Taki ʻe Palesiteni Nalesoni e Halá
Kuo naʻinaʻi mai ʻa Palesiteni Russell M. Nelson kiate kitautolu takitaha ke tau angaʻofa, anga faka-Kalaisi mo anga fakalaumālie ange ʻi heʻetau ngāue fakaetauhi ki he niʻihi kehé, pea kuó ne tā mai e sīpinga ʻo e ʻuhinga ko iá ʻi he anga ʻo ʻene ngāue fakaetauhí talu mei he konifelenisi lahi fakamuimuitahá.
Taimi nounou pē hili e konifelenisi lahi ʻo ʻEpeleli 2018, naʻe ʻaʻahi ai ʻa Palesiteni Nalesoni mo hono uaifi ko Uenitií, mo ʻEletā Jeffrey R. Holland ʻo e Kōlomu ʻo e Kau ʻAposetolo ʻe Toko Hongofulu Mā Uá pea mo hono uaifi ko Petulisá, ki ʻIngilani, ʻIsileli, Keniā, Simipāpuē, ʻInitia, Taileni, Siaina pea mo Hauaiʻi, USA.
ʻI ha folau kimuiange ʻa Palesiteni Nalesoni, naʻá ne feʻiloaki ai mo e kāingalotú, kau faifekaú, kau takí mo e kaungāmeʻa ʻo e Siasí ʻi he fakahihifo, vaheloto mo e fakahihifo ʻo Kānatá; Siāto, Uāsingatoni, USA; mo e Tominikeni Lepapuliká—ʻo ne fai ai ha lea lōloa faka-Sipeini, pea ko e fuofua taimi ia ke fai ai ʻe ha Palesiteni ʻo e Siasí ha malanga lōloa ʻi ha lea fakafonua kehe mei he faka-Pilitāniá.
Naʻe akoʻi ʻe Palesiteni Nalesoni ʻi he ngaahi fakatahá mo e faeasaití ʻo kau ki he hingoa totonu ʻo e Siasí; vahevahe ʻo e ongoongoleleí ki he niʻihi kehé; fakamahuʻingaʻi ʻo e Tohi ʻa Molomoná; founga ke toe lelei ange ai e moʻuí ʻi hono moʻuiʻaki ʻo e ongoongoleleí; taimi ʻoku hoko ai e founga ʻa Kalaisí ko e hala ʻo e fiefiá mo e nekeneká he taimí ni mo e taʻengatá; ngaohi ʻo e ʻapí ke hoko ko ha hūfangaʻanga ki he fānaú; fakaʻaongaʻi ʻo e tauʻatāina ke filí ke ikunaʻi ʻaki e ʻahiʻahí mo muimui ki he Fakamoʻuí; tokangaekina ʻo e niʻihi kehé; pea teuteu ke maʻu e ngaahi tāpuaki ʻo e temipalé.
Naʻe lea foki ʻa Palesiteni mo Sisitā Nalesoni ʻi ha fakataha lotu fakaemāmani lahi ʻa e toʻu tupú ʻi he ʻaho 3 ʻo Sune 2018, ʻo pehē ai ʻe Palesiteni Nalesoni ko e toʻu tupu ko ia ʻoku nau kau atu ki he “konga kau ʻa e ʻEikí,” mo tokoni ki hono tānaki ʻo ʻIsilelí, ʻoku nau maʻu e faingamālie ke “kau ki ha meʻa lahi, kāfakafa mo fakaʻeiʻeiki!” Naʻá ne poupouʻi e toʻu tupú ke taʻofi ʻenau fakafalala maʻu pē ki he mītia fakasōsialé, kae feilaulauʻi ha taimi maʻá e ʻEikí, fai hano vakavakaiʻi fakaʻauliliki e moʻuí mo e ʻEikí, lotu fakaʻaho ke lava ʻo maʻu e ongoongoleleí ʻe he fānau kotoa ʻa e ʻOtuá pea hoko ko ha maama ki he māmaní.