Napalig-on pinaagi sa Pulong sa Dios
Ni Elder Yoon Hwan Choi
Sa Seventy
Sa dihang nakat-unan nako kon unsaon sa paggamit ang mga pulong sa mga propeta, akong giusab ang akong kinabuhi gikan sa unsay akong gusto ngadto sa unsay gusto sa Ginoo nga ako mahimo.
Samtang nagdako ko sa Korea, ang akong amahan mitugot sa iyang mga anak sa pagtambong sa simbahan nga among gipili, apan kasagaran panahon sa panihapon dili kami magkauyon mahitungod sa among nagkalain-laing mga tinuohan. Tungod niining mga panagbingkil, gustong hiusahon sa akong amahan ang relihiyusong pagtuo sa among pamilya. Gumikan kay ang akong manghud nga lalaki moadto man sa mga miting sa Ang Simbahan ni Jesukristo sa mga Santos sa Ulahing mga Adlaw uban sa akong tiyo, ang akong papa nagsugod sa pagsimba uban kanila aron sa pagkat-on og dugang mahitungod sa Simbahan. Mitambong usab ko ug nakadayeg sa makalingaw nga mga kalihokan sa Mutual ug kon sa unsang paagi nga ang programa sa seminary nakapalig-on sa mga batan-on sa espirituhanon nga paagi.
Sa dihang 16 nako, ang akong mga ginikanan ug ako nabunyagan, ug ang nahibilin sa among 23 ka mga sakop sa pamilya ug mga paryente nagpamiyembro sa Simbahan sulod sa pito ka bulan.
Sa dihang mipasakop kami sa Simbahan, mipasalig kami nga mahimong hingpit nga aktibo ug magpadayon sa pagkat-on mahitungod sa mga doktrina sa ebanghelyo. Gibuhat namo kini pinaagi sa matinud-anon nga pagtuon sa mga kasulatan sa matag adlaw, uban sa pagbasa sa daghang mga basahon sa Simbahan ug mga manwal. Misunod ang pipila ka tuig, nakat-on ko og duha ka importanteng mga baruganan mahitungod sa pagpabiling lig-on sa Simbahan:
-
Magtuon sa mga kasulatan sa seminary, sa simbahan, ug sa panimalay.
-
Maminaw ug mosunod sa tambag sa propeta.
Kalig-on diha sa mga Kasulatan
Agig dugang sa pagtuon sa mga kasulatan diha sa panimalay, ang akong igsoon ug ako matinud-anon usab nga mitambong sa seminary ug Mutual. Niadtong panahona, sa buntag ang among Sunday School, ang miting sa sakrament sa hapon na. Tungod sa gilay-on sa among meetinghouse, magpabilin kami sa building sa simbahan, motambong og klase sa seminary, ug malingaw sa pagbisita ug makig-uban sa ubang mga miyembro sa Simbahan hangtud mahuman ang miting sa sakrament. Daghang mga kabatan-onan nagpasakop sa Simbahan sa Korea nianang panahona, ug samtang kami nagkat-on og dungan ug nalingaw sa mga kalihokan, nagkasuod kami.
Gitawag ko sa pagserbisyo sa akong korum sa Aaronic Priesthood ug suod nga nakigtambayayong sa young women kinsa nagserbisyo sa ilang mga klase. Nakat-on kami kon unsaon sa pag-amuma ug pag-ampo alang niadtong among gipangulohan ingon man usab kon unsaon sa pagplano og mga kalihokan nga manag-uban ug paggamit sa among panahon sa maalamong paagi.
Atol sa semana, akong gitun-an ang mga kasulatan alang sa seminary sa dili pa nako buhaton ang akong assignment sa eskwelahan. Kon kapoy na kaayo ko para magbuhat sa akong homework o adunay mga hagit sa eskwelahan, ablihan nako ang akong manwal sa seminary, magtuon, ug mag-ampo. Nakaamgo ko nga kon buhaton nako kana, akong mabag-o ang akong hunahuna ug matutukan og mas maayo ang akong homework. Ako gihapon kining gigamit sa akong kinabuhi. Karon, kon ako adunay lisud nga panahon, magbasa gihapon ko sa akong mga kasulatan o mga pakigpulong sa kinatibuk-ang komperensya sa pagbag-o sa akong hunahuna.
Daghang mga estudyante sa high school sa Korea naggahin sa kadaghanan sa ilang panahon sa pag-eskwela ug lawom nga pagtuon. Among nakat-unan nga kon kami mogahin og panahon alang sa mga kalihokan sa seminary ug Mutual, mobati kami og kadasig ug mapanalanginan sa paghimo og maayo sa among buluhaton sa eskwelahan. Ang mga leksyon nga akong nakat-unan didto nakatabang kanako sa ubang sitwasyon samtang nag-eskwela pa ko.
Usa ka adlaw sa eskwelahan, usa sa akong mga magtutudlo nagtudlo og leksyon mahitungod sa Utah, USA, sa among klase sa hiyograpiya ug misulti og pipila ka mga butang kabahin sa Simbahan nga mga sayop. Naghunahuna ko, “Ako ba siyang korihian diha sa atubangan sa tanan, o ako siyang adtoon sa pribado human sa klase?” Nianang higayuna, ang mga pulong sa magtutudlo sa seminary misantop sa akong hunahuna. Miingon siya, “Dili makiglalis o mopasakit ni bisan kinsa kon dunay tawo nga nakasulti og sayop mahitungod sa Simbahan.”
Gibati nako nga kinahanglan magpabilin ra ko nga maghilum ug magmatinahuron panahon sa klase. Sa dihang nakig-istorya ko niya pagkahuman, gisultihan nako siya nga usa ko ka miyembro sa Simbahan, ug ako siyang gikorihian sa sayop nga mga butang nga iyang gitudlo diha sa klase. Miingon siya nga, “Wala ko kahibalo nga Mormon diay ka. Salamat sa imong pagsulti nako”. Pagkahuman iyang gikorihian ang iyang leksyon aron makahatag og husto nga impormasyon, ug mitratar gihapon nako nga may pagtahud. Mapasalamaton ko sa tambag nga natudlo pinaagi sa akong magtutudlo sa seminary.
Militar o Misyon?
Sa batan-on pa ko, gusto ko nga mahimong usa ka heneral sa army. Giplano nako ang pag-aplay sa akademiya sa militar aron sa pagpadayon sa akong tumong. Kana nga desisyon nagpasabut nga ako wala magdahum nga moserbisyo og misyon tungod kay nasayud ko nga ang programa sa akademiya alang sa pagka-opisyal sa militar dili magtugot ni bisan kinsa alang sa bisan unsang relihiyusong kalihokan.
Dayon aduna koy oportunidad nga moadto sa usa ka rehiyonal nga komperensya sa Seoul, Korea—usa ka kasinatian nga miusab sa direksyon sa akong kinabuhi. Atol sa komperensya, akong nadungog si Presidente Spencer W. Kimball (1895–1985) nga mitambag ngadto sa mga kabatan-onan:
-
pagtambong og seminary,
-
pagserbisyo og dungganon nga misyon,
-
pagminyo sa templo, ug
-
pagtrabaho padulong sa kahimayaan.
Nakahibalo ko nga husto ang iyang tambag, ug akong nahinumdoman ang bersikulo nga nag-ingon, “ang akong mga pulong dili mahanaw, apan ang tanan matuman, bisan pinaagi sa akong kaugalingon nga tingog o pinaagi sa tingog sa akong mga sulugoon, kini managsama ra” (D&P 1:38).
Sa pagkadungog nako sa propeta nga namulong mahitungod sa kaimportante sa pagserbisyo og misyon isip prayoridad sa kinabuhi, nasayud ko nga kinahanglan ko nga mosalig sa Ginoo, moserbisyo og misyon, ug biyaan ang akong damgo nga mamahimong heneral, naghinumdom nga “unaha ninyo pagpangita ang gingharian sa Dios, ug sa iyang pagkamatarung; ug kining tanan nga mga butang idugang nganha kaninyo” (Mateo 6:33).
Bisan og wala na ako nagplano sa pagtambong sa akademiya sa militar, ang pagserbisyo og tulo ka tuig isip sundalo gikinahanglan gihapon sa tanang batan-ong mga lalaki. Nakaserbisyo nako og usa ka tuig didto sa Korea Busan Mission sa dihang nakadawat ko og mga mando gikan sa gobyerno sa Korea sa pagreport alang sa katungdanan sa militar. Nagserbisyo ko og tulo ka tuig sa army, ug human ko nauli, gusto nakong humanon ang akong misyon. Dayon natawag ko ngadto sa Korea Seoul Mission ug miserbisyo og laing tuig didto.
“Nabuang Na Ka?”
Dihang mipauli ko gikan sa akong misyon, napanalanginan usab ako pinaagi sa pagsunod sa tambag gikan sa mga propeta. Sama pananglit, sa dihang nahuman nako ang akong misyon, nakahukom ko nga magminyo, bisan tuod og wala nako mahuman ang akong pag-eskwela. Sa Korea, ang tradisyon mao nga kinahanglan malig-on sa pinansyal nga paagi ug makompleto ang imong pag-eskwela sa dili pa magminyo ug magsugod og usa ka pamilya. Apan nasayud ko nga kinahanglan kong mosunod sa tambag sa propeta ug atimanon dayon ang pagminyo. Ang akong asawa ug ako nagkahimamat sa dihang mga batan-on pa kami ug maayo kaming managhigala sa wala pa ko nagmisyon, mao nga maayo ang among panag-ilhanay sa usag usa. Nagminyo mi dayon human pagpauli nako, bisan og ang iyang mga higala miingon nga, “Nabuang na ka? Wala moy kwarta.”
Among gisupak ang tradisyon sa kultura tungod kay kinahanglan nakong mosunod sa tambag sa Ginoo. Ang among kinabuhi napanalanginan pinaagi sa pagsunod sa tambag sa propeta, ug nakabaton kami og mga kasinatian nga dili unta namo maangkon sa laing paagi.
Ang tambag sa Ginoo nga buhaton ang tanang butang diha sa kaalam ug kahusay (tan-awa sa Mosiah 4:27) usahay lahi gikan sa unsay gitudlo sa katilingban, apan kon kita magmasulundon sa tukmang panahon sa Ginoo, atong makita ang atong kinabuhi nga mausab alang sa kaayohan. Mapasalamaton ko alang sa buhi nga propeta, kinsa nangulo kanato karon sa pamaagi sa Ginoo. Ang kasulatan nagtudlo nga “kon kita makadawat og bisan unsa nga panalangin gikan sa Dios, kini tungod sa pagsunod niana nga balaod diin diha kini gipasikad” (D&P 130:21).