Naan in Katak an Kōrā, Juļae 2016
Kōttōpar eo Ad Elap n̄an kōkkaajriri
Kanooj jar ilo am̧ ekkatak kōn katak in im pukōt n̄an jeļā ta eo naaj tilmaake. Ewi wāween am naaj melele kōn “Baamle eo:Juon Kean̄ n̄an aolepān Lal” kōlaplok tōmak eo am ilo Anij im kōjeramman ro kwōj katakin er ilo am kōmmani lolok ko am? N̄an meļeļe ko reļļapļo̧k, etal n̄an reliefsociety.lds.org.
Tōmak, Baam̧le, Jipan̄
“Ekar aorōk bwe jetōb ro nejin Anij ren bōk ānbwin im juon jeramman n̄an eddōk maanlok n̄an mour indeeo,” Elder Dallin H. Oaks jān Doulul eo an Jon̄oulruo Rijilōk ro ekar katakin. “Ilo mool in lukkuun kōttōpar eo an karōk in lomoor eo, ij tōmak bwe jeramman eo elaptata ioon lal im ilan̄ rej ajri ro nejid im epepen ko rej itok wōt.”1
Elder Neil L. Anderson jān Doulul eo an Jon̄oulruo Rijjilōk ro ekar ba:
“Jej tōmak ilo baamle ko, im jej tōmak ilo ajri ro. …
“‘… Anij ekar jiron̄lok [Adam im Eve], Komin timoon, im orlok, im kobrak ioon lal’ [Jenesis 1:28]. …
“Kien in ejjan̄in wōr en emeloklok ak kajejtokjen ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata.”2
Men̄e ejjab aolepād kar erom mama im baba ilo mour in, jemaron̄ kōkkaajririk ajri ro ilo kajjojo iiō. Jej mōnōnō kōn kōjeramman ko ilo ad uwaan baamle eo an Jemādwōj Ilan̄, im jej en̄jaake mōnōnō ko im jumae ko āinwōt juon eo uwaan baamle ioon lalin. Im n̄an elōn̄, kōkkaajriri ej kōttar er ilo mour indeeo eo ej pād imaan.
Bar Jet Eoon
Bwebwenato ko remool raan kein
“Elōn̄ kōnono ko ilalin rainin rejjab kaorōk nājnāj ajri ak rekōnaan karumwijlok aer nāji ak kōmman jon̄an aer nāji ilo juon baamle,” Elder Andersen ekar ba. “Leddik ro nejū raan kein rekar karreilok eō n̄an juon blog kar jeje jān juon mama kirijin (jab jān kabun̄ in ad) eo ewōr lalem nejin ajri. Ekar kwalok; ‘[Eddōk] lok ilo manit in, ekanooj bwe an pen loor juon lōmnak jān jeje ko rekwojarjar kōn kōkkaajiriri. … Ajri ro rele ilalin kalaj. Ilalin ekkeke ipelaakin lalin ilo mool. Ilalin maron̄ eo n̄an dieojlok in jota ilo iien ko am make. Ilalin kōkmanman ānbwinnim ilo imōn iukkure eo. Ilalin jabdewōt jerbal ko am ak kōjatdikdik n̄an bōk juon jerbal.’ E kar bar kobaiki: ‘Kōkkaajriri ejjab juon men jekōnaan, ej juon kūr. Kwoj jab ae ajri kōnke kwōj lo er rōkōjāijlok jān jitaam ko. Ejjab juon men n̄an kōmman n̄e komaron̄ kōmman iien. Ej ta eo Anij ekar lewaj iien n̄an kōmmane.’”3
© 2016 jān Intellectual Reserve, Inc. Aolep jim̧we ko rej pād ippān. Jeje ilo USA. Kōmālim ilo kajin English: 6/16. Kōmālim an ukook: 6/16. Ukook an Visiting Teaching Message, July 2016. Marshallese. 12867 874
Ļōmņake Menin
Ilo wāween rōt baamle eo ad ioon lal ej āinwōt baamle eo ilan̄?