Mga Tingog sa mga Santos sa Ulahing mga Adlaw
Ang Pagpangita ni Etiene
Pipila ka semana sa wala pa mobiya sa pagserbisyo og full-time nga mission, mibisita ko sa panimalay sa dugay na nakong higala nga dili miyembro sa Simbahan. Gituyo nako nga magpabilin sulod sa pipila ka minuto, apan tungod sa usa ka dakong unos, kinahanglan ko nga magpabilin og mas dugay kay sa gipaabut. Busa ang akong higala, ang iyang inahan, ug ako milingkod ug misugod sa paghisgut kabahin sa Simbahan ug sa akong umaabut nga misyon.
Akong gipasabut nga tingali madestino ko sa mga siyudad sama sa Rio de Janeiro, Belo Horizonte, o Brasília.
Sa pipila ka rason, ang inahan sa akong higala nakahukom nga hatagan ko sa address sa iyang igsoong babaye nga nagpuyo sa usa ka lungsod duol sa Rio de Janeiro. Miingon siya nga akong adtoon ug bisitahon siya kon ugaling ako ipadala didto.
Migikan ko paingon sa akong misyon niadtong Hulyo 7, 1982. Miserbisyo ko sa daghang nagkalain-laing siyudad, lakip sa usa ka lugar nga duol sa gipuy-an sa iyaan sa akong higala. Naghunahuna ko sa pagbisita kaniya, apan ang iyang panimalay dili akong area. Wala nako sultihi ang mga misyonaryo nga gi-assign sa area mahitungod niya kay naglaum pa gihapon ko nga ako mismo ang makaadto.
Nianang higayuna, ang mga misyonaryo nagserbisyo sulod sa 18 ka bulan. Milabay ang panahon nga wala nako igkita ang iyaan sa akong higala ug ang iyang pamilya.
Sa mga tuig nga milabay, samtang nagtambong og usa ka ward social, wa damha nakita nako ang akong higala nga dili miyembro. Akong nahibaloan nga gidapit siya sa usa sa iyang mga paryente, usa ka iyaan nga ginganlan og Etiene kinsa bag-ohay lang nga nabunyagan sa Simbahan. Unya akong nahibaloan nga ang Iyaan nga si Etiene bag-ohay lang mibalhin ngadto sa among ward gikan sa estado sa Rio de Janeiro. Dali ra nakong nauyonan ang iyang iyaan nga si Etiene, ug ganahan mi nga mag-istoryahanay kabahin sa among mga kaagi sa Rio de Janeiro. Sa akong kaulaw, akong nahibaloan nga siya diay gihapon ang babaye nga gusto nakong bisitahon panahon sa akong misyon. Bag-o lang siya nga nabunyagan, human sa wala damhang kamatayon sa iyang bana.
Maayo gani, iya ra kong gipasaylo sa wala pag-awhag sa uban nga mga misyonaryo sa pagbisita kaniya. Hinoon, siya nasagmuyo sa mga panahon nga nawala kaniya nga wala siya makatagamtam sa mga panalangin sa ebanghelyo.
Ang mga pagmahay nga sama niini dili lang mabati sa mga returned missionary apan moabut usab kanatong tanan kon atong ibaliwala ang pagpatalinghug sa aghat sa Espiritu, kon kana nagpasabut sa pagdapit sa mga higala sa pagkuyog sa kalihokan sa Simbahan o sa paghatag og mga referral ngadto sa mga misyonaryo. Modangop kita sa Ginoo ug mangayo og inspirasyon. Makigsulti Siya nato pinaagi sa ligdong, hinagawhaw nga tingog sa Espiritu. Siya mohatag kanato og tabang nga atong gikinahanglan sa paghimo sa misyonaryo nga buhat sa pagpahinungod ug gugma.