O Se Tupe Iti a le Fafine ua oti Lana Tane o Ona Po Nei

Stephanie H. Olsen, Iuta, ISA

Ata

illustration of a gift jar with money in it

Ata na tusia e Allen Garns

O ie laulau nono papae ma tamaloa aisa i le ogatotonu o laulau na tuuina mai se vaaiga o le Kerisimasi i le fale faafiafia ao faia tapenaga faaiu mo la matou pati faaleaiga o le Kerisimasi.

A o matou faatalitali mo a tatou malo, sa oo atu lau faataupupula i se laulau ma se fagu gaogao—ua tusia ai “Sao mo le Tama o le Kerisimasi”—o loo i luga. Sa ou tatalo ina ia oo atu i le faaiuga o le po, ua tumu le fagu.

I le taimi o a matou sauniuniga o le pati na matou iloaina ai o le toalua o lo‘u tausoga ua leai se galuega mo le silia ma le tausaga ma le afa. O le ala tupe maua a lona aiga o le tufaina lea o le pepa i aual e lima, lea e manaomia ai ona latou amata i aso taitasi i le 3:30 i le taeao. O le tele o le latou tupe maua e alu i le totogiina o le mokesi, ma isi mea e manaomia, ae totoe ai sina vaega laitiiti mo mea latou te manaomia, e pei o meaalofa o le Kerisimasi.

O le aiga o lou tausoga na muamua taunuu mai. Sa ou matauina a o latou agai atu i laulau, ma pasia la matou fagu o le Kerisimasi. A o latou latalata atu i ai, sa tu le toalua o lo‘u tausoga e faitau le faailoga i luga o le fagu. E aunoa ma le faatali, sa ia aumaia i fafo ni nai tala, ma lafo atu i le fagu, i le le iloaina po o ai o le aiga na “manaomia le fesoasoani”.

Na faatumuina au i le alofa, ma na vave ona ou manatua le tala o le Feagaiga Fou o le fafine ua maliu lana tane ma ana tupe iti e lua. Sa lafo e tagata mauoa a latou foai tetele i le mea e teu ai tupe ae “ua alu ane foi le tasi fafine mativa ua oti lana tane, ua lafo ane ai tupe iti e lua” (tagai i le Mareko 12:41–42).

Ona fetalai ane lea o le Faaola i Ona soo:

“O mea a lena fafine mativa ua oti lana tane, ua lafo i le mea e teu ai tupe, ua sili ia ia i latou uma na lafo i ai:

“Aua o i latou uma, ua latou lafo nisi mea mai a latou mea ua tele; ao ia ua mativa ua ia lafo ana mea uma sa ia te ia, o ana mea uma e ola ai” (Mareko 12:43−44).

Na fetalai Iesu Keriso ao ia “ua mativa” ua ia lafo “ana mea uma e ola ai.” Sa mafai ona ia tuuina atu na o le tasi le tupe iti. Semanu atonu o le a faamalieina ai mea na manaomia, ae o lona loto faamaoni ma le naunautai e ositaulaga mea uma na tosina atu ai le vaai a le Alo o le Atua.

E leai se tasi o le a tuuaia le toalua o lo‘u tausoga mo le savali ese mai le fagu ma le mafaufau, “Ua ou le avatu se mea ona ua ou le tagolima” (Mosaea 4:24). O lana faataitaiga maoae o le alofa mama ma le alofa mo ona uso a tagata na ootia ai e le gata o au, ae faapea foi isi tagata o lou aiga o e na vaavaai atu ia te ia. Ou te iloa o lona aiga o le a manuia lava ona “o le alofa mama o le alofa le pona lea o Keriso, … ma o soo se tasi e maua ua i ai ia te ia i le aso gataaga, o le a lelei ia te ia” (Moronae 7:47).

Sa matou faamoemoe e tuuina atu i lona aiga se mea i lena po, lea na matou faia mulimuli ane, ae i le tuuina atu o se vaega o lona lava taimi o le manaomia, na ia faaali mai ia i matou pe a oo i le mea e sili ona taua, ua mauoa lava o ia.