Ongoongo Fakatemipalé

Naʻe fanongonongo ʻe Palesiteni Russell M. Nalesoni ʻoku palani e Siasí ke langa ha temipale foʻou ʻe 12, lolotonga ʻene meʻa fakafeʻiloaki ʻi he konifelenisi lahí (vakai ki he peesi 113). Naʻá ne toe fanongonongo foki ha ngaahi palani ke monomono e Temipale Sōleki mo e ngaahi temipale kehe ʻo e “toʻu tangata paioniá” pea ʻe toki ʻomi e fakaikiikí ʻamuiange.

ʻE langa e ngaahi temipalé ʻi Mendoza, Argentina; Salvador, Brazil; Yuba City, California, USA; Phnom Penh, Cambodia; Praia, Cape Verde; Yigo, Guam; Puebla, Mexico; Auckland, New Zealand; Lagos, Nigeria; Davao, Philippines; San Juan, Puerto Rico; mo e Washington County, Utah, USA.

ʻE vavé ni pē hano fakatapui ha temipale ʻe fā: ko e Temipale Concepción Chile ʻi he ʻaho 28 ʻo ʻOkatopá; Temipale Barranquilla Colombia ʻi he ʻaho 9 ʻo Tīsemá; ko e Temipale Rome Italy he uike ʻo e ʻaho 10 ʻo Māʻasí ki he 17 ʻo Māʻasí 2019; pea mo e Temipale Kinshasa Democratic Republic of the Congo he ʻaho 14 ʻo ʻEpeleli 2019.

Naʻe toki fakatapui foki ha temipale ʻe ua: naʻe toe fakatapui e temipale Houston Texas ʻi he ʻaho 22 ʻo ʻEpeleli 2018, mo e Temipale Jordan River Utah he ʻaho 20 ʻo Mē 2018.