na kanga ngaira n ara kooram ke n te Bootaki n Aine ni ira ana reirei Unimwaane Soares ni kaungaia, ni boutokokai, man tangiria aomata aika a tibwa kaaina te Ekaretia? (taraa Moronaai 6:4-5). Tao a kona tabeman membwa n tibwai tabeua kakaewenako ake a kaitarai ngke a moan kaaina te Ekaretia ao tera aroia membwa ake tabeman ni buokiia. Kam kona naba ni maroroakini kawai ake a tia iai aomata aika a tibwa kaaina te Ekaretia ni kakorakora ami uoote ke ami mwaanga.
Gerrit W. Gong, “Ara Kaembwaea n te Onimaki”
Iangoa kaotan tamnein te ai ae kabonganaki n tain te ao kaoa temanna bwa e na tibwaua ana taneiai ngke E nang karabwarabwa ngkai iai te ai n tain te kaembwa. Tuangia membwa bwa a na maroroakinna bwa tera ae e kanona Unimwaane Gong ngke e taekina rongorongon te “kaembwaea n te onimaki.” A kona ni tibwaia membwa nakon taian kurubu ao ni kaoia kurubu nako bwa a na manga wareki ao n tibwaua teuana mai ibuakon nimaua kawai are e taekinna Unimwaane Gong bwa e kona iai te “kaembwaea n te onimaki” ni kaungaira. Anga te tai nakoia membwa bwa a na iangoi kawai ake a na kona iai ni kakorakora oin aia onimaki ke ana onimaki temanna are a kina.
Dieter F. Uchtdorf, “Kakoaua, Tangiria, Karaoa Nanona”
Ko kona ni waakina maroroakinan te rongorongo aei man korean taeka iaon te burakiboti aika Te Akea ni Kantaninga ao Te Kukurei. Kaoia membwa nako bwa a na kakai anua ao koaua n te rongorongo aei are e kaira temanna nakon te akea ni kantaninga ao te kukurei ao korei iaon te burakiboti. Kaoia membwa bwa a na tibwai kawai ake a tia iai n namakina te kukurei man te kakoauana, tangirana, ao karaoan Nanona, n aron are e reirei Unimwaane Uchtdorf. Kaungaia membwa bwa a na kakai taeka aika a kaunganano man ana rongorongo ake a kona ni katekei ni mweengaia ke n tibwaia ma temanna raoraoia.
Joy D. Jones, “Ibukina”
Iangoa tibwan te karaki are e koreaki ni moan ana rongorongo Titita Jones ao tuangia mebwa bwa a na iangoi taai ake aia ibuobuoki ao aia mwakuri ni ibuobuoki a taraa n “aki noraki ke … akea iai te karabwarabwa ke tao e aki tangiraki.” Imwin maroroakinan te karaki anne, korea te kibuntaeka aei iaon te burakiboti Bukin tera ti ibuobuoki? Kaoia membwa bwa a na kaeka te titiraki aei man warekan ana rongorongo Titita Jones ao ukeri nonori aika nano (taraa naba Reirei ao Berita aika Tabu 59:5). E na kanga ana reirei Titita Jones ni bita arora n tabeakinira ao ni ibuobuoki imarenara?
Michelle D. Craig, “Tangiran ae Tamaroa Riki mai Karawa nakon ae Ngkai”
E taetae Titita Craig iaon te “te maranga imarenan arora ao kinakira ae ngkai, ma arora ao kinakira ae ti uaiakinna .” Tera namakin are e tangirira te Atua bwa e na iai iroura ibukin te maranga aei? Tera namakin are e tangirira te Atua bwa e na iai iroura ibukin te maranga aei? Membwa n tatabeman a kona ni kamatebwaia teuana mai buakon teniua mwakoro ake inanon ana rongorongo Titita Craig n ukeri kaeka nakon titiraki aikai. Tera ae ti kona ni karaoia n taraia bwa ara “aki tauraoi n tamneira” e aki kairira nakon “te bwarannano ae korakora”?
Cristina B. Franco, “Kimwareirein te Mwakuri n Ibuobuoki n Aki Tii Taraira”
Ni kamatata raoi bwa “e reke te tangira rinanon te anga nano,” Titita Franco e tibwauai uoua karaki—teuana rongorongon Victoria ao teuana rongorongon te aine ae e a tia ni mate buuna. Ko kona naba ni kaoia uoman membwa bwa a na roko ao n tauroi n tibwai baike a reiakin ibukin te tangira ao te anga nanon man karaki aikai. Tera baika ti rinanona n oin maiura ae ti kona n tibwauaia ae a reirei te koaua aei? Kaota teuana te tamnei ae e kaota ana mwakuri te Tia Kamaiu ni beku ibukia tabeman (n aron “Light the World—Follow the Example of Jesus Christ” on LDS.org) are e kona ni kauekea te maroro are ti na kanga ni ira Ana katoto n te “ibuobuoki ae raonaki ma te anga nano.”
Henry B. Eyring, “Aine ao Kamatebwaian te Euangkerio n te Mweenga ”
Kiibu ao taeka tabeua anaaki man “Te Utu: Te Katanoata nakon te Aonaaba” are e kabongana Beretitenti Eyring n ana rongorongo e kaoti nonori aika nano ibukin kakawakin korakoraia aine n te mweenga. A kona membwa ni uaia ni ibuobuoki n ukeri kiibu ao taeka aikai ao ni maroroakinna tera ae a reiakinna. Tera kakao are e e anga Beretitenti Eyring? Tera berita aika e anga? Iangoia bwa e na kanga te anene ke anenean kunan te aro ae kabwarabwara te mweenga, n aron “Home Can Be a Heaven on Earth” (Hymns, no. 298), ni kona ni katamaroa te maroro.
Dallin H. Oaks, “Kaaro ao Ataei”
N am kakautaroi n anga reirei, iangoia bwa e nga mwakoro man ana rongorongo Beretitenti Oaks ake a na rangi ni ibuobuoki nakoia aomata ake n am kooram ke n te Botaki n Aine. Aikai tabeua titiraki ake ko kona n titiraki ni kaunga te maroro iaon ana rongorongo: A na kanga baika a rangi ni bwainaki n te aonaaba ake e mwaneweaki n ana rongorongo Beretitenti Oaks n Mwakoro I ni kaitara ana babaire Tamara are i Karawa? Antai aine aika a kakaonimaki aika ti kona n tibwai ake a kabwarabwarai taeka ibukia aine ni mwakoro II? Tera arora ni kaungaia kairake n ataeinaine ake ti kinaia bwa a na iri ana reirei Beretitenti Oaks are e onoti ibukia are e taekinaki ni mwakoro III?
Russell M. Nelson, “Aia Mwakuri Aine n Ikotakiia Iteraera ”
Ngkana ngkoe te tia reirei n te Bootaki n Aine, iangoa kamaenakoaia aine inanon aua kurubu ao tuangia n aia kurubu bwa a na wareka teuana ma ibuakon aua kakao ake n ana rongorongo Beretitenti Nelson. A kona taian kurubu ni maroroakini baike a rotaki iai man kakao, kakabwaia ake a tia n reke irouia ma mwakuriana, ao iango ibukin mwakuriaia n taai aika a na roko. Ngkanne a kona kurubu nako n tibwaia nakoia kaain te kiraati baike a maroroakin. Ngkana ngkoe te tia reirei n te kooram n unimwaane, ko kona n tuangia bwa a na ukeri taeka n ana rongorongo Beretitenti Nelson ake a kaota ana namakin Tamara are i Karawa ibukin Natina aine. Tera ae ti kona ni karaoia ni boutoka ao ni kaunga aia waaki aine n ikotakia Iteraera?
M. Russell Ballard, “Te Mii ni Burabeti Ibukin Kamaiuaia Maate”
Ko kona ni kaoia membwa bwa a na mwakuria ana kakao Beretitenti Ballard ao ni wareka Reirei ao Berita aika tabu 138 imwain te maroro. Tuangia membwa bwa a na tibwai baike a riki nakoia ao nonori are e reke irouia man te mwakoro aei n tain te bootaki. Aekan titiraki aikai a kona ni buokia membwa bwa a na ota ni kakawakin te kakawaki aei: E na kanga te kaotioti aei n uota te rau nakoira? ao Tera te koaua are e reirei te kaotioti aei are e kona n rota ‘aron maiura ni katoa bong’?
Bonnie H. Cordon, “N Riki bwa te Tia Kawakin Tiibu”
Ni buokia membwa bwa a na iangoi kawai ake a kona iai ni katamaroa aia mwakuri ni ibuobuoki, ko kona ni kamaenakoa nakon teniua te kurubu ao tuangia kurubu nako bwa a na wareka teuana mai buakon teniua mwakoro ake n ana rongorongo Titita Cordon. Kaoia bwa a na tibwai reirein te mwakuri ni ibuobuoki ake a tia n reiakin. E na kanga ni buokira n iri reirei aikai n “ riki bwa taan kawakin tiibu ake e kantaningaia te Uea mai iroura”? Kaoia membwa bwa a na tibwai taai ake a buokaki iai man ana mwakuri ni ibuobuoki temanna bwa a na namakina te kinaki ao te tangiraki iroun te Tia Kamaiu.
Jeffrey R. Holland, “Te Ibuobuoki ni Karekean te Itoman ae Raoiroi”
Ko kona ni moana te maroro iaon ana rongorongo Unimwaane Holland man kaoakia membwa bwa a na iangoa te reitaki inanon maiuia ae e kainnanoa te kamaiuaki ke te raoiakinaki. Imwina a kona ni kamatebwaia ana rongorongo Unimwaane Holland, ao n nooria bwa a kanga Brad ao Pam Bowen ni buoka tamaia bwa e na kamaiuaki. Tera kakabwaia aika a roko man te mwakuri aei? Tera nonori aika nano aika a reke irouia membwa ake a kona ni buokia ni karekea te raoi inanon aia reitaki?
Neil L. Andersen, “Ikoaki”
Ni kabwarabwara ana rongorongo Unimwaane Andersen, kam kona n uaia n wareka Ruka 10:30–35 ke mataku n te witeo ae te “Parable of the Good Samaritan” (LDS.org). N aro ra ake ti riki iai bwa te mwaane are e bwaka ibuakoia tan ira? Ni kaineti nakon are e taekinna Unimwaane Andersen, n te aro ra ae Iesu Kristo “ara I-Tamaria ae Raoiroi”? Ti na kanga ni karekea Ana kamaiu? Tao ko kona ni kaoia membwa bwa a na tibwai kawai ake te Tia Kamaiu e kamaiua ikoakia ke ikoakia naake a tangiria. A kona naba n kamatebwaia ana taeka Unimwaane Andersen ni kakaea te rongorongo ae kaunganano are a kona n tibwaia ma temanna ae e ikoaki.
Russell M. Nelson, “Aran te Ekaretia ae Eti”
E a tia Iesu Kristo n tua bwa e na aranaki te Ekaretia n Arana. Ko kona ni buokiia membwa ni kakorakora nanoia ni kan ira te kairiiri aei man kaoakia bwa a na kamatebwaia ana rongorongo Beretitenti Nelson, ni kakaea bukina bwa bukin tera “e aki kona ni bitaki aran te Ekaretia.” Ngkanne, kaoia bwa a na kamatebwaia kabanean ana rongorongo Beretitenti Nelson ibukin te berita are e taekinna bwa e na roko ngkai ti waaki ni “kaeta aran te Ekaretia.” Tera ae ti kona ni buoka te waaki aei?
Henry B. Eyring, “Kataia, Kataia, Kataia”
Beretitenti Eyring e katei “uoua titiraki aika moan te kakawaki”: “Tera ae I riai ni karaoia ni katoka Aran [te Tia Kamaiu] iaou?” ao “N na kanga n ataia ae iai rikirakeu?” Tao ko kona ni korei titiraki aikai iaon te burakiboti ao kaoia membwa bwa a na tibwai nonori aika nano ake a karekei ibukin titiraki aikai man ana katoto Beretitenti Eyring ao Titita Eyring. Beretitenti Eying e taekina naba te anne ae “I’m Trying to Be like Jesus” (Children’s Songbook, 78–79). Tera ana ibuobuoki taekan te anene aei nakon te maroro?
Dale G. Renlund, “N te Bong aei Kam na Rineia ”
A kona Membwa ni iangoa temanna are a tangiria ni kaunga bwa e na ira ana baire Tamara are i Karawa, n aron temanna kaain te utu ke temanna are a ibuobuoki nakoina. Ngkanna a kona ni manga kamatebwaia ana rongorongo Unimwaane Renlund ni kakaea bwa e tera aia namakin Iesu Kristo ibukira. A kona ni buokira nakon te ongotaeka? Tera ae e oti man Aia katoto iaon arora ni katamaroa ara waaki n ara utu ao n ara mwakuri ni ibuobuoki?
Gary E. Stevenson, “Tararuakin Tamnein Te Aomata ”
Naake ko reireinia tao a na tia n titiraki te titiraki ae aekakin aei man ana rongorongo Unimwaane Stevenson: “Ti na kanga n ataia bwa ti karaoa te mwakuri ni ibuobuoki n ana kawai te Uea?” A kona ni buokaki man maroroakinan kaekan te titiraki aei are a kunei n te rongorongo aei. Ma, ko kona naba ni uota tamnein te Tia Kamaiu are te tia kawakin tiibu (taraa Goespel Art Book [2009], no. 64) ao kaoia membwa bwa a na tibwa teuana te koaua man ana rongorongo Unimwaane Stevenson are e kaota iai te tamnei. A kona ngkanne membwa n tibwaua te bwai ae a namakinna bwa a na karaoia mai mwiin te maroro.