Sam Tingting blong Famli Haos Naet
Magasin ia i gat ol stori mo ol aktiviti we oli save yusum long famli haos naet. Wanem i kam afta i tu eksampol blong yusum.
“Ol Smol Pikinini mo Sakramen,” pej 16: Papa mo mama, afta we yutufala i ridim atikol ia, yutufala i save tokbaot samfala wei blong tijim ol yangfala pikinini hamas nao sakramen mo ol kavenan we bae oli mekem long taem blong baptaes oli impoten. Yu save yusum ol prea blong sakramen (we oli stap long Doktrin mo Ol Kavenan 20:77, 79) blong tij long saed blong ol promes we yumi stap mekem long taem blong baptaes, mo blong tij olsem wanem we, taem yumi kakae sakramen evri Sandei, hem i wan janis blong mekem bakegen olgeta promes ia. Yu save yusum ol tingting we yu gat tu blong helpem ol yangfala pikinini blong yu blong lukluk moa long Sevya long taem blong sakramen, olsem, mekemap samfala simpol pikja buk we oli fulap long ol pikja blong Sevya.
“Wan Resipi blong Stap Lanem Samting,” pej 62: Sapos yu gat ol pikinini we oli moa bigwan, we oli save stadi long ol skripja olgetawan, tingting blong ridim atikol ia wetem olgeta, mo invaetem olgeta blong traem ol aedia we oli stap insaed long atikol ia. Yu save mekem se wanwan memba blong famli i gat wan jenol blong skripja stadi, mo wanwan i mekem ol gol blong raet long jenol oltaem. Ol memba blong famli oli save volontia blong serem ol tingting mo ol filing we oli raetem long jenol blong olgeta long sam narafala famli haos naet.