Naan in Katak an Kōrā Tijem̧ba 2015
Kadkad in Mour ko Rekwojarjar an Jisōs Kraist: Tūriam̧o im Jouj
Kanooj jar ilo ekkatak kōn katak in im pukōt n̄an jeļā ta eo n̄an kwaļo̧k. Ekōjkan ami naaj meļeļe kadkad in mour eo ekwojarjar an Rilo̧mo̧o̧r eo ej kōļapļo̧k tōmak eo ami ilo E im kōjeram̧m̧an ro kom̧wij bōk eddoier kōn naan in katak an kōrā? N̄an meļeļe ko reļļapļo̧k, etal n̄an reliefsociety.lds.org.
Tōmak, Baam̧le, Deeor
“Ilo jeje ko rekwojarjar, meļeļein tūriam̧o ej ‘en̄taan ippān.’ Ej barāinwōt meļeļein n̄an kwaļo̧k būrom̧ōj, meļeļe, im tūriam̧o n̄an ro jet.”1
“Jisōs ekar letok n̄an kōj elōn̄ waanjon̄ak ko kōn tūriam̧o,” Būreejtōn Thomas S. Monson ekar ba. “Em̧m̧aan eo eaajikuk an etetal ilo juon ļwe ņaetan Beteseba; kōrā eo ekar ļōn̄; kōrā eo ilo aibōj laļ an Jekab; leddik eo nejin Jairus; Lazarus, ļeo jein Meri im Matha—kajjojo iaer ejjeļo̧k oktak jān likao eo ekar jorrāān ilo iaļ in Jericho. Kajjojo iaer raar aikuj jipan̄.
“N̄an em̧m̧aan eo eajjikukkuk ilo ļwe ņaetan Beteseba, Jisōs ekar ba, ‘Kwōn jerkak, im bōk kiniōm̧ im etal.’ N̄an kōrā eo ejerawiwi eo ekar itok n̄an bōk kōkkapilōklōk, ‘Etal, im jab bar jerawiwi.’ N̄an jipan̄ kōrā eo ekar itok n̄an itōk dān, Ekar leļo̧k dān in aibōj ‘emōkaj an ibebļo̧k n̄an mour indeeo.’ N̄an leddik eo emej nejin Jairus ekar itok kean̄ in, ‘Talita kumi, Ij ba n̄an eok, kwōn jerkak.’ N̄an Lazerōs ilowaan lōb eo, ‘Kwōn dieojtok.’
“Rilo̧mo̧o̧r eo ekar aolep iien kwaļo̧k jon̄an eo ban bwine kōn tūriam̧o. … Jen kōppeļļo̧k kōjem in būruwōd, bwe E—waanjon̄ak eo emour kōn tūriam̧o̧ em̧ool—bwe En maron̄ deļo̧n̄.”2
Bar Jet Eoon
Sam Ko 145:8; Zakaraia 7:9; 1 Piter 3:8; Mosaia 15:1, 9; 3 Nipai 17:5–7
Jān Jeje ko Rekwojarjar
“N̄a im ļeo pāleeō kom̧ro kar būkwelōlō iturin leddik eo nejim̧ro 17 an iiō im akweļap kōn mour eo an,” Linda S. Reeves ekar ba, rikakpilōklōk eo kein karuo ilo būreejtōnji eo eļap an Doulul eo an Kōrā ro. “Uwaak eo ekar jaab, ak. … kōm̧ro ar aikuj in jeļā … bwe … [Rilo̧mo̧o̧r eo] ej en̄jake tūriam̧o n̄an kōm̧ro ilo amro būromōj.”3
“Juon iaan bwebwenato ko aō rem̧m̧an jān mour eo an Rilo̧mo̧o̧r eo ej bwebwenato in Lazarōs. Jeje ko rekwojarjar rej jiron̄ kōj bwe ‘Jisōs ekar iakwe Matha, … leddik eo jatin [Meri], im [ļeo jeir] Lazarōs.’”4 Ke Lazarōs ekar jino nan̄inmej, kar kōnnaanik ļo̧k Jisōs naan eo, ak ke Ekar itaaktok Lazarōs emōj an mej. Meri ekar ettōrļo̧k n̄an ippān Jisōs, bun̄ im̧aan Neen, im jan̄. Ke Jisōs ekar lo an Meri jan̄ im limō, “Ej limō ilo an im būrom̧ōj, im … jan̄” (Jon 11:33, 35).
“En̄in ej eddo eo ad. Jej aikuj en̄jake im loe kōn kōj make innām jipan̄ aolep ajri ro nejin Jemedwōj Ilan̄ en̄jake im loe im jeļā bwe ad Rilo̧mo̧o̧r ekar bōk Ioon Make jab wōt jerawiwi ko ad ak barāinwōt metak ko ad im en̄taan ko im ikinejnej ko bwe E emaron̄ jeļā ta eo jej en̄jake im E ejeļā wāween n̄an kaenōm̧m̧an kōj.”5
© 2015 jān Intellectual Reserve, Inc. Aolep jim̧we ko rej pād ippān. Jeje ilo USA. Kōmālim ilo kajin English: 6/15. Kōmālim an ukook: 6/15. Ukook eo an Visiting Teaching Message, December 2015. Marshallese. 12592 874
Ļōmņak kōn Menin
Wōn eo emaron̄ jeraam̧m̧an jān tūriam̧o̧ eo am̧?