Andrei ’e te parau ʼino
Tē ora nei te ta’ata pāpa’i i Utaha, Marite.
« I’ll try to repent, to do better, to pray » (Children’s Songbook, 98).
« Tē manaʼo nei ’oe ē e mea maitaʼi aʼe ’oe i te mau taʼata atoʼa nō te mea ’aita ’oe e parau ʼino nei », ’ua parau Nikolai i te taime faʼafaʼaearaʼa.
« E ere i te parau mau », ’ua parau aʼera Andrei.
« Nō te aha ïa ’oe e ’ore ai e parau i te hōʼē parau ʼino ? Hōʼē noa aʼe ? E’ita te reira e ha’apohe ia ’oe. Tē parau ʼino nei te mau taʼata atoʼa ».
’Ua haʼapeʼe ihora Andrei i te tāpono. « ’Aita vau e hinaʼaro ’ia nā reira ».
’Ua ʼite Andrei e mea hape te parau-’ino-raʼa e nā te reira e faʼaāteʼa atu i te Vārua Maitaʼi. ’Ua hinaʼaro Andrei i te Vārua Maitaʼi i piha’i iho iāna. Nō reira ʼoia i ʼore ai e parau ’ino.
E mea ʼāpī Andrei i te fare haʼapiʼiraʼa, ’e e tae noa atu i teie taime, o Nikolai anaʼe i roto i tāna piha ono tei hinaʼaro ’ia riro ’ei hoa nōna. ’Ua mārō rā o Nikolai iāna ’ia parau ’ino i te mau mahana atoʼa. ’E te rahi noa atura tō Andrei rohirohiraʼa i te mau mahana atoʼa i te paraura’a ’aita. ’Ua riʼariʼa atoʼa o Andrei ē e faʼaea Nikolai i te riro ’ei hoa nōna, e riro ïa ʼoia i te faʼaea ’ōna anaʼe.
« ’A parau hōʼē noa iho parau ’ino », ’ua parau Nikolai i muri aʼe i te haʼapiʼiraʼa. « E’ita vau e haʼapeʼapeʼa faʼahou ia ’oe ».
I te pae hopeʼa nō tōna rohirohi i te mārōra’a ’ua parau Andrei i te hōʼē parau ’ino—hōʼē e ʼere rā i te mea ’ino roa.
’Ua fāriʼi Nikolai. « E mea maitaʼi, ’ua riro ’oe i teie nei ’ei hōʼē ʼo mātou ».
I muri iho i te reira, ’ua paraparau atoʼa te tahi atu mau hoa o Nikolai ia Andrei. ’Ua tāmāʼa rātou e ona ’e ’ua ha’uti i te popo e ’ōna i te taime faʼafaʼaearaʼa. ’Ua riro rā te tomoraʼa i roto i te pupu ʼo te mau hoa ’o Nikolai mai te taʼahiraʼa i roto i te one paruparu. ’Ia rahi tōna ’āmuiraʼa atu ia rātou, ’ua rahi atoʼa tō Andrei paraparauraʼa ’e te riroraʼa mai ia rātou te huru. ’E ’ua tuhi pāʼātoʼa rātou. E mea huru rahi. ’Ua ʼata ’e ’ua tuhi rātou te tahi i te tahi. ’Ua parau rātou i te mau parau ’ino nō niʼa i tō rātou mau ’orometua haʼapiʼi. ’Ua riri rātou ’e ’ua rahi tō rātou ʼiriā. ’Ua haʼamata mārū noa o Andrei i te riri pinepine ’e ’ua ’imi i te mau tumu e rave rahi nō te tuhi.
I te hōʼē pō ’ua haere ’ē atu ʼo māmā ’e ’o pāpā, ’e ’ua tupu te mārōraraʼa i rotopū ia Andrei ’e tōna tuaʼana tuahine nō niʼa i te hōhoʼa e mātaʼitaʼi. Hou Andrei ’a feruri ai i te reira, ’ua mātara mai te hōʼē parau ’ino mai roto mai i tōna vaha.
’Ua hiʼo māere roa Katya. « E faʼaʼite au ia māmā ».
’Ua horo atu Andrei i tōna piha taoto ’e ’ua tūpaʼi i te ʼōpani. E aha tō te mau taʼata atoʼa ? Nō te aha rātou e faʼariri ai iāna i te mau taime atoʼa ? I tō tōna mau metua hoʼiraʼa mai i te fare, ’ua ’īriti Andrei i tōna ’ōpani ’e ’ua faʼaroʼo ia Katya i te parauraʼa, « māmā, ’ua tuhi Andrei iāʼu ».
« E aha ? » ’Ua māere roa māmā. « E’ita roa atu ʼo Andrei e tuhi ».
’Ua tāpiri Andrei i te ’ōpani ’e ’ua marua atu i roto i tōna roʼi. ’Ua feruri ʼoia i tōna huru tauiraʼa mai te taime ’a haʼamata ai ʼoia i te tuhi. E mea maoro teie nei ’aita ʼoia i ’ite i te mana o te Vārua Maitaʼi.
’Ua tūturi Andrei i piha’i iho i tōna roʼi ’e ’ua pure. « E te Metua Here i te Ao ra, tē tātarahapa nei au nō tōʼu ’iriā ’e tōʼu riri. Tē tātarahapa nei au nō tōu haʼamātaraʼa i te tuhi. E haʼamata vau i te riro ’ei taʼata maitaʼi aʼe ».
’A pure ai ʼoia, ’ua ’ī te ʼāʼau ʼo Andrei i te māhanahana. Nō te taime mātāmua ’a haʼamata ai ʼoia i te tuhi, ’ua ʼite ʼoia i te ʼoaʼoa mau. ’Ua ʼite ʼoia e ’ua here te Atua iāna, ’e ’ua nehenehe iāna ’ia ʼite i te Vārua Maitaʼi. ’Ua ʼite ʼoia ’e ’ua faʼaʼorehia tāna hara ’e ’ua ʼite ʼoia ē ’ua nehenehe iāna ’ia taui ’e ’ia riro ’ei taʼata maitaʼi aʼe.
I muri aʼe i tāna pure, ’ua parau ʼoia ia māmā i te parau mau ’e ’ua tātarahapa ʼoia i mua ia Katya. ’Ua ʼoaʼoa aʼe o Andrei i muri iho. E ʼoaʼoa tei tupu nā roto i te tātarahaparaʼa.
I te mahana i muri atu i te fare haʼapiʼiraʼa, ’aita ’o Andrei i tāmāʼa i piha’i iho i te pupu ’a Nikolai. ’Ua pārahi rā ʼoia i piha’i iho i te tahi mau pīahi tei ʼore i matauhia e ’āna. E tītauhia te taime, ’ua ʼite rā Andrei e noaʼa iāna te mau hoa maitaʼi ’e te ʼoaʼoa o te ʼore e tuhi. Mai iāna iho te huru.