Bitaki a Buoka Kabaerantan Reiakinan te Euangkerio n te Mweenga ao n te Ekaretia
N riki bwa mwakoron te kekeiaki ae wakinako ni buokiia Aika Itiaki ni Boong aika Kaitira n “reiakin reirei, kakorakora te onimaki, ao ni kaumaka te nano ni kan nebonebo ibon iroum, e katanoata Beretitenti Russell M. Nelson bitaki ake a na buoka kabaerantan ao ni katoma te kawai ae e onoti man riai irouia membwa n nebonebo ao n reiakina ao ni maiuakina ana euangkerio te tia Kamaiu n te ekaretia ao ni mweengaia.
A tia ni katanoata taan kairiiri n te Ekaretia te bitaki nakon bairean te tai ni bootaki n te Tabati ni moanaki man Tianuare, n reitaki ma otinakon te karikiram ae boou n te reirei ae e boboto n te mweenga ao n boutokaaki n te Ekaretia. Bitaki aikai ao ake tabeua a barongaaki iaon waaki ake mai mwaina ake a kaman wakinaki n te Ekaretia n ririki aika nako, bwa e na buokiia membwa ni kabotoa maiuia ni kabane iaon Tamara are i Karawa ao Iesu Kristo ao ni kamatoa aia onimaki Irouia. Moan waaki aika a na karaoaki aikai ni ikotaki ma katuruan te taratara iaon kamatebwaian te euangkerio n te mweenga, karinean te Uea ni kawakinan te bong ae te Tabati n tabuia, ao n tabeakiniira ibon imarenara n aron are e na karaoia te tia Kamaiu ao ngkana e kairiira te tamnei.
Nanona bwa e na katauraoiia ana aomata te Uea ibukin Kauaokina, bitaki aikai a kabotoaki iaon kamatoaan rairakiia aomata n tatabemaniia, e kabwarabwara Unimwaane Quentin L. Cook man te Kooram n Abotoro n te Tengaun ma Uoman, ngke e kaota te bitaki n tain te maungatabu ni kabuta n te tetere ni Moaningabongin te Kaonobong.
“Ti ataia bwa ana karirii te tamnei ao te rairaki ae nene ao n reitinako e kona n reke mai inanon te mweenga … ,” e taku. “Ara kantaninga bwa ti na kaboraoi bwaai ake a namakinaki n te Ekaretia ao te mweenga n te aro bwa e na kakorakora te onimaki ao te maiu n tamnei ao ni kamatoa te rairaki iroun Tamara are i Karawa ao te Uea Iesu Kristo.”
Bitaki n te Mweenga
Taan kairiiri n te Ekaretia a katurua te taratara ae korakora iaon keraken te nano n nebonebo ni maiun temanna ao te utu n te mweenga, ni ikotaki ma kamatebwaian te euangkerio n te mweenga n te Tabati ao inanon te wiiki ao bitaki n te bootaki n te utu n te tairiki.
N reiakinana ao karaoana, e bon riki te mweenga bwa te tabo n reiakinan ao maiuakinan te euangkerio. Kamatebwaian te euangkerio n te mweenga irouia aomata n tatabemaniia ao utu n te Tabati ao inanon te wiiki e na katauraoa te tai ni karekea te korakora n tamnei ni katoa bong ao n anganiko te kona ni wakina am kamatebwai ibon iroum ao karekean am kaotioti. Onimakinan te tai ae e uarereke ibukin reiakinan te euangkerio n te Tabati e na karika te aki baeranti are e na kaangaanga karekean iai te rairaki ae nano man teimatoa.
“Ngaira n tatabeman bon tabera karikirakean tamneira,” e taku Beretitenti Nelson. “Ao koroboki aika a tabu a kamatata bwa Kaaro iai moan katabeaia n reireia taian reirei nakoia natiia.”
E kaairaki n te bitaki aio kaotakin te boki ni ibuobuoki ae e boou n kamatebwaian te euangkerio ibukiia aomata n tatabemaiia ao utu n te mweenga. Aomata n tatabemaniia ao utu a kona ni kabongana te boki ae boou Nakomai, Iriirai—Ibukiia Aomata n Tatabemaniia ao Utu, ngkana a tangiria, ni kaira aia kamatebwai n te euangkerio itinanikun tain te taromauri. Te boki ni ibuobuoki ae boou e mwakuri bwa raon ana boki te tia reirei n te Reirei n Tabati ao Moanrinan ni katiteboi reirei ake a nako n te Tabati ma kamatebwaian koroboki aika a tabu ao iango ni kairi ibukin te bootaki n te tairiki.
Irarikin kaungakin kamatebwaian te euangkerio, taan kairiiri n te Ekaretia a kabooua aia kakao bwa a na bane aomata ni ira buakon te waaki n te bong ae te Tabati—ao inanon te wiiki—n te marooro n te utu, bootaki n te tairiki, mwakuri iaoia ara bakatibu ao mwakuri n te tembora, ibuobuoki, oin am nebonebo, ao te tai ni kukurei n te utu.
Rongorongo ake a kanakoaki nakoia membwa ao taan kairiiri e kabwarabwara bwa taan kairiiri n te Ekaretia a na kaungaia membwa ni karaoa te tairiki ni mweengaia ao reiakinan te euangkerio n te bong ae te Tabati—ke ni boong tabeua ake a rineia. Te waaki ni kakukurei n te utu n te tairiki e kona ni karaoaki n te Moanibong ke ni bong tabeua. Ao n aron aio, taan kairiiri a na reitanako kawakinan tairikin te bong ae te Moanibong n aki katabea man ana bootaki ao ana waaki ni kabane te Ekaretia. Ma e ngae n anne, te tai are e kabaneaki n te kamatebwai n te euangkerio n te mweenga ao waaki ni kakukurei ibukiia tabeman ao utu a a kona ni baireaki taia nakon angaraoina irouia.
Neboan te Atua n te taromauri, karaoan otenanti aika tabu ikanne, ao te ikotaki n reirei ibon imarenara ao ni kakorakoraira ao ni beku ibon imarenara a na bon riai n riki ni kamatoa te onimaki ao te rairaki iroura n tatabemaniira nako. Kauarerekean te tai ae e kabaneaki n tain te taromauri e na bon aki mwakuri ni karokoa ae ngaira n tatabemaniira ao utu ti bon nanona ae ti na kakorakora mweengara.
E reirei Beretitenti Nelson: “Ngkai ngaira Aika Itiaki, ti a tataneiai n iangoa te ‘ekaretia’ bwa te bwai ae riki n ara tabo n taromauri, e boutokaki man te bwai are riki n te mweenga. Ti kainanoa te bitakii nakon te katei aio. Ngkai bon tain te Ekaretia ae boboto iaon te mweenga, e boutokai baike a riki inanon ara mwaanga, ara uoote, ao n autin te titeiki.”
Bitaki n te Ekaretia
Bitaki nakon ara taneiai n te Ekaretia e riki bwa a na boutoka te rikirake ni kamatebwaian te euangkerio ao maiuakinana n te mweenga. Bitaki aikai a irianaki ma manga bairean te tai n te Tabati ni katoa wiiki n aron:
-
Te 60 ni miniti ni Bootakin Te Toa,
-
Te 10 ni miniti tain te maing,
-
Ao te 50 ni miniti tain te kiraati, n aron ae kaotaki n bairean taia mai nano:
|
Bairean te tai n te Tabati ni moa man Tianuare 2019 | |||
|
60 te miniti |
Bootakin te toa | ||
|
10 te miniti |
Te mwaing nakon taian kiraati | ||
|
50 te miniti |
Kiraati ibukiia ikawai, kiraati ibukiia te roronrikirake; Moanrinan | ||
Te 50 ni miniti tain te kiraati e na kaairaki iai te Moanrinan ibukiia ataei ni katoa wiiki ao aia kiraati te roronrikirake ao ikawai e na kakaibibitaki ni katoa wiiki:
-
Te moan ao te katenua n Tabati: Reirei n Tabati.
-
Te kauoua ao te kaaua n Tabati: kooram n te nakoanibonga, Bootaki n Aine ao Kairake n Ataeinaine.
-
Kanimaua n Tabati: te bootaki n roronrikirake ao ikawai a mena iaan ana kaetieti te bitiobi.
Ngkana e a mwaiti kain te Moanrinan ao n tangira kamaenakoana nakon te Moanrinan ibukiia aika a uarereke ao ibukiia aika ikawai, taan kairiiri a na riai ni kaibibitii waakin bairean te tai ibukin iteran mwaitia ataei ao ni kangaraoaki ma taia ngkana e riai.
|
Bairean te tai n te Moanrinan e na moanaki n Tianuare 2019 | |
|
25 te miniti |
Te tataro, warekan te kibu ke taekan te onimaki, ao te kabwarabwara (5 te miniti). Te tai n anene: Kuuna ake a boutokai kiibu ake a kamatebwaiakaki n te kiraati (20 te miniti) |
|
5 te miniti |
Te mwaing nakon taian kiraati |
|
20 te miniti |
Kiraati: reirei man Nakomai, Iriirai—Ibukin te Moanrinan |
Bitaki ni Kanoan te Reirei
Te bitaki nakon bairean tain te bootaki a kaai ni mwakuri ma te boki ae boou are e karinaki n te Ekaretia Nakomai, Iriirai ae kanoan te reirei. Ni moanaki n Tianuare, waakin te anga reirei are e boboto n te mweenga, ao e boutokaaki n te Ekaretia e na katiteuana are a reiakinna n aia kiraati ikawai, te roronrikirake, ao ataei n te Reirei n Tabati ao Moanrinan, ni kabebetea aron te kamatebwai n te mweenga inanon te wiiki anne.
Kaetieti, bairean te reirei, ao bwaai ni ibuobuoki a kona ni kuneaki n:
-
Nakomai, Iriirai—Ibukin te Kooram n Unimwaane ao te Bootaki n Aine (e kuneaki n te Nobembwa 2018 Ensign ao Riaona)
-
Nakomai, Irirai—Ibukin te Kooram n te Nakoanibonga ae te Aaron
-
Nakomai, Iriirai—Ibukiia Kairake n Ataeinaine
-
Nakomai, Iriirai—Ibukin te Reirei n Tabati
-
Nakomai, Iriirai—Ibukin te Moanrinan
Nakon comefollowme.lds.org ibukin rongorongona riki.
Tabeua riki bitaki ni ikotaki ma aikai:
-
Te bootaki ni kauntira ibukiia taan reirei e na booaki ni katoa kuata ao ai tiaki ni katoa namwakaina.
-
Bairean tain te reirei n aia kooram unimwaane ao te Bootaki n Aine e nang akea ibuakona te bootaki ni kauntira n te moan Tabati ke te reirei ae e onoti n te kauua n Tabati. Reirei a na boboto iaon rongorongo man te maungatabu ni kabuta ae e a tibwa nako.
-
Te tai n anene e na onea mwin te tai n tibwatibwa. Te Kabwarabwara iaon te Tai n Tibwatibwa e nang aki reitakinako
-
Te reirei iaon Moan Tuan te Euangkerio e nang aki kabonganaaki. Ni kabane membwa ao raraoia ake a kan ongora a na kaoaki bwa a na ira aia kiraati ikawai ke te roronrikirake n te Reirei n Tabati.
-
Reirei ake itinanikun are e baireaki—n aron are ibukin kakorakoran te mare ao te utu, te katauraoi nakon te tembora, te katauraoi ibukin te nako ni mitinare, ao rongorongoia ara bakatibu—a na aki karaoaki n tain te kiraati n te Tabati. Reirei aikai a na kona n reiakinaki n te tai teuana ibukiia tabeman, te utu, ke kurubu ni kaineti ma kainnanoia kain te tabo ao ian ana babaire te bitiobi.
Te Kantaninga n Taian Bitaki Aikai
Mataniwi n te Ekaretia a ukora karaoan te booraoi ae boou ao te reitaki ae rikirake imarenan te taneiai ae korakora n te mweenga ao te Ekaretia ma bukina aika onoti n aia iango.
“Ma a mwaiti riki bwaai aika a riki n te bitaki aio nakon are tii kauarerekean te tai ni bootaki n te Tabati … ,” e taku Unimwaane Cook. “Karaoan nanon ao taian kakabwaia ake a irekereke man te bitaki aio ao tabeua riki ake a tibwa tia n rinanoaki n aron:
-
“Te Rairaki ae e nene ao n reitinako iroun Tamara are i Karawa ao te Uea Iesu Kristo ao kakorakorakin te onimaki Irouia.
-
“Kakorakorakiia tabeman ao utu rinanon waaki ae a boboto n te mweenga ao a boutokaaki ma reirei ake a wakinaki n ana bootaki te Ekaretia ae e karika te kakukurei ni mauakinan te euangkerio.
-
“Kawakinan te bong ae te Tabati, ma ni katurua ara iango n te otenanti iaon te bootaki n toa.
-
“Ni buokiia natin Tamara are i Karawa ni iteran te rabuna aika uoua rinanon te mwakuri ni mitinare ao ni karekei otenanti ao berita ao kakabwaia man te tembora.”
N te katanoata ibukin bitaki aikai, taraa “Ana Taeka ni Kaukuki,” Russell M. Nelson, n te iteraniba 6 n te beeba ni kaongora, Quentin L. Cook, “Te Rairaki ae e Nene ao n Reitinako iroun Tamara are i Karawa ao te Uea Iesu Kristo,” ni iteraniba 8. Ibukin te rongorongo iaon bitaki aikai, kawara sabbath.lds.org n nora te reta man te Moan Beretitentii, kaekaan titiraki nakon titiraki aika aki toki n tabekakirake, ao tabeua bwaai ni ibuobuoki ake a na kona ni buoka temana ao te utu n tabua te bong ae te Tabati.