Thawj Pawg Thawj Tswj Hwm tsab Xov, Plaub Hlis Ntuj 2014
Tog Hlau uas Txhos Ruaj Nrees
Tsis ntev tas los kuv muaj cib fim caij ib lub nkoj loj nyob ntawm ntug dej hiav txwv nyob hauv Alaska, USA.Thaum tus thawj tsav nkoj npaj nres lub nkoj rau ntawm qhov dej huv huv uas txuas mus rau dej hiav txwv, nws ua tib zoo ntsuam xyuas qhov chaw ntawd seb puas muaj xwm txheej, xws li tej nthwv dej mus mus los los li cas, cov dej tob li cas, thiab nyob deb npaum li cas ntawm tej yam uas tsis puaj phais. Thaum nws txaus saib lawm, nws tso tog hlau nres nkoj mus rau hauv dej kom lub nkoj yuav nyob ruaj nrees thiab khov kho, cov neeg uas caij nkoj thiaj yuav muaj cib fim saib tej yam zoo nkauj kawg uas Vajtswv tau tsim.
Thaum kuv saib ntug dej hiav txwv, kuv twb paub tias lub nkoj tab tom mus mus los los me ntsis thaum cua tshuab thiab cov dej ntws hauv qab lub nkoj. Tiam sis, lub nkoj twb nyob ruaj nrees nyob rau hauv qhov chaw ntawd nyob ntawm qhov uas tog hlau nres nkoj ntev thiab muaj zog npaum li cas.
Tus thawj tsav nkoj twb tsis tau muab tog hlau nres nkoj ceev cia rau hauv lub nkoj, kom muab nqis los tsuas yog muaj cua daj cua dub xwb. Tsis yog li ntawd, nws twb siv tog hlau nres nkoj kom tiv thaiv lub nkoj thiaj tsis raug xwm txheej thiab kom mus tsis tau rau hauv tej qhov chaw tsis puaj phais los yog cia lub nkoj maj mam mus ub mus no thaum cov uas caij nkoj thiab tu lub nkoj nyob haud.
Thaum kuv xav txog qhov no, ua rau kuv xav tias yog qhov no tsis yog ib zaj lus piv txwv zoo heev, ces kuv yeej tsis tau tsav ib lub nyab hoom.
Vim Li Cas Peb Xav Tau Tog Hlau
Peb muaj tog hlau nres nkoj kom tiv thaiv ib lub nkoj kom nyob ntawm ib lub qhov chaw los sis kom pab tswj hwm lub nkoj thaum huab cua tsis zoo. Kom muaj raws li ob lub hom phiaj no, qhov uas yus muaj tog hlau nres nkoj yeej tsis txaus. Tog hlau ntawd yuav tsum ruaj, khov kho, thiab siv raws li lub sij hawm thiab qhov chaw yog.
Txhua leej txhua tus thiab lawv tsev neeg xav tau tog hlau nres nkoj thiab.
Tej kev ntxhov siab yuav los zoo ib yam li cua daj cua dub tshoob peb mus ua yuam kev thiab muab peb tsoo cov pob zeb. Tiam sis tej lub sij hawm peb yuav raug xwm txheej thaum twg txhua yam zoo li puaj phais—cua tshuab me me xwb thiab cov dej tsis ntas. Muaj tseeb tiag, tej lub sij hawm peb yuav raug xwm txheej loj tshaj plaws thaum twg peb tsis tshua paub tias peb maj mam mus xwb.
Txoj Moo Zoo Yog Peb Tog Hlau
Tej tog hlau yuav tsum khov kho, muaj zog thiab tu zoo zoo kom siv tau thaum twg peb xav tau. Tsis tas li ntawd, yuav tsum muab txhos rau ib lub hauv paus uas muaj zog txaus txhawb tej nra hnyav.
Yexus Khetos txoj moo zoo yeej yog tog hlau nres nkoj zoo li no. Tus uas Tsim txhua yam tau npaj txoj moo zoo rau nws lub hom phiaj thiab kom Nws cov me nyuam muaj kev puaj phais thiab coj lawv txoj hau kev.
Txoj moo zoo yeej yog Vajtswv txoj hau kev kom txhiv Nws cov me nyuam dim thiab coj lawv rov qab los rau hauv Nws lub xub ntiag.
Vim peb paub tias txhua yam yuav maj mam mus ntawm qhov chaw yog, peb yuav tsum muab peb tog hlau txhos rau lub hauv paus uas yog qhov tseeb ntawm txoj moo zoo. Yuav tsum tsis txhob tso rau hauv tej hmoov zeb ntawm peb tej kev muab hlob los sis chwv daim av ntawm peb lub siab nyiam.
Lub hlis no peb muaj cib fim mloog Vajtswv cov tub qhe nyob hauv lub Koom Txoos lub tuam rooj sab laj. Lawv cov lus, thaum koom nrog cov vaj lug kub thiab tus Ntsuj Plig tej kev tshoov siab, yog ib lub hauv paus ruaj nrees thiab khov kho uas yog tej ntsiab cai thiab kev cai nyob mus ib txhis uas ua tog hlau rau peb kom peb nyob khov kho thiab kaj siab lug thaum peb raug kev sim siab thiab kev nyuaj siab hauv peb lub neej.
Tus yaj saub thaum ub Hilamas qhia hais tias, “Twb yog nyob rau saum lub pob zeb peb tus Txhiv Dim, tus uas yog Khetos, Vajtswv Leej Tub, uas neb yuav tsum cog neb qhov chaw cuab zog; xwv kom thaum tus dab yuav xa nws tej cua muaj zog, muaj tseeb tiag, nws tej xub nyob hauv tej cua moj lwg kaw, muaj tseeb tiag, thaum tag nrho nws tej lawg thiab nws tej cua daj cua dub uas muaj zog yuav los raug neb, tej ntawd yuav tsis muaj hwj chim kov yeej neb kom luag tau neb nqis mus rau tus kwj tob tob ntawm txoj kev nyuaj siab thiab txom nyem uas tsis muaj qhov kawg, vim yog lub pob zeb uas neb tau cog rau saud, uas yog qhov chaw cuab zog ruaj, ib qhov chaw cuab zog uas yog neeg cog rau saud lawm yuav vau tsis tau” (Hilamas 5:12).
Tej Tog Hlau uas Txhos Ruaj Nrees Muaj Nqi
Lub neej no yeej sim seb peb tej tog hlau puas muaj zog thiab ntxias peb kom maj mam mus ua yuam kev. Txawm li ntawd los, yog tias peb txhos peb tej tog hlau rau lub pob zeb ntawm peb tus Txhiv Dim, ces tej ntawd yuav ruaj nrees—txawm yog cua hlob, dej ntas muaj zog, los yog tej dej ntas siab npaum li cas.
Tiam sis, tsis tsim nyog uas ib lub nkoj yuav nyob twj ywm nyob hauv chaw nres nkoj; yuav tsum muab tog hlau nres nkoj rub thiab caij nkoj saum dej hiav txwv ntawm peb lub neej. Tiam sis yuav hais txog zaj lus piv txwv ntawd lwm zaus.
Nim no, kuv txaus siab uas kuv paub tias tog hlau nres nkoj ntawm txoj moo zoo thiab lub pob zeb ntawm peb tus Txhiv Dim yuav ua rau peb ruaj nrees thiab nyob kaj siab lug.
Ib tog hlau zoo li no yuav pab peb tsis mus ua yuam kev thiab raug kev txom nyem thiab raug xwm txheej. Tog hlau no yuav ua rau peb muaj cib fim saib tej yam zoo nkauj kawg ntawm peb lub neej uas hloov txhua lub sij hawm.
Lub neej no yeej zoo nkauj thiab muaj nqi heev. Cua daj cua dub thiab tej dej ntas tej zaum yuav ntxias kom peb mus raug tej xwm txheej uas peb tsis pom, tiam sis txoj moo zoo thiab lub hwj chim los saum ntuj los yuav pab peb taug txoj kev yog mus rau qhov chaw puaj phais ntawm peb Leej Txiv Saum Ntuj Ceeb Tsheej.
Yog li ntawd, thov kom peb yuav mloog tej zaj lus uas lawv hais nyob hauv lub Plaub Hlis Ntuj lub tuam rooj sab laj thiab nruab lawv tej lus rau peb lub neej kom muaj tog hlau ruaj nrees nyob hauv peb lub neej txhua hnub.
Thov kom Vajtswv foom koob hmoov rau peb thiab coj peb txoj hau kev ua qhov tseem ceeb no!
© 2014 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub txhais ua lus Akiv : 6/13. Pub txhais ua lus Hmoob: 6/13. Kev txhais First Presidency Message, April 2014. Hmong. 10864 295
Qhia los ntawm tsab Xov No
Cia li xav txog qhov uas tej tog hlau nres nkoj tseem ceeb npaum li cas rau Lihais tsev neeg thaum lawv caij nkoj mus rau thaj av uas tau cog lus tseg (saib 1 Nifais 18). Tej zaum koj yuav xav qhia txog 1 Nifais 18:11–15, thaum Nifais ob tug tij laug muab nws khi, Liyahaunas tsis khiav lawm, thiab lawv lub nkoj raug cua daj cua dub tshoob lawv mus. Peb raug dab tsi thaum peb tsis coj txoj moo zoo ruaj nrees? Tej zaum koj yuav xav qhia txog 1 Nifais 18:21–22 thiab sib tham txog qhov uas peb yuav muaj kev puaj phais thuam peb tig mus rau tus Cawm Seej.