Pagpanalangin Niadtong Dili Kaayo Aktibo
Ni Elder Terence M. Vinson
Sa Seventy
Samtang kita magpuyo nga takus sa Espiritu ug magtinguha sa tabang sa Ginoo, Siya mopanalangin sa atong mga paningkamot sa pagdala sa Iyang nawala nga mga karnero balik ngadto sa panon.
Pagkaayo, ni J. Kirk Richards
Atong madiskubrihan ang daghang maanindot nga kamatuoran sa kinabuhi pinaagi sa atong espirituhanon nga pagbati kay sa atong pisikal nga pagbati. Sa pagkatinuod, daghang importanting mga butang—naglakip sa mahangturon nga mga butang—nga mabati apan dili makita.
Si Apostol Pablo mitudlo niini nga baruganan ngadto sa mga Santos sa Corinto: “Kami nagasud-ong man dili sa mga butang nga makita kondili sa mga butang nga dili makita; kay ang mga butang nga makita lumalabay lamang, apan ang mga butang nga dili makita walay katapusan” (2 Mga Taga-Corinto 4:18).
Ang gugma nakat-unan ug nabati una pinaagi sa espiritwal nga pagbati. Sa samang paagi ang, kalooy, panaghigalaay, pagkamainantuson, ug hugot nga pagtuo mao ang mga bunga sa Espiritu (tan-awa sa Mga Taga-Galacia 5:22). Ang Langitnong Amahan naggamit niining mga pagbati sa Espiritu sa pagpanalangin sa Iyang mga anak, lakip niadtong nahisalaag.
Hapit sa tibuok nakong kinabuhi nagpuyo ko didto sa Pacific Area. Daghang mga tawo sa Pacific ang adunay lawom nga panabut sa kaimportante sa dili makita nga mga butang nga gihulagway ni Pablo, ug maklaro nga daghan ang mihatag og prayoridad sa espirituhanong mga butang kay sa pisikal nga mga panginahanglan.
Kini nga dapit sa Simbahan nagkadaiya, uban sa kalamboan ug sopistikado nga mga nasud, sama sa Australia ug New Zealand, ingon man usab sa mga nasud sa pang-uma ug pangisdaan, sama sa Tonga ug Samoa, diin ang mga miyembro sa Simbahan nagrepresentar og taas nga proporsyon sa populasyon. Dayon adunay mga nasud nga nag-anam sa paglambo, sama sa Papua New Guinea ug ang Solomon Islands, diin ang dagkong mga hagit gisagubang sa mga tawo.
Kining pagkadaiya nakahatag og mga oportunidad sa pagkat-on.
Ang Kadinalian sa Pagbisita sa Dili Kaayo Aktibo
Ang usa sa maong kasinatian sa pagkat-on mopatigbabaw. Isip usa ka Area Seventy, gitahasan ko sa pagdumala sa komperensya sa stake sa New Zealand. Sa pipila lang ka bulan sa wala pa, si Presidente Thomas S. Monson mihatag og makatandog kaayo nga pakigpulong ngadto sa tanang mga Seventy sa kalibutan. Iyang mga pakigpulong nagsentro sa pagluwas niadtong nahilayo gikan sa mga ordinansa sa ebanghelyo.
Isip resulta sa pakigpulong ni Presidente Monson ug ang sangputanan sa mga hagit nga iyang gihatag kanamo, akong gibati ang kadinalian sa pagbisita ug pagdapit niadtong wala kaayo miapil sa ebanghelyo aron mahibalik sa pagpakigsaad ug sa mga ordinansa sa kaluwasan. Akong gidapit ang mga presidente sa stake nga ila kong paubanon atol sa pagtapos sa mga semana sa komperensya sa stake aron sa pagbisita sa dili kaayo aktibo nga mga miyembro. Kadto nga mga pagbisita kanunay gyud nga maanindot.
Usa ka Sabado atol sa tapos sa semana nga komperensya sa stake, ang presidente sa stake ug ako mibisita sa pipila ka mga pamilya. Ang bana ug asawa sa usa niining mga pamilyaha naminyo sulod sa 10 ka tuig ug na-sealed sa templo apan karon dili kaayo aktibo. Mainiton ang ilang pagdawat kanamo, ug kami nakabaton og espirituhanon nga mga pagbisita. Sa pagtapos sa pagbisita, naaghat ko sa pagpangutana sa bana kon gusto ba siya og panalangin ug unya gihangyo siya sa paghatag og panalangin sa iyang asawa.
Dili kini kasagaran nga pag-aghat. Natudloan ko nga isip usa ka bisita sa laing panimalay, kinahanglan kong mosunod ug ang pangulo sa panimalay mao ang tawo nga modesisyon unsay buhaton. Kini nga brother, bisan pa man, mapasalamaton sa panalangin nga gitanyag, ug makita nga natandog siya pagkahuman sa presidente sa stake ug ako nahuman.
Sa iyang pagbarug, hinoon, mihangyo siya kon usa namo mohatag og panalangin sa iyang asawa. Siya misulti namo nga bisan og 10 na ka tuig nga naminyo, wala gayud siya makasulay nga mohatag og panalangin ug dili komportable sa pagbuhat sa ingon.
“Motabang mi nimo,” miingon ko, nga nag-awhag kaniya.
Mga paghulagway pinaagi ni Brian Call
Human namo gipasabut kon unsaon sa paghatag og panalangin ug mitabang kaniya nga mosaysay sa unsay isulti sa sinugdanan ug sa katapusan, mihatag siya sa iyang asawa og usa ka maanindot nga panalangin. Sa dihang nahuman na siya, nakaluha ang among mga mata, ug siya ug ang iyang asawa midawat sa among imbitasyon nga mobalik sa ebanghelyo.
Isip resulta niining malumo nga kasinatian, ang presidente sa stake nadasig atol sa iyang pakigpulong ngadto sa mga miyembro sa stake sa sunod nga adlaw sa paghagit sa naghupot sa priesthood sa pag-uli human sa komperensya sa stake ug hatagan og mga panalangin ang mga sakop sa pamilya.
Giaghat sa Pagpanalangin
Sa pagtapos sa sesyon sa Dominggo sa komperensya sa stake, mibati ko og laing pag-aghat—niining higayona duolon ang usa ka batan-on nga sister nga naglingkod sa mga ika-10 nga row gikan sa atubangan sa chapel ug nangutana kon nagkinahanglan ba siya og panalangin. Wala ko nakaila kaniya, apan ang pag-aghat mapugsanon kaayo.
Nahibulong ang sister, nagpanuko sa pag-ingon nga “Dili, salamat.”
Ingon og mapasalamaton ko sa iyang tubag, apan akong gibati nga nahimo na nako sumala sa diktar sa Espiritu. Mibalik ko sa atubangan sa chapel aron sa pagtimbaya sa mga miyembro sa dihang kining mao gihapon nga babaye sa kalit lang miduol sa atubangan ug mihangyo nako kon mosugot pa ba ko nga mohatag kaniya og panalangin. Ako siyang gisultihan nga “syimpre” ug misugyot nga moadto siya sa opisina sa presidente sa stake, diin moapas ra kami sa dili madugay.
Samtang mipaingon ang presidente sa stake ug ako sa opisina, nangutana ko kabahin sa babaye. Iyang gipasabut nga bag-o lang siyang mibalik sa simbahan human sa 10 ka tuig nga wala makatambong. Nagpuyo siya nga nag-inusara, apan sulod niadtong 10 ka tuig nagpakabuhi siya nga supak sa sumbanan sa ebanghelyo.
Wala pa ang mga panalangin, kining batan-ong sister misulti namo sa iyang mga pagbati sa pagkadili takus. Atol sa iyang panahon nga layo sa Simbahan, miingon siya, siya nagtuman sa iyang gusto nga wala maghunahuna sa espirituhanong mga butang. Nahigmata na usab siya sa ebanghelyo apan mibati nga nahilayo na siya og maayo sa iyang espirituhanong paglambo nga wala na siya maglaum nga makab-ot pa ang iyang potensyal.
Nagtudlo kami kaniya bahin sa mga mamumuo nga naulahing motambong sa ubasan—ug kadtong mobalik sa ubasan human mibiya og kadiyot—makadawat gihapon sa samang ganti niadtong kinsa naghago diha sa taas nga panahon (tan-awa sa Mateo 20:1–16). Dayon mihatag kami kaniya og panalangin sa priesthood.
Mga Sister sa Ubasan, ni J. Kirk Richards
Samtang gilitok ang panalangin, nabati nako nga nabug-atan sa dakong gugma nga gibubo sa Ginoo alang kaniya. Makatandog kaayo kadto nga pagbati kay sa akong nabati sukad—pagbati nga nakapaamgo nako nga anaa ko sa presensya sa halangdon nga espiritu. Pagkahuman sa panalangin, ang sister mibarug gikan sa lingkuranan. Naanud sa iyang mga luha ang make-up sa iyang mga mata. Nakahilak usab ako.
Gitugot sa Ginoo nga akong makita kining talagsaon nga batan-ong babaye nga anaa sa sayong bahin sa usa ka proseso nga kinahanglan gayud nga masinati natong tanan aron makab-ot ang atong hingpit nga potensyal dinhi sa yuta. Kon kita mawala sa espirituhanon nga paagi ug kon kita makabuhat og sala, kitang tanan kinahanglang magmapainubsanon ug maghinulsol.
Sumala sa gitudlo ni Apostol Pablo sa mga taga-Galacia, kining kinabuhia mao ang panahon alang sa espiritu sa pagbaton og gahum sa lawas. “Kay ang mga pangibog sa unod kasupak sa Espiritu, ug ang mga tinguha sa Espiritu kasupak sa unod: kay kining duha nagakasinupakay man ang usa sa usa, aron kamo dili makahimo sa buot ninyong pagabuhaton.” (Mga Taga-Galacia 5:17).
Bisan kita makakab-ot sa atong potensyal kini nag-agad kon ang atong mga espiritu modumala sa atong mga lawas, kon kita mopatigbabaw batok sa “kinaiyanhon nga tawo” (Mosiah 3:19). Sa kalibutan karon, daghan ang ingon og dili andam makig-away niini nga gubat. Ang gana sa unod ang nagdumala sa ilang mga kinabuhi, ug ang unod mipugong sa ilang mga espiritu.
Kining batan-ong babaye anaa sa dalan nga makapahimo sa iyang espiritu nga mosanta sa unod. Gisugdan niya ang usa ka pakiggubat ug determinado siya nga modaug.
“Panaggawi Kamo diha sa Espiritu”
Sa akong pagbiya sa stake nianang adlawa, mihangyo ko sa presidente sa stake nga hatagan ko og makontak nga impormasyon niadtong akong nahimamat nianang semanaha aron ako silang maawhag sa pagpadayon sa dalan sa ebanghelyo ug hinumduman ang mga pasalig nga ilang gihimo.
Ang batan-ong sister nagpadayon sa pag-uswag ug paspas nga mibuhat sa ingon. Pinaagi sa iyang hugot nga pagtuo, siya misugod sa “panaggawi diha sa Espiritu” ug “nangabuhi diha sa Espiritu” (Mga Taga-Galacia 5:16, 25). Mipadayon siya sa pakigkomunikasyon ug misugid kanako kabahin sa dagkong mga hagit nga sukad iyang nabuntog ug gisagubang. Nahimo siyang maayong higala sa among pamilya, ug kami nakakita sa kalig-on sa iyang espiritu samtang siya nagpaduol sa Manluluwas.
Karon natagamtam na niya ang mga panalangin sa templo, nakaserbisyo isip ordinance worker, ug midan-ag ang espirituhanong mga gasa sa gugmang putli ug kaayo. Sukad niadto naminyo siya sa usa ka takus nga batan-ong lalaki diha sa templo.
Ang espirituhanon klaro nga nakabuntog sa temporal diha niining batan-ong babaye. Among nakita ang iyang kasingkasing nga nahimong putli, ug siya “wala nay hilig sa pagbuhat og dautan, apan sa pagbuhat og maayo sa kanunay” (Mosiah 5:2).
Tingali ang kahibalo sa Ginoo sa kahalangdon sa iyang kalag mao ang hinungdan sa pag-aghat nga akong nadawat nianang adlawa. Kana nga pag-aghat mipanalangin kanako nga makakita sa gahum sa Langitnong Amahan ug grasya nga nakita diha sa iyang kinabuhi.
Kitang tanan adunay responsibilidad sa pagtabang sa atong mga kaigsoonan nga dili kaayo aktibo, ug kitang tanan mahimong aghaton sa paagi nga makapanalangin kanila. Samtang kita magpuyo nga takus sa Espiritu ug magtinguha sa tabang sa Ginoo, Siya mopanalangin sa atong mga paningkamot sa “pagdala sa Iyang nawala nga karnero balik ngadto sa panon” (“Dear to the Heart of the Shepherd,” Himno, nu. 221; tan-awa usab sa Alma 26:4).