Ko Sisitā Bingham ʻi he Puleʻanga Fakatahatahá
Naʻe fakahaaʻi ʻe he Palesiteni Fineʻofá, Sisitā Bingham, lolotonga haʻane lea ʻi ha fepōtalanoaʻaki fakapēnolo naʻe fakatefito ʻi he tui fakalotú, ʻo fekauʻaki mo e kumi hūfangá ʻi ha Fakataha ʻa e Ngaahi Puleʻanga Fakatahatahá ʻi Niu ʻIoke Siti ʻi he ʻaho 13 ʻo ʻEpeleli 2017, ʻa ʻene fakatuʻamelie “ʻe ngāue fakataha” e ngaahi siasí“ ʻi he fanga kiʻi founga iiki mo faingofua ke fakahoko ha ngaahi meʻa fakaofo.”
Lolotonga e fakataha fakataʻu ko e “Tokanga Taha ki he Tuí,” naʻe vahevahe ai ʻe Sisitā Bingham e ngaahi ngāue ʻoku fai ʻe he vaʻa tokoni fakaetangata ʻa e Siasí ki he kau kumi hūfangá, mo fakahaaʻi ʻene houngaʻia moʻoni ki he tokotaha kotoa ʻoku kau mai ki he “ngāue faingataʻa mo lelei lahi” ko hono fakafiemālieʻi e siʻi kau faingataʻaʻia ʻi he funga ʻo e mamaní.
Ne toki foki mai ʻa Sisitā Bingham mo Sisitā Sharon Eubank, ko e Tokoni ʻUluaki ʻi he Kau Palesitenisī Lahi ʻo e Fineʻofá mo e talēkita ʻo e vaʻa Tokoni ʻOfa ʻa e Siasí, mei haʻana ʻaʻahi ki ʻIukanitā ʻi he Polokalama Tokoni Fakapaʻanga ʻa e Ngaahi Puleʻanga Fakatahatahá Maʻá e Longaʻi Fānaú (UNICEF). Naʻe kau atu foki ʻa Sisitā Eubank ki he fakataha ‘a e ngaahi puleʻanga fakatahatahá ʻi Niu ʻIoke Sití.