Ennaan eo an Būreejtōnji eo Kein Kajuon, Tijem̧ba 2015
Kōm̧m̧an Iien n̄an Rilo̧mo̧o̧r eo
Jān Būreejtōn Thomas S. Monson
Bar juon season in Kūrijm̧ōj ebun̄it kōj im ejjab to enaaj bar ijjino juon iiō ekāāl. Ilo aō en̄jake āinwōt n̄e kar inne eo jekar kememe raan in ļotak eo an Rilo̧mo̧o̧r eo im jekar kōm̧m̧ani kōttōbar ko.
Ilubwilijin kōttōbar ko ad n̄an iiō in, jekar ke ņamejļan n̄an kōm̧m̧an ad iien ilo mour ko ad im ruum̧ ilo būruwōd n̄an Rilo̧mo̧o̧r eo? Jekdo̧o̧n ewi jon̄an tōprak eo jekar maron̄ in tōpare ilo juon ad kōttobar, ewōr aō leke bwe jemaron̄ kōm̧m̧an em̧m̧anļo̧k. Season in Kūrijm̧ōj in ej iien eo em̧m̧antata n̄an etale im kōkāāle kijejeto ko ad.
Ilo an boub mour kein ad, kōn elōn̄ men ko rej kajjieon̄ kōmad kōj, elukkuun aorōk bwe jen kōm̧m̧ane juon karōk, kallim̧ur in kijejeto n̄an bōktok Kraist n̄an mour kein ad im ilo mōko imōd. Im eaorōk bwe kōj jen, āinwōt Rikanpil ro jān Rear, jen mije epaakeļo̧k Rilo̧mo̧o̧r eo im ļoor Iju eo im “itōn kabun̄ n̄an E.”1
Laļtak jān epepen ko ilo tōre ko, ennaan eo jān Jisōs ej jan̄in oktak. N̄an Piter im Andru ipārijet in Galili, E ba n̄an er, “Kom̧win ļoor Eō.”2 Ekar itok kūr eo n̄an Pilip, “Kwōn ļoor Eō.”3 Im ekar itok ennaan eo n̄an Rilivai eo ej jijet ilo jikin owōj, “Kwōn Ļoor Eō.”4 Im n̄an kwe im n̄a, eļan̄n̄e kōjro ej ron̄jake, enaaj itok ejja kūr in (wot): “Itok Ļoor Eō.”5
N̄e jej ļoor waanjon̄ak eo An rainin, enaaj wōr ad iien kein rem̧m̧an n̄an kōjeraam̧m̧an mour ko an ro jet. Jisōs ej kūr kōj bwe jen leļo̧k kōj make: “Lo, Irooj ej aikuj bōro eo im ļōmņak eo em̧ōņōņō.”6
Ewōr ke juon armej eo kwoj aikuj in jipan̄e ilo Kūrijm̧ōj in? Ewōr ke juon armej eo ej kōttar am̧ loļo̧k?
Iiō ko ļo̧k ikar loļo̧k juon eo emej pāleen ilo m̧weo imōn. Ke ij pād m̧weo imōn, peeļ eo ilo kōjem̧ eo ekar jan̄. Iturin kōjem̧ eo ekar jutak juon taktō eļap an boub im lukkuun bun̄bun̄. Ejjeļo̧k ar kajjitōk bwen lotok; ijjelo̧kin, ekar en̄jake juon im̧we bwe en lotok juon rinan̄inmej eo eajimakeke.
Ilo season in, ro rej jab maron̄ em̧m̧akūtkūt jān m̧ōko m̧weer itok wōt jān nan̄inmej ko ippāer ilo ānbwin relukkuun kōņaan bwe en wōr ej loļo̧k er ilo iien Kūrijm̧ōj. Juon Kūrijm̧ōj ke ikar loļo̧k juon em̧ imon rinan̄inmej, ikar jijet im kar bwebwenato ippān ļalem lelļap ro rerūtto, rūtto tata eo ekar 101 an iiō. Ekar pilo, ak ekar kile ainikiō.
“Bisop, kworum̧wij jidik ilo iiō in!” ekar ba. “Ikar ļōmņak kwoban kar itok.”
Ekar juon iien em̧m̧an ilo amro ippān doon. Juon rinan̄inmej, ijoke, ekar reinabojļo̧k ilo wintō eo im ba im bar ba, “Ijeļā bwe ļaddik eo nejū enaaj itok im lotok n̄a rainin.” Ikar ļōmņak eļan̄n̄e enaaj, kōnke elōn̄ season in Kūrijm̧ōj ko ekar jab lotok eō.
Ej wōr wōt iien ilo iiō in n̄an leļo̧k pein jipan̄, būruwōn tiriamo, im jetōb eo elem̧ōņōņō—ilo bar ba, n̄an ļoor waanjon̄ak eo Rilo̧mo̧o̧r eo ekar kōm̧m̧ane im jerbal eļan̄n̄e Enaaj kar kūr kōj bwe jen jerbal. Ilo ad jerbal n̄an E, jejjab aikuj kōjekdo̧o̧n iien ko ad rem̧m̧an, āinwōt an eo ekar kōm̧m̧ane ilo im̧ōn ruwamāejet,7 n̄an kōm̧m̧an iien n̄an E ilo mour ko ad im ruum̧ n̄an E ilo būruwōd.
Jemaron̄ ke meļeļe kallim̧ur in em̧m̧an epād ie ennaan eo an enjeļ eo n̄an rilale sip ro ilo meļaaj eo: “Ij bōkwaj n̄an kom̧ naan ko rem̧m̧an, naan in lan̄lōn̄ eļap. … Bwe rainin e ļotak n̄an kom̧ … Rilo̧mo̧o̧r, E Kraist Irooj”?8
Ilo ad leto letak menin leļo̧k ko ilo Kūrijm̧ōj, jemaron̄ ke keememej, kautiej, im bōk menin leļo̧k eo eļaptata an menin leļo̧k ko—menin letok eo ad Rilo̧mo̧o̧r im Ripinmuur, bwe jen maron̄ bōk mour indeeo.
“Bwe ta em̧m̧an eo n̄an juon armej eļan̄n̄e mennin leļo̧k eo likūti ioon, im ejab bōk mennin leļo̧k eo? Lo, e ej jab m̧ōņōņō ilo men eo kar leļo̧k n̄an e, im jab m̧ōņōņō ilo eo rileļo̧k eo an mennin leļo̧k eo.”9
Jemaron̄ ke ļoor E, jerbal n̄an E, kautiej E, im bōke ilo mour ko ad menin letok eo An n̄an kōj, bwe jen maron̄, ilo naan ko an Jemān Liai, “ij booļ indeeo ilo pein iakwe eo An.”10
© 2015 jān Intellectual Reserve, Inc. Aolep jim̧we ko rej pād ippān. Jeje ilo USA. Kōmālim ilo kajin English: 6/15. Kōmālim an ukook: 6/15. Ukook eo an First Presidency Message, December 2015. Marshallese. 12592 874
Katakin jān Ennaan In
Būreejtōn Monson ej kūr kōj bwe jen “kōm̧m̧ane juon karōk, kallim̧ur in kijejeto n̄an bōktok Kraist n̄an mour ko ad im ilo mōko imōd.” Ļōmņak im kōnono ippān ro kwoj katakin ewi wāween aer maron̄ kōm̧m̧an aer karōk in kijejeto in n̄an kajjojo im āinwōt juon baam̧le. Komaron̄ in kajjitōk ippāer n̄an ļōmņak kōn juon armej ak baam̧le eo komaron̄ in loļo̧k ak jipan̄ e Kūrijm̧ōj in. “Ej wōr wōt iien ilo iiō in n̄an leļo̧k pein jipan̄, bōro eo etiriam̧o, im jetōb eo elem̧ōņōņō.”