Fas Presidensi Mesej, Julae 2017
Praes blong Mekem Gud blong Stap Strong
Taem mi wan yangfala man, mi bin givim seves insaed long Jos olsem wan kaonsela blong wan waes distrik presiden. Oltaem nomo, hem i stap traem blong tijim mi. Mi tingbaot advaes we hem i bin givim long mi long wan taem: “Taem yu mitim wan man, mo yu tritim olgeta olsem se oli stap long bigfala trabol, bae kolosap evri taem bae yu raet.” Long tetaem ia, mi bin ting se hem i no luk gud saed blong ol samting. Naoia, moa long 50 yia afta, mi save luk hamas hem i bin andastanem gud wol mo laef.
Yumi evriwan i gat ol tes we yumi fesem—long sam taem, ol tes we oli had tumas. Yumi save se Lod i letem yu blong gotru long ol tes blong save smutum yumi mo mekem fasin blong yumi i stret evriwan blong yumi save stap wetem Hem blong oltaem.
Lod i tijim Profet Josef Smit long Libeti Kalabus se praes blong stap strong long ol tes blong hem bae i helpem hem bigwan blong kwalifae from laef we i no save finis.
“God i promesem pis long sol blong hem mo talem long hem se ol samting we i stap kam agensem hem mo ol hadtaem blong hem bae oli blong smol taem nomo.
“Mo afta, sapos yu mekem gud blong stap strong, God bae i leftemap nem blong yu long heven; mo bae yu win ova long evri enemi blong yu” (luk long D&C 121:7–8).
I gat fulap samting we oli stap kam kilim yumi long laef we i mekem se i had tumas blong stap mekem gud blong stap strong. I save olsem long wan famli we i stap dipen long ol aelan kaekae long taem we i no gat ren. Bae oli save askem olgetawan: “?Bae mi wet kasem wetaem?” I save olsem long wan yut we i mas stanap agensem bigfala hip blong ol doti mo temtesen we i stap kam antap. I save olsem long wan yang man we i stap traehad blong skul gud o kasem trening we hem i nidim blong kasem wan wok blong sapotem waef mo famli. I save olsem long wan we i no save faenem wan wok, o i lusum wok, mo wan nara wok from bisnis i brok daon. I save olsem long olgeta we oli fesem helt we i stap godaon mo paoa long bodi i godaon, we i kam eli o let long laef; hemia long olgeta o olgeta we oli lavem.
Be wan God we i gat lav i no putum ol kaen tes ia jes blong luk se yumi save gotru long hadtaem, be i blong luk sapos yumi save mekem gud blong stap strong tru long olgeta, mo long wei ia, blong Hem i smutum gud fasin blong yumi.
Fas Presidensi i tijim Elda Parli P. Prat (1807–57) taem oli bin jes singaotem hem i kam niufala memba blong Kworom blong Olgeta Twelef Aposol: “Yu kam joenem wan wok we i nidim ful tingting blong yu; … blong oli smutum gud yu. … Bambae yu mas stap strong tru long fulap hadwok, fulap wok, mo plante samting we bae yu sakrifaes long olgeta blong yu save kam smut. … Papa blong yumi long Heven i askem hemia; ples blong wok i blong Hem; wok i blong Hem; mo bambae Hem i mekem yu stap glad mo bambae i leftemap yu.”1
Long buk blong Hibrus, Pol i stap tokbaot frut blong mekem gud blong stap strong: “Yumi save finis,se sapos God i stretem yumi, bambae samting ia i no save mekem yumi harem gud, i mas mekem we yumi harem nogud. Be biaen, bambae yumi save kasem frut blong hem, we yumi gat pis, from we laef blong yumi i stret gud long fes blong God” (Hibrus 12:11).
Ol tes mo ol hadtaem blong yumi oli givim yumi janis blong lan mo gro, mo oli save jenisim tu tru fasin blong yumi. Sapos yumi save tanem yumi long Sevya long ol bigfala hadtaem, sol blong yumi bae Hem i smutum gud taem yumi stap stap strong.
Taswe, fas samting blong tingbaot hem i blong prea oltaem (luk long D&C 10:5; Alma 34:19–29).
Nambatu samting i blong gohed oltaem blong stap obei long ol komanmen—nomata wanem samting i kam agens, nomata wanem temtesen, o noes raon long yumi (luk long Mosaea 4:30).
Nambatri impoten samting blong mekem i blong givim seves long Lod (luk long D&C 4:2; 20:31).
Long seves blong Masta, yumi kam blong save mo lavem Hem. Bae yumi mekem olsem sapos yumi gogohed long prea mo fetful seves, sapos yumi luksave han blong Sevya mo paoa blong Tabu Spirit insaed long laef blong yumiwan. Plante long yumi oli gat wan taem blong givim seves olsem, mo oli bin filim Spirit i stap olsem kompanion blong olgeta. Sapos yu tingting i gobak long taem ia, bae yufala i tingbaot se i bin gat ol jenis oli hapen insaed long yu. Temtesen blong mekem nogud samting, i luk olsem we i stap go daon. Tingting blong wantem mekem gud samting i kam antap. Olgeta we oli bin save gud yu mo lavem yu, bae oli talem: “Yu kam moa kaen mo save wet longtaem moa. Yu no semmak olsem bifo.”
Yu no semfala man o woman. Yu bin jenis tru long Atonmen blong Jisas Kraes from se yu bin dipen long Hem long taem blong tes blong yu.
Mi promesem yu se Lod bae i kam helpem yu long ol tes blong yu sapos yu lukaotem mo wok blong Hem, mo blong sol blong yu bae i kam smut long semtaem. Mi jalenjem yu blong putum tras blong yu long Hem long evri samting we oli stap kam agensem yu.
Mi save se God Papa i stap laef mo Hem i stap harem mo stap ansarem ol evri prea blong yumi. Mi save se Pikinini blong Hem, Jisas Kraes, i bin pem praes blong evriwan long ol sin blong yumi mo Hem i wantem yumi kam long Hem. Mi save se Papa mo Pikinini, Tufala i stap lukaot gud long yumi mo Tufala i rere long wan wei blong yumi stap mekem gud blong stap strong mo blong yumi gohom bakegen.
© 2017 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/17. Oli letem translesen: 6/17. Translesen blong First Presidency Message, July 2017. Bislama. 97927 852