O O O Fesili e Lima e FESILI ai Pe a Lagona Le Le Taliina o Tatalo
E alala le tusitala i Niu Ioka, ISA.
Na i ai se taimi na e faia ai se tatalo ma faatalitali mo se tali na foliga mai e lei oo mai lava? E le na o oe—ae ia e iloa e faafofoga moni mai lava le Tama Faalelagi i au tatalo. E taua le manatua e le oo mai ni tali i le taimi po o le auala e te manao ai ma e silafia lava e lo tatou Tama o i le Lagi le mea sili ona lelei.
O nisi nei o fesili e mafai ona e fesili ifo ia te oe lava pe a o e tauivi ia maua ni tali o se tatalo:
1 Ua ou sauni e faatino se tali?
O le tatalo ma le faatuatua o lona uiga o le saunia e faatino le tali e te maua—pe o le tali lea sa e faamoemoe i ai pe leai. Na maua e le Perofeta o Iosefa Samita le faatonuga lenei: “Ia saunia lou loto e talia ma usiusitai i faatonuga o le a Ou tuu atu ia te oe; ona o i latou uma o e e faaali atu ia te i latou lenei tulafono e ao ina usiusitai i lea lava” (MF&F 132:3). Afai sa e tatalo pe tatau pe le tatau foi ona e auai i lena pati, mata e te usitaia po o le a lava [le tali e aumai] (e tusa lava po o le tali o le leai)?
2 Na ou faia mea uma i le malosi o ia te au?
Faapea la e te lei suesue mo lau suega o le faasaienisi ona sa tou tafafao ma au uo. Mata o le a fesoasoani mai le Tama Faalelagi ia te oe e faapasi lau suega pe afai e na o lou ole atu mo Lana fesoasoani?
E tatau ona faia la tatou vaega ia maua ai faamanuiaga. O le suesueina la mo se suega, e mafai ona e tatalo atu mo le malosi ina ia lelei au taumafaiga e tusa ai ma au sauniuniga.
Mafaufau i le faataitaiga a atalii o Mosaea, o e na faamanuiaina i la latou galuega faafaifeautalai ina ua latou tuuina atu i ai se taumafaiga faaopoopo: “Sa latou tuu atu i latou lava i le tatalo tele, ma le anapogi; o lea na i ai ai ia i latou le agaga o valoaga, ma le agaga o faaaliga, ma a latou aoao atu, sa latou aoao atu ma le mana ma le pule mai le Atua” (Alema 17:3).
3 Na ou le amanaiaina ea le tali?
E faafofoga pea lava le Tama Faalelagi ia te oe, ma atonu ua uma ona Ia tali mai i lau tatalo! E pei ona tau mai i le Mataupu Faavae ma Feagaiga 6:14, “O le tele o taimi na e ole mai ai na e maua ai faatonuga mai lo’u Agaga.” E mafai ona e tatalo mo mata faaleagaga ina ia iloa le tali, aua o nisi taimi e tali mai ai tatalo i ni auala le mailoa pe lei fuafuaina—e pei o le ala mai i galuega a isi.
Ma le isi mea, aua nei galo ona faaaluina se taimi e faalogo ai. Na faamatala mai e Elder Richard G. Scott (1928–2015) o le Korama a Aposetolo e Toasefululua faapea: “O tali [a le Tama Faalelagi] o le a seasea lava oo mai ao e i ai i ou tulivae ma tatalo. … Ae, o le a Ia uunaia oe i taimi filemu pe a mafai e le Agaga ona pa’i lelei atu i lou mafaufau ma lou loto” (“Faaaogaina o le Meaalofa Faalelagi o le Tatalo,” Liahona, Me 2007, 9).
4 O amiotonu ea ou manaoga?
Afai na e ole atu mo se mea e le aoga mo oe, e foliga mai e lei taliaina lau talosaga. Na aoao mai le Faaola “e tatau ai ona [tatou] tatalo atu pea i le Tama i le igoa o [Iesu Keriso]” (3 Nifae 18:19), lea e fautua mai ai ia tatou tatalo atu mo mea e sao ina ia tuuina mai. Fesili ifo ia te oe lava, “O a ni lagona o le Faaola e uiga i ou manaoga?” Afai o tamau ou moomooga i le manatu faapitoa po o nisi lava tulaga o le amioletonu, tatalo ina ia i ai se suiga o le loto ma ia iloa po o le a le mea o finagalo le Faaola e te ole atu ai.
5 O se taimi sao lea?
E tatau ona sao mea tatou te ole atu ai, ae e tatau foi ona sao le taimi. E i ai se fuafuaga maoae a le Tama Faalelagi ua faapolopolo mo i tatou, ae o nisi taimi ua i ai se eseesega laititiiti o tatou taimi faatulagaina mai ia te Ia. “O A’u upu e mautinoa ma e le iuvale. … Peitai o le a oo mai mea uma i lo latou taimi” (MF&F 64:31–32). Atonu e ono faauigaina faapea o le faatalitali laitiiti mo lena manua ina ia pe po o le toe maua o se manu tausi na leiloa, ma o nisi taimi e aofia i le taimi a le Alii le isi olaga—ae ia e mautinoa o le a Ia faafofoga ma fesoasoani atu ia te oe i le aluga o le ala.
Atonu e faigata le onosai, aemaise lava pe a faigata ona iloa le tali o lau tatalo. Ae ao e suesue, e mafai ona e maua le lototele i le iloaina o le a e mauaina pea tali e te manaomia pe a e saili ma le faamoemoega moni: “E saili mai outou ia te au, tou te maua foi, pe a outou saili mai ia te au ma outou loto atoa” (Ieremia 29:13). ◼