O Le Tusi o loo i Luga o le Fatatusi
Saunia e Elder Walter F. González
O Le Fitugafulu
“Saili, suesue, ma tatalo tauanau” (Tusipese a Tamaiti, 66).
E 12 ou tausaga ae ou faalogo i Le Ekalesia a Iesu Keriso o le Au Paia o Aso e Gata Ai. Sa ou feiloai i ni faifeautalai AAG e toalua i luga o le pasi. Sa la fai mai pe mafai ona la o mai e aoao lo’u aiga.
Sa tuu e faifeautalai ia i matou se kopi o le Tusi a Mamona ma se tamaitusi o le molimau a Iosefa Samita. O ou matua o ni tagata lelei tele. Ae sa lei auai i laua i le Ekalesia i lena taimi.
Sa i ai pea ia tusi e lua i luga o la matou fatatusi mo le tele o tausaga. Ona oo lea i se tasi aso ina ua 18 ou tausaga, sa ou sailiili ai i la matou fatatusi mo se tusi lelei e faitau. Sa ou pikiiina i luga le Tusi a Mamona ma faitau le mataupu muamua. Sa oo mai se lagona faapitoa ia te au ao ou faitau.
Sa ia te au se aafiaga tulaga ese lea na ou iloa ai e moni le tusi. Sa i ai i le Tusi a Mamona se savali faapitoa e uiga i le Togiola a Iesu Keriso. Sa ou aoao atili e uiga i lou lava olaga ma e uiga i faamanuiaga a le Tama Faalelagi.
Mulimuli ane, na ou aoao ai e ui lava sa na o le 14 tausaga o Iosefa Samita, ae sa ia lototoa e faitau tusitusiga paia ma fesili atu i le Tama Faalelagi po o fea o ekalesia e moni.
Mai lena taimi, sa ou mulimuli pea i faataitaiga a Iosefa Samita. Ou te faitau i tusitusiga paia ma fesili atu i le Tama Faalelagi mo se fesoasoani ma le taitaiga. O le tatalo ma le Tusi a Mamona o ni vaega taua tele ia o lou olaga
A i ai ni ou faafitauli, faitau le Tusi a Mamona ma tatalo. O le a e aoao atili e uiga i le talalelei ma maua tali e te manaomia, e pei lava o au. Manatua ou lagona pe a e faia.