Pagsiksik sa mga Katigulangan ug Pagpangita sa Kamatuoran
Yuri Siqueira Zanini
Rio de Janeiro, Brazil
Paghulagway pinaagi ni Truina Dalziel/Lilla Rogers Studio
Interesado kong mahibalo mahitungod sa Italyano nakong mga katigulangan, mao nga pipila ka tuig ang milabay nagsugod ko sa pagsiksik sa akong genealogy. Walay adlaw nga milabay nga wala ko magsiksik og pipila aron makit-an kini. Sa katapusan, nakit-an ra nako ang rekord sa pagkatawo sa ikatulo nakong apohan sa tuhod gikan sa Italy. Nakatandog kanako ang pagkakita sa iyang rekord sa paagi nga mibati ko nga kinahanglang magpadayon sa pagsiksik sa akong mga katigulangan.
Sa akong paghimo niini, nakakita kog daghang mga katigulangan nga wala pa ko sukad makadungog. Nakahimamat pud ko og usa ka batan-ong babaye sa social media nga ginganlan og Ingrid Zanini. Nagduda mi nga basin kaliwat mi kay parehas man mi og apeliyido. Atol sa among pag-istoryahanay, gisultihan ko ni Ingrid nga miyembro siya sa Ang Simbahan ni Jesukristo sa mga Santos sa Ulahing mga Adlaw. Giistoryahan ko niya mahitungod sa Simbahan, ug miingon nga padad-an ko niya og kopya sa Basahon ni Mormon. Dihang miabut ang libro, gisugdan nako kini sa pagbasa.
Usa ka adlaw sa trabaho, usa ka batan-ong babaye ginganlan og Erika nakabantay nga duna koy Basahon ni Mormon. Dili nako malimtan ang ekspresyon sa iyang nawong—labihan ang iyang kalipay ug kahinam. Nangutana siya kon nalingaw ba ko sa basahon ug kon gusto ba kong moadto sa simbahan kauban niya ug sa iyang igsoong lalaki. Duha ka semana human nako madawat ang Basahon ni Mormon, misimba ko sa unang higayon.
Ang leksyon nianang adlawa sa Sunday School mao ang mga pagbunyag sa mga patay ug ang kaimportante sa family history. Nainteresado kaayo ko. Nakatagbo nako ang mga misyonaryo ug mitambong ko og miting mahitungod sa family history nianang pagkahapon sa stake center. Samtang nag-investigate ko sa Simbahan, gibati nako ang presensya sa akong mga katigulangan, ug nadasig nga magkat-on pa og dugang.
Dihang gidapit ko sa mga misyonaryo sa pagpabunyag, mihunong ko aron maghunahuna sa tanang nanghitabo sukad nagsugod ko sa paghimo sa akong family history. Ang pagpahibalo kanako sa ebanghelyo ug pagkat-on mahitungod sa mahangturong importansya sa family history dili lang usa ka sulagma. Akong gidawat ang imbitasyon sa mga misyonaryo nga magpabunyag.
Nagbuhat gihapon ko sa family history, ug mapasalamaton ko nga ang akong mga paningkamot sa pagsiksik sa akong mga katigulangan karon maghatud na kanila sa mahangturong mga panalangin tungod kay akong nakaplagan ang ebanghelyo ni Jesukristo.