សំឡេងពួកបរិសុទ្ធថ្ងៃចុងក្រោយ
ឥឡូវនេះ តើមានឈ្មោះណាខ្លះដែលត្រៀមរួចជាស្រេច ?
រចនារូបភាពដោយ រីឆាដ មៀ
ថ្ងៃអាទិត្យមួយបន្ទាប់ពីសម័យប្រជុំចុងក្រោយនៃសន្និសីទទូទៅ ខ្ញុំមានអារម្មណ៍បំផុសគំនិតយ៉ាងខ្លាំង ឲ្យចុះឈ្មោះចូលគណនីកម្មវិធីស្រាវជ្រាវពង្សប្រវត្តិរបស់ខ្ញុំ ហើយធ្វើកិច្ចការពង្សប្រវត្តិមួយចំនួន ។ ខ្ញុំមានចិត្តស្ទាក់ស្ទើរ ក្នុងការធ្វើកិច្ចការពង្សប្រវត្តិរបស់ខ្ញុំ ដោយសារខ្ញុំព្យាយាមធ្វើវាច្រើនដងកាលពីពេលមុន តែមិនសូវមានជោគជ័យសោះ ។ គ្រួសាររបស់ខ្ញុំបានធ្វើកិច្ចការពង្សប្រវត្តិនេះជាច្រើនមកហើយ ហើយខ្ញុំបានគិតក្នុងចិត្តថា គ្មានកិច្ចការអ្វីទៀតដែលនៅសល់សម្រាប់ខ្ញុំធ្វើឡើយ ។
ខ្ញុំបានអង្គុយចុះ ហើយដកដង្ហើមធំដែលបង្ហាញពីភាពស្មុគស្មាញ នៅពេលខ្ញុំបានមើលឃើញកន្លែងមួយដែលគ្មានព័ត៌មាន ដែលខ្ញុំបានព្យាយាមធ្វើអស់ជាច្រើនឆ្នាំមក ដោយសង្ឃឹមថាថ្ងៃនេះគឺជាវេលាចុងក្រោយដែលខ្ញុំអាចរកបានព័ត៌មានមួយចំនួន ។ ខ្ញុំបានចាប់ផ្តើមស្រាវជ្រាវដូចធម្មតា តាមរយៈកំណត់ត្រាជំរឿន អាពាហ៍ពិពាហ៍ សំបុត្រកំណើត ហើយមួយម៉ោងក្រោយមកខ្ញុំពុំបានរកឃើញព័ត៌មានអ្វីឡើយ ។ បន្ទាប់មកព្រះវិញ្ញាណដែលបានខ្សឹបប្រាប់ខ្ញុំពេញមួយចុងសប្តាហ៍អំឡុងពេលសម័យប្រជុំសន្និសីទនោះ បានបំផុសគំនិតខ្ញុំឲ្យអធិស្ឋាន ហើយរកមើលថា ឥឡូវនេះ តើមានឈ្មោះណាខ្លះដែលត្រៀមរួចជាស្រេច ដើម្បីឲ្យកិច្ចការរបស់ពួកគេចប់សព្វគ្រប់នោះ ។
នៅពេលខ្ញុំអធិស្ឋានចប់ ខ្ញុំបានត្រឡប់ទៅមើលឈ្មោះរបស់ខ្ញុំវិញ ហើយបន្តមើលតាមខ្សែស្រឡាយនោះ ។ ខ្ញុំទទួលអារម្មណ៍យ៉ាងជាក់លាក់ពីព្រះវិញ្ញាណដឹកនាំខ្ញុំ ឲ្យមើលពីខ្សែស្រឡាយមួយទៅខ្សែស្រឡាយមួយទៀត រហូតដល់ត្រឹមខាងជីតារបស់ខ្ញុំ ។ មួយម៉ោងជាងក្រោយមក ខ្ញុំបានទទួលអារម្មណ៍នៃព្រះវិញ្ញាណមានពេញក្នុងបន្ទប់នោះ ហើយខ្ញុំបានរកឃើញឈ្មោះប្រាំមួយ ដើម្បីយកទៅព្រះវិហារបរិសុទ្ធ ។ នៅពេលខ្ញុំបញ្ចប់ការស្នើសុំឈ្មោះទាំងនោះសម្រាប់ព្រះវិហារបរិសុទ្ធ ខ្ញុំបានក្រឡេកមើលកំណត់ត្រាមួយចំនួនដែលខ្ញុំបានទទួលព័ត៌មាននោះ ។ ខ្ញុំបានយំ ហើយចិត្តខ្ញុំពេញដោយអំណរ—ព័ត៌មាននោះបានមកពីអ្នកធ្វើលិបិក្រម ដែលបានស្ម័គ្រចិត្តចំណាយពេលវេលារបស់ពួកគេ ដើម្បីបញ្ចូលកំណត់ត្រានានាសម្រាប់ជីដូនជីតារបស់ខ្ញុំ ។ ខ្ញុំបានធ្វើលិបិក្រមឈ្មោះសម្រាប់មនុស្សដទៃទៀត អស់មួយម៉ោងទៀត ដោយអំណរគុណ ។
នាថ្ងៃនោះទីបន្ទាល់របស់ខ្ញុំបានកើនឡើង ដោយអំណរគុណចំពោះហេតុផលពីរយ៉ាង ។ ទីមួយ អំឡុងពេលសន្និសីទទូទៅ ព្រះវិញ្ញាណបានដឹកនាំខ្ញុំឲ្យធ្វើកិច្ចការពង្សប្រវត្តិ ហើយស្គាល់ឈ្មោះដែលត្រូវស្វែងរក ។ ទីពីរ អរគុណដល់សមាជិកសាសនាចក្រនៅទូទាំងពិភពលោក ដែលធ្វើលិបិក្រមឈ្មោះ ប្រយោជន៍ឲ្យមនុស្សដូចជាខ្ញុំ អាចរកឈ្មោះដូនតារបស់យើងបានយ៉ាងច្បាស់លាស់ និង លឿន ហើយពន្លឿនកិច្ចការរបស់ពួកគាត់ ។ ខ្ញុំមានទីបន្ទាល់យ៉ាងជាក់ច្បាស់ និង ដ៏មានឥទ្ធិពលអំពីកិច្ចការរបស់ព្រះ ដែលបានផ្សព្វផ្សាយចេញទៅទូទាំងពិភពលោក ។