Ron long Baeskel blong Olgeta

I Kam long Elda Carl Maurer

Samtaem yumi wantem helpem ol narawan be yumi no rili andastanem inaf wanem i stap hapen insaed long laef blong olgeta, mekem se yumi no save mekem wan samting i jenis. Taem yumi kea, lavem mo andastanem wan, mo taem Spirit i stap lidim yumi, yumi gat moa sakses blong go long hem mo helpem hem wetem nid we i blong hem stret.

?Wanem nao sam wei we yumi
save givhan long ol pipol we yumi kea long olgeta, long wan wei we i wok gud?

Presiden Russell M. Nelson (Jeneral Konfrens Lidasip Miting, Maj 2018) i stap tijim yumi se, taem yumi stap givhan long wei blong Sevya, “. . . bae ol doa oli open, mo ol pipol bae oli kasem ol blesing. Bae Lod i hilim ol hat, mo ol hevi trabol oli nomo hevi”.

Mi tingbaot wan eksperiens we wan sista misinari i bin serem wetem mi long wan leta we hem i bin raetem. Hemia i tajem mi bigwan stat long tetaem ia.

Sista ia i stap givim seves wetem kompanion blong hem blong fo mo haf manis. Sista Madsen i wan sista misinari we i givim ful tingting blong hem, i stap obei mo i smat. Hem i stap wok wetem paoa mo hem i laekem blong ron spid long baeskel i go long ol apoenmen blong hem.

Kompanion blong Sista Madsen i kaen, i no wok had tumas, mo i kam long wan smol aelan long Pasifik.

Bifo long misin blong hem, laef i slo mo i no strong tumas. Mekem se, taem hem i kam kompanion wetem Sista Madsen, blong stap wekap eli moning, gohed wetem bisi laef blong ol misinari, mo blong ron long baeskel long wan bigfala eria, i niu mo hem i mas traehad blong gohed wetem.

Wan dei, taem oli stap ron i go long wan apoenmen, kompanion blong hem i slodaon, i no olsem oltaem, mo Sista Madsen i filim se i no save wet tumas. Hem i kam blong harem nogud mo hem i stat blong singsing taem hem i stap ron i go—i wet long kompanion blong hem i kam kolosap, i ron folem spid blong hem. “Mi traem blong kam olsem Jisas; Mi stap folem ol wei blong Hem; Mi traem blong lavem kompanion blong mi long evri samting mi mekem mo talem.”

Afta we hem i harem komplen abaot spid blong ron long baeskel, Sista Madsen i tingting long hemwan se kompanion blong hem i jes no wantem mekem wok long wei we hem i wantem. Tufala i ron kolosap wan kilometa, nao kompanion blong hem i stop, i singaot: “!Sista Madsen, . . . BAE MI DED NAO!”

Sista Madsen i tanem raon, mo i kros, i toktok strong i talem: “!Ale, yu givim baeskel blong yu, mo bae yu ron long hemia blong mi smol taem!” Kwiktaem nomo, tingting blong hem i go daon evriwan. Brek long wil biaen i lok i stap long wil blong hem mo i no save kamaot. Hem i agri: “!Mi no save ron nomo 100 mita long baeskel blong hem; be afta, mi mi pulpulum hem kolosap wan ful kilometa! Mi mi sapraes tumas we hem i bon ron long baeskel longwe olsem.”

Sista Madsen i tingting mo talem: “Mi mi no stret evriwan long ol las 10 yia (stat long taem we mi kambak long misin) be, stat long tetaem ia, mi bin traem blong mekem se i wan fasin blong mi, blong mi ‘ron long baeskel blong wan narawan’ taem mi stap traem blong andastanem ol nid blong ol narawan.”

?Eksperiens ia i soemaot wanem long yumi mo olsem wanem nao yumi save givhan long wei blong Sevya?

Lukaotem sam wei blong yumi kam antap moa long fasin we yumi stap kea long ol narawan. Hemia i minim blong save mo andastanem ol nid blong olgeta, tugeta, long saed blong spirit mo long saed blong laef. Taem yumi stap prea blong gat ol fasin olsem hemia blong Kraes, mo taem yumi stap developem fet, fasin blong wok wetem strong tingting, blong save wet longtaem mo blong stap strong long hadtaem (Alma 32:41–43), bambae yumi gat moa paoa blong givhan olsem we Sevya bae i mekem.
Yumi save prea blong kasem insperesen. Traehad blong andastanem mo luk ol nid blong olgeta we yu stap givhan long olgeta. Prea blong faenem ol wei blong blesem ol pikinini blong Hem blong helpem olgeta blong laef folem gospel mo blong kam moa indipenden. Olgeta toktok blong Spirit ia, maet bae oli no kam evriwan wantaem, be bambae oli kam taem yumi gohed blong prea, blong tingting hevi, mo blong folem ol tingting mo ol aedia we oli kam long yumi.
Yumi save askem, luklukgud wanem i stap, mo lisin. Yumi mas kea inaf blong save askem ol kwestin wetem insperesen, blong askem se oli stap olsem wanem, mo stop smol blong save luk, mo luklukgud olgeta, mo lisin blong maet yumi save helpem olgeta wetem ol ril nid blong olgeta bifo oli kam bigwan tumas. Yumi mas “glad blong krae sore wetem olgeta we oli krae sore, yes, mo leftemap tingting blong olgeta we oli nidim fasin blong leftemap tingting” (Mosaea 18:9)
Tekem aksen blong lukluk long ol nid. Taem yumi stap givhan, yumi “faenemaot tru long toktok mo insperesen, hamas taem, mo wanem kaen kontak yumi stap gat wetem olgeta we yumi stap givhan long olgeta” (“Givhan, Kwestin we Oli Askem Oltaem”)

Taem yumi stap gohed blong traem blong stap olsem Sevya blong yumi, Jisas Kraes, blong stap kea long wanwan long yumi, bambae Hem i helpem yumi. Hem i stap invaetem yumi blong kam olsem Hem (Matiu 5:48). Hem i stap lukaotgud long evriwan long ol kavenan pikinini blong Hem, mo plante taem, Hem i mekem hemia tru long yumi. Atonmen blong Jisas Kraes i givim paoa we yumi nidim blong blesem yumi taem yumi stap go aot blong blesem ol narawan. Sevya i wantem yumi blong save olsem wanem blong lavem narawan tru.

Mi prea se bae yumi traehad moa blong andastanem evriwan long ol pikinini blong God, blong yumi Ron long Baeskel blong Olgeta taem yumi stap givhan long nid blong olgeta. Taem yumi stap mekem hemia, bambae yumi luk se fet blong yumi long Papa long Heven mo Jisas Kraes mo Atonmen blong Hem, i kam antap moa from se wanwan man, woman mo famli i kam strong moa tru long ol odinens mo kavenan. (D&C 20:47, 53; Handbook 2, 9.1.1).