2014
Ti Nadiosan a Mision ni Jesucristo: Naimbag a Pastor
February 2014

Mensahe iti Visiting Teaching, Pebrero 2014

Ti Nadiosan a Mision ni Jesucristo: Naimbag a Pastor

Nainkararagan nga adalenyo daytoy a material ken kalikagumanyo nga ammuen no ania ti ibinglay. Kasano a ti pannakaawatyo iti biag ken mision ti Mangisalakan ket mangpapigsa iti pammatiyo Kenkuana ken magparabur kadagiti ay-aywananyo babaen ti visiting teaching? Para iti ad-adu pay nga impormasion, mapan iti reliefsociety.lds.org.

Pammati • Pamilia • Tulong

Insuro ni Jesucristo, ti Naimbag a Pastor:

“Asino kadakayo ti adda sangagasut a karnerona, no mapukawna ti maysa kadakuada, dina panawan iti away dagiti siam a pulo ket siam ket mapanna sapulen ti napukaw agingga a masarakanna? …

“Kunak kadakayo, a … ragsak sadi langit gapu iti maysa a managbasol nga agbabawi” (Lucas 15:4, 7).

No maawatantayo a ni Jesucristo ti Naimbag a Pastor, dumakkel ti tarigagaytayo a mangsurot iti pagwadanna ken agserbi kadagiti agkasapulan. Kinuna ni Jesus: “Siak ti naimbag a pastor, ket ammok dagiti kukuak, ket dagiti kukuak ammodak. … Ket itedko ti biagko maipoon kadagiti karnerok” (Juan 10:14–15). Gapu iti Pannubbot ni Cristo, awanto kadatayo ti mapukaw tapno ditay masarakan ti dalantayo nga agawid (kitaen iti Lucas 15).

Kinuna ni Presidente Thomas S. Monson, “Pagrebbengantayo ti mangaywan iti arban. … Makapagtignay koma ti tunggal maysa kadatayo tapno agserbi.”1

Manipud kadagiti Nasantuan a Kasuratan

Salmo 23; Isaias 40:11; Mosiah 26:21

Manipud iti Pakasaritaantayo

Kinuna ni Elizabeth Ann Whitney, a dimmar-ay iti umuna a miting ti Relief Society maipapan iti pannakapasurotna idi 1830: “Apaman a nangngegko ti Ebanghelio idi inkasaba dagiti Elder daytoy, ammok daytoy a timek ti Naimbag a Pastor.”2 Sinurot ni Elizabeth ti timek ti Naimbag a Pastor ket nabuniagan ken nakumpirmaan.

Mabalintayo met ti dumngeg iti timek ti Naimbag a Pastor ket ibinglaytayo dagiti pannursurona kadagiti dadduma. Kinuna ni Presidente Monson, “Datayo dagiti ima ti Apo ditoy daga, nga addaan iti bilin nga agserbi ken mangitag-ay kadagiti annakna.”3

Kas iti panangsapul ti maysa a pastor iti maysa a napukaw a karnero, mabalin a sapulen dagiti nagannak ti maysa nga anak a nayaw-awan. Kinuna ni Presidente James E. Faust (1920–2007), Maikadua a Mamagbaga iti Umuna a Panguluen: “Kadagiti maladladingitan a nagannak a nagbalin a nalinteg, napasnek, ken managkararag iti panangisuroda kadagiti nasukir nga annakda, kunami kadakayo, bambantayan ida ti Naimbag a Pastor. Ammo ken maawatan ti Dios ti nalaus a panagladingityo. Adda namnama.”4

© 2014 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/13. Pannakaanamongna a maipatarus: 6/13. Pannakaipatarus ti Visiting Teaching Message, February 2014. Ilokano. 10862 864

Dagiti Nagadawan

  1. Thomas S. Monson, “Heavenly Homes, Forever Families,” Liahona, Hunio 2006, 70.

  2. Elizabeth Ann Whitney, iti Daughters in My Kingdom: The History and Work of Relief Society (2011), 128.

  3. Thomas S. Monson, “Ania ti Naaramidko para iti Maysa a Tao Ita?” Liahona, Nob. 2009, 86.

  4. James E. Faust, “Dear Are the Sheep That Have Wandered,” Liahona, Mayo 2003, 68.

Ania ti Maaramidko?

  1. Kasano a mangisangbay iti talna iti biagtayo ti panangammo a ti Mangisalakan ti Naimbag a Pastor?

  2. Iti ania a wagas a makapagserbitayo kadagiti “napukaw” a saanen a makimismisa iti Simbaan wenno kadagiti saantayo a kapammatian?

  3. Kasano a matulongantayo dagiti nagannak a nayaw-awan dagiti annakda iti panagbiag iti ebanghelio?