Ol Kwestin mo Ansa
“Sam pipol i talem long mi se mi nidim blong gat ol fren we oli no serem ol standet blong mi blong mekem se hemia blong mi i kam strong moa. ?I tru ia?”
Long en, blong mekem ol standet blong yu oli kam antap, i kam taem yu stap lanem samting mo stap laef folem gospel blong Jisas Kraes, mo ol fren oli save helpem yu, o stopem yu blong mekem hemia. Ol fren oli save gat bigfala paoa blong lidim tingting blong yu—stat long wei we yu tingting, toktok, mo mekem samting kasem wanem kaen man o woman bae yu kam. Blong Ol Yut Oli Kam Strong i talem: “Jusum gud ol fren blong yu we oli sapotem ol valiu blong yu, blong mekem se yufala i save sapsapotem mo lefleftemap tingting blong yufala blong laef folem ol hae standet blong laef.” Ol kaen fren olsem, oli stap helpem yu blong laef folem gospel blong Jisas Kraes, kipim ol standet blong yu, mo kam wan man o woman we i gud moa.
Be, i no evri pipol we yu joen wetem we oli gat ol semmak standet olsem yu, o oli ol memba blong Jos. Hem i impoten blong stap wan fren long evriwan, mo blong tritim olgeta long wei we Sevya i wantem yu blong tritim olgeta—wetem lav mo wetem fasin we i kaen. Taem yu stap gohed blong laef folem ol standet blong yu, yu save stap olsem “wan gudfala eksampol long ol Kristin man, blong oli save folem fasin blong toktok blong yu, mo fasin blong yu we i stret, mo fasin blong bilif blong yu, mo fasin blong yu blong lavem ol man, mo fasin we yu stap mekem laef blong yu i klin gud” (Fas Timoti 4:12). Tru long eksampol blong yu, bambae oli luk se yu stap gat ol blesing taem yu stap laef folem ol standet we oli hae, mo yu save leftemap tingting blong olgeta blong mekem semmak.
Lukaotem blong Tabu Spirit i lidim yu—mo gat paoa long tingting blong tekem aksen folem ol kwaet toktok blong Hem—taem yu jusum gud ol fren mo traehad blong kam strong long ol standet blong yu.
Ol Tru Fren
Long fas yia blong mi long medel skul, mi stap fraet smol se bae mi no save faenem ol fren we oli respektem ol standet blong mi. Afta wan sot taem, mi kam gud fren wetem wan long klas, mo mi talem long boe ia se mi mi wan Momon. Hem i askem mi long saed blong hemia, mekem se mi givim hem wan kopi Blong Ol Yut Oli Kam Strong. Stat long dei ia, hem i stop blong stap swea long fored blong mi. Sapos ol fren blong yu oli ol tru fren, bambae oli respektem ol desisen blong yu mo bambae oli helpem yu blong holemtaet ol standet blong yu.
Kandela M., 13 yia, Buenos Aires, Ajentina
Folem Kaonsel blong Ol Profet
Samtaem i had blong stanap agensem temtesen sapos yumi stap folem ol fren we oli mekem ol nogud joes, o oli stap traem blong mekem yumi mekem ol nogud joes. Ol profet oli bin talem long yumi insaed long Blong Ol Yut Oli Kam Strong se ol fren “bambae oli lidim tingting blong yu long wei we yu tingting, mekem samting, mo bambae oli iven save lidim yu long wanem kaen man o woman we bae yu kam” ([2011]). Mi ting se yumi sapos blong gat ol fren we oli wantem respektem ol standet blong yumi mo iven soem intres blong luk se yumi mas holemtaet ol standet blong yumi.
Kalvin W., 16 yia, Arisona, YSA
Tingbaot Ol Standet blong Yu
Ol fren we oli no gat ol semfala standet olsem yumi, oli save mekem se yumi nomo strong mo daonem ol standet blong yumi. Taem mi muv i go long niufala skul blong mi, mi bin traem blong joenem ol narawan mo talem sam long ol samting we ol pipol raon long mi bae oli talem. Kolosap mi fogetem ol standet blong mi taem mi stap traem blong kam olsem evri narafalawan. Mi save se blong bildimap ol standeti blong yumi, yumi nidim ol fren we oli sapotem mo gat ol semfala standet. Mi glad tumas se mi bin faenem ol fren olsem, from se oli mekem mi stap tingbaot ol standet blong miwan.
Logan J. 15 yia, Yuta, YSA
Kipim Standet blong Yu I Hae I Stap
Olgeta fren wetem ol defren kaen standet oli no oltaem mekem yu strong long standet blong yu, be taem yu fren wetem olgeta, yu save givim olgeta wan gudfaa eksampol blong folem. Taem yu gat ol fren we oli serem ol semfala bilif, i save leftemap tingting blong yu blong kipim standet blong yu i hae i stap, mo i save helpem yu blong stanap from samting we i raet.
Waren S., 14 yia, Oregon, YSA
Ol Gudfala Fren Oli Ol Blesing
Sapos ol fren oli no gat ol semfala standet olsem yumi, i save mekem se i had moa blong stap strong long ol standet blong yuwan. Taem mi stap ridim Blong Ol Yut Oli Kam Strong, oltaem i helpem mi blong jusum ol gudfala fren we oli gat respek long mi. Naoia, mi stap rere blong go long wan misin, mo mi save se taem mi stap raon long ol pipol we oli gat semfala standet olsem mi, i stap helpem mi blong stap fetful long gospel.
Ner M., 19 yia, Buenos Aires, Ajentina
Hang Strong long Rel blong Aean
Blong gat ol fren wetem ol gudfala standet, hem i stret samting we yu wantem. Yu wantem se raon long yu, i gat ol fren we oli stap helpem yu blong stap obei long ol komanmen, mo oli stap pusum tingting blong yu blong laef long wan fasin we i stret mo gud. Hang strong long rel blong aean, we i lidim yu i go long tri blong laef, be i no bigfala bilding ia we i gat plante spes long hem. Taem yu stap sarenda long fasin we i no stret mo i nogud, bae i lidim yu long ol temtesen. Gat ol gudfala fren we bae oli lidim tingting blong yu blong laef folem gospel.
Ani P., 13 yia, Yuta, YSA
Prea blong Faenem Ol Fren
Afta we mi mo famli i muv i go long wan niu stet, mi bin prea oltaem blong faenem ol fren we bae mi save storian abaot gospel wetem olgeta. Taem mi bin stap prea, mi filim gud insaed, mo samfala manis afta, mi faenem sam fren we oli gud tumas. Mi bin save dipen long sapot blong olgeta, mo oli bin helpem mi blong kam antap blong lavem gospel ia moa. Mi save se ol fren oli impoten, mo oli save mekem se i isi moa blong yumi laef folem gospel.
Sera P., 16 yia, Yuta, YSA