Yut
Taem Fren blong Mi I Ded
Hem we i raet i stap long Yuta, YSA.
Long taem mi stap go long sekendri skul, fren blong mi i gat sik long bren, mo i ded long nekis dei. Nomata we mi wan memba blong Jos, be mi bin faenem i had. Ful laef blong mi, oli bin tijim mi se mi save tanem mi i go long Papa long Heven mo Sevya blong askem eni samting, be mi neva gotru long wan samting olsem bifo.
Mi bin krae blong plante aoa, mi traem faenem wan samting—eni samting—we i givim pis long mi. Naet afta we hem i ded, mi openem hymbuk. Taem mi stap tantanem ol pej, mi foldaon long “Abide with Me; ’Tis Eventide” (Stap Wetem Mi long Tetaem Ia) (Hymns, no. 165). Nambatri ves i fas long tingting blong mi:
Stap wetem mi, long tetaem ia,
Naet ia bae mi stap miwan
Sapos mi no save toktok wetem Yu,
Mo bae mi no save faenem laet blong mi.
Tudak blong wol ia, mi fraet long hem,
Se bae i stap long hom blong mi.
O Sevya, Stap tedei long naet wetem mi;
Luk, tetaem ia nomo.
Ves ia i fulumap mi wetem pis. Mi bin save long tetaem ia se, Sevya i save stap long naet ia wetem mi, be tu, se Hem i save stret wanem nao filing blong mi. Mi save se lav we mi bin filim tru long hym ia, i no kasem mi truaot long naet ia, be tu, i bin helpem mi tru long fulap nara tes we mi bin stap strong long olgeta.