Feruriraʼa ia Iesu
Tē ora nei te ta’ata pāpaʻi i California, Marite.
’Ua ʼoaʼoa roa ʼo Mia. Teie tōna tere mātāmua i te fare pureraʼa ! ’Ua parau te mau misiōnare i tōna ʼutuāfare nō niʼa i teie ʼēkālesia. ’Ua faʼaoti rātou i te haere atu.
’Ua hiʼohiʼo haere Mia. ’Ua ʼite ʼoia i te hōʼē ’ahu ’uo’uo i niʼa i te hōʼē ’īri ’āmuraʼa māʼa. Tē vai nei te tahi mea i raro aʼe i te reira.
« E aha tō raro aʼe i taua ’ahu ra ? » ’Ua ani Mia i te hōʼē ʼo te mau misiōnare.
’Ua ʼata te tuahine Hanson. « ʼO te ʼōroʼa ».
Te ’ōro’a. E parau rahi te reira. ’Ua faʼaroʼo Mia i te mau misiōnare i te parauraʼa ia māmā ’e ia pāpā nō niʼa i te reira. ’Aita rā ʼoia i pāpū e aha te reira.
’Ua hīmene te mau taʼata atoʼa i te hōʼē hīmene. ’Ua tātara e piti taʼata i te ahu ’uo’uo. Tē vai nei e piti fāriʼi faraoa i raro aʼe. ’Ua hiʼo Mia ia rāua i te ʼōfati-huʼahuʼa-raʼa i te faraoa.
I muri aʼe i te hīmene ’ua faʼahiti te hōʼē taʼata i te hōʼē pure. ’Ua ʼōpere te tahi atu mau taʼata i te faraoa nā te mau taʼata atoʼa.
’Ua parauriʼiriʼi atu te tuahine Garcia, « e tauturu te faraoa ia tātou ’ia haʼamanaʼo i te tino ʼo Iesu ».
’Ua rave Mia i te hōʼē tāpū faraoa na’ina’i. ’Ua feruri ʼoia ia Iesu i te tiʼaraʼa mai i mua iāna.
I muri mai ʼo te tahi tei pure. ’Ua ʼōpere te mau taʼata i te mau fa’ariʼi ’e te mau hāpaina pape naʼinaʼi.
’Ua parauriʼiriʼi atu te tuahine Garcia, « e tauturu te pape ia tātou ’ia haʼamanaʼo i te toto ʼo Iesu ». « ’Ua pohe ʼOia nō tātou nō te mea ’ua here ʼOia ia tātou ».
’Ua rave Mia i te hōʼē hāpaina pape. ’Ua feruri ʼoia i te huru here ʼo Iesu iāna. E au ra te tauahi mai ra ʼOia iāna.
I muri iho ’ua hōroʼa te tuahine Hanson ia Mia i te hōʼē hōhoʼa naʼinaʼi nō Iesu. « E ʼamu tātou i te faraoa ’e e inu tātou i te pape nō te haʼamanaʼo ia Iesu ’e nō te fafau ’ia peʼe Iāna ». ’Ua ʼataʼata ʼoia. « E aha tō ʼoe manaʼo nō ni’a i te ’ōroʼa ? »
’Ua hiʼo Mia i te hōhoʼa ’o Iesu. ’Ua haʼamanaʼo ʼoia i te manaʼo māhanahana tāna i ʼite. ’Ua ʼataʼata ʼoia. « E mea faʼahiahia ! ’Ua here au ia Iesu ».