O Malamalamaaga mai le Mataupu Faavae ma Feagaiga e uiga i le Tama ma le Alo

Saunia e Norman W. Gardner

Seminare ma Inisitituti

O lenei tusi o faaaliga, ua faaali mai upumoni sa leiloloa e uiga i le Aiga Atua ma le auala e mafai ai ona tatou toe nonofo faatasi ma le Faaola ma le Tama Faalelagi.

Ata

First Vision

Uluai Faaaliga, saunia e Walter Rane; background © iStock/Thinkstock

O le Toefuataiga o le talalelei ua tuuina mai i le lalolagi le malamalama sili atu e uiga i le natura o le Aiga Atua ma o Latou faamoemoega. Faatasi ai ma lenei malamalama, e faatupulaia lo tatou faatuatua ia i latou ma e faateleina lo tatou manao e tausi a latou poloaiga.

Aemaise lava, e fesoasoani le Mataupu Faavae ma Feagaiga ia i tatou e aoao e uiga ia Iesu Keriso aua e na te aoaoina mai upumoni mamana e faatatau i “Lona paia, Lona mamalu, Lona atoatoa, Lona alofa, ma Lona mana togiola” (faatomuaga i le Mataupu Faavae ma Feagaiga). O lenei tusi o faaaliga o aso nei o loo aofia ai le valaaulia a le Alii e “aoao ia te au, ma faalogo mai i au upu” (MF&F 19:23). E na te mafai ona faalolotoina lo tatou malamalamaaga ia te Ia, lo tatou sootaga ia te Ia, o mea Na ia faia mo lo tatou togiolaina, ma mea Na te faamoemoe mai ia i tatou.

I le Mataupu Faavae ma Feagaiga, e mafai ona tatou faalogo i le siufofoga a Iesu Keriso.

Sa maua e Iosefa Samita le tele o faaaliga mai le Faaola.

O le Mataupu Faavae ma Feagaiga e le o se tusitusiga paia anamua ae o loo i ai faaaliga na tuuina atu ia Iosefa Samita ma ana suli i lo tatou olaga o ona po nei. Ua faalogoina le siufofoga a Iesu Keriso o loo fetalai e fai ma sui o le Tama.¹ O le siufofoga muamua a le Alii o Iesu Keriso ua faatele ona faamauina soo i le Mataupu Faavae ma Feagaiga i lo le Feagaiga Fou, Tusi a Mamona, ma le Penina Tautele tuufaatasi.²

MF&F 18:33–35 “Ma o Au, o Iesu Keriso, lo outou Alii ma lo outou Atua, ua tautala atu i nei mea. O nei upu ua le mai tagata … , ae ua mai ia te au; … o lou leo lea o loo tautala atu ia upu ia te outou.”

O loo i ai i le Mataupu Faavae ma Feagaiga ni tala o i latou na vaai i le Atua

Sa vaai Iosefa Samita ma Oliva Kaotui ia Iesu Keriso i le Malumalu i Katelani.

O se taunuuga o le Muai Faaaliga i le 1820, sa maua ai e le tama o Iosefa Samita le malamalamaaga muamua o le i ai o le Tama ma le Alo. Ua faamaumauina e le Mataupu Faavae ma Feagaiga ni faataitaiga faaopoopo na vaaia e le Perofeta ma isi le Tama ma le Alo i ni faaaliga po o ni faailoaga faaletagata lava ia. O nei tala ua avea o ni molimau o aso nei mo i tatou e faapea, o loo soifua i laua ma o loo Laua taitaia le Toefuataiga o le talalelei.

MF&F 76:19–23 Sa vaaia le Tama ma le Alo i se faaaliga ia Fepuari 1832.
MF&F 137:1–3 Sa vaaia le Tama ma le Alo i se faaaliga ia Ianuari 1836.
MF&F 110:2–4 O le Ieova silisili, o Iesu Keriso, sa faaali mai ia Aperila 1836.

E fesoasoani le Mataupu Faavae ma Feagaiga ia i tatou e aoao e uiga i le Atua le Tama

A o fetogi i maa ina ia maliu ai, sa vaai Setefano i le Tama ma le Alo.

Sa aoao mai le Perofeta o Iosefa Samita: “A tatou malamalama i uiga o le Atua, ma le ala tatou te o mai ai ia te Ia, o le a amata ona Ia tatalaina mai le lagi ia i tatou. … A ua tatou saunia e o mai ia te Ia, ua Ia saunia foi e afio mai ia i tatou.”³ E fesoasoani le Mataupu Faavae ma Feagaiga ia i tatou e latalata atili i le Tama Faalelagi e ala i le aoaoina e uiga i Lona natura, uiga, ma faamoemoega.

MF&F 20:12, 17–18 O le Atua le Tama e faavavau ma e le mafeliuai.
MF&F 76:20, 23 O le Tama ma le Alo o ni peresona mavaevae.
MF&F 93:3–5 O le Tama ma le Alo e tasi i laua.
MF&F 130:22 Ua i ai i le Tama ma le Alo ni tino o aano ma ivi.
MF&F 138:3–4 E alofa le Tama Faalelagi i Lana fanau, o le a sa Ia auina mai ai Lona Alo e laveai tagata.

E fesoasoani le Mataupu Faavae ma Feagaiga ia i tatou e aoao e uiga ia Iesu Keriso

Sa talanoa Ieova (Iesu Keriso) ia Mose faafesagai.

O Iesu Keriso o le Ulumatua o fanau agaga uma a le Tama Faalelagi. I le muai olaga, sa maua e Iesu le malamalama ma le mana uma ma sa fai ma sui o le Tama i le avea ai o se Foafoa o lalolagi. E ala i Lona mana paia, o le Alii o Iesu Keriso o le puna o le malamalama ma le ola mo Ana foafoaga uma. Ua faamanino mai e le Mataupu Faavae ma Feagaiga le tele o Ana matafaioi i le fuafuaga a le Tama.

MF&F 93:21 O Iesu Keriso o le Ulumatua o fanau agaga uma a le Atua.
MF&F 38:1–3 Sa maua e Iesu Keriso le malamalama uma ma le mana a o lei foafoaina le lalolagi.
MF&F 76:24 Sa avea Iesu Keriso ma sui o le Tama i le avea ai o le Foafoa o lalolagi.
MF&F 88:6–13 O Iesu Keriso o le puna o le malamalama ma le ola mo Ana foafoaga uma.
MF&F 45:11; 136:21, 22 O Iesu Keriso o le Ieova silisili o le Feagaiga Tuai.
MF&F 43:34 O Iesu Keriso o le Faaola o le lalolagi.
MF&F 18:11–13; 20:21–25 Sa pagatia Iesu Keriso, sa faasatauroina, maliu, ma sa toe tu mai.
MF&F 29:10–12 Sa folafola mai Iesu Keriso e toe afio mai i le lalolagi ma le mana ma le mamalu.

E fesoasoani le Mataupu Faavae ma Feagaiga ia i tatou e aoao mea ua faamoemoe i ai le Tama ma le Alo mai ia i tatou

E ala i faaaliga faaonapo nei, e mafai ona tatou aoao pe faapefea ona avea atili e pei o le Tama ma le Alo.

E sili atu i lo seisi tusi o tusitusiga paia, e faamaninoina e le Mataupu Faavae ma Feagaiga po o le a le ola e faavavau: ia toe foi atu e nonofo faatasi ma le Tama ma le Alo, ma maua uma mea o loo i le Tama, ma avea e pei o i Laua. E na te tau mai foi ia i tatou le ala ua mafai ai e Iesu Keriso, e ala i Lana Togiola ona mafaia lenei mea ma mea e manaomia ona tatou faia e faataunuu ai mea e manaomia ua Ia faatulagaina. E faaopoopo i ai, tatou te aoao i le Mataupu Faavae ma Feagaiga le uiga o le mulimuli i faataitaiga a Iesu Keriso, talu ai, e pei o i tatou, sa lei maua e Iesu Keriso le atoatoa i le taimi muamua ae sa maua le alofa tunoa seia oo ina maua e Ia le mana uma ma le mamalu.

MF&F 1:32; 19:16–19; 58:42–43; 95:1–2 Ua ofoina mai e le Faaola le faamagaloga ia i latou e salamo.
MF&F 20:37, 41, 72–74; tagai foi 33:11 Ua valaaulia e le Aiga Atua i latou o e talitonu ia maua le papatisoga ma le Agaga Paia.
MF&F 84:19–21 E ala i sauniga o le Perisitua Mekisateko, ua faaali mai ai le mana o le amioatua.
MF&F 93:12–14, 16–17 Sa maua e Iesu Keriso le alofa tunoa mo le alofa tunoa seia oo ina Ia mauaina le atoatoa.
MF&F 20:30–31 E tuuina atu e le Faaola le alofa tunoa ia i latou o e alolofa ma auauna atu ia te Ia.
MF&F 35:2; 50:40–43 E mafai ona tatou tasi ma le Tama ma le Alo.
MF&F 93:19–20 E mafai ona tatou mauaina le mamalu ma le atoatoa a le Tama.

E tuuina mai e le Mataupu Faavae ma Feagaiga se mamanu mo le mauaina o le malamalama faaleagaga

E mafai e le suesue ma le tatalo ona tatala le malamalama faaleagaga.

E faaopoopo i le aoao atu ma le molimauina o le Tama ma le Alo, ua tuuina mai e le Mataupu Faavae ma Feagaiga se mamanu e maua ai le malamalama faaleagaga e uiga i sui uma o le Aiga Atua e ala i le fesoasoani a le Agaga Paia: suesue i afioga a le Alii, ole atu i le Tama Faalelagi mo le malamalamaaga, ma faatino le faatuatua ia Iesu Keriso e ala i le usitai i Ana poloaiga.

Ua folafola mai le malamalama ma le upumoni ia i latou o e ola e tusa ai ma afioga uma a le Alii. E taua le aoao o faamatalaga e uiga i le natura o le Aiga Atua ma o Latou faamoemoega. O lenei malamalama e mafai ona taitai atu i le sailiga filiga mo le malamalamaaga faaleagaga ma le talitonuga o le upumoni. O lenei malamalama e faamautu mo i tatou o silafia patino i tatou e le Tama Faalelagi ma Iesu Keriso, e La te alolofa ia i tatou, ma La te finagalo e faamanuia i tatou i le ola e faavavau.

MF&F 6:5; 76:5–10, 114–118 E finagalo le Tama Faalelagi ia i tatou ia ole atu mo le malamalama ma folafola mai e faasoaina mai.
MF&F 84:43–48 Ua aoao mai e le Tama i tatou pe a tatou gauai atu ma le filiga i Ana afioga.
MF&F 88:118 Saili le aoaoina e ala i le suesue ma e ala i le faatuatua.

Faaiuga

Sa faaailoa mai e Iosefa Samita ia uiga ma faamoemoega o le Tama ma le Alo.

E fesoasoani le Mataupu Faavae ma Feagaiga ia i tatou e latalata atili i le Tama Faalelagi ma Lona Alo Pele e Toatasi, o Iesu Keriso, e ala i le faaalia o o Latou uiga ma o Latou faamoemoega. Sa aoteleina e le Perofeta o Iosefa Samita le mafuaaga e mafai ai ona tatou faatuatua ma faalagolago i le Atua: “O fuafuaga a lo tatou Atua e maoae, o Lona alofa e le mafaatusalia, o Lona poto e faavavau, ma Lona mana e le gata; o le mea lea, e tatau ai i le Au Paia ona olioli ma fiafia, i le iloa ai ‘o lenei Atua, o lo tatou Atua lava’ (Salamo 48:14).”⁴