Agtutubo
Kalgaw ti Panagserbi
Agnanaed ti nagsurat iti Virginia, USA.
Maysa a kalgaw binubosko ti panawenko iti maysa a ganggannaet a pagilian nga agtartrabaho kadagiti ubbing nga addaan kadagiti naisangsangayan a kasapulan. Idi damo a maam-ammok dagiti ubbing, di nakappapati a nagnerbiosak. Diak makapagsao iti pagsasaoda, ngem nagtalekak a tarabayennak ti Espiritu kadagiti pannakisarsaritak. Idi maam-ammok ti tunggal ubing, naamirisko a ti pagsasao ket saan a tubeng iti ayat. Nakipagay-ayamak, nakikatawaak, ken tinulongak dagiti ubbing kadagiti aramidda ket diak kabaelan a di riknaen ti naan-anay nga ayat para kadakuada. Nalagipko ti ayat ti Nailangitan nga Ama para kadagiti annakna, ken di kabaelan nga iladawan ti rag-o a nangpunno iti pusok.
No agserserbiak kadagiti dadduma, mariknak ti ayat saan laeng a para kadagitay pagserserbiak no di ketdi pay para iti Nailangitan nga Ama. Pudno a naammuak a “no agserbikayo iti padayo a tao, agserserbikayo laeng iti Diosyo” (Mosiah 2:17). Ti panggep ti panagserbik, dadakkel man a proyekto ti serbisio wenno babaen dagiti babassit nga aramid ti panangngaasi, ket mangidaydayaw iti Dios (kitaen iti Mateo 5:16). Sapay koma ta bayat ti panagserbik kadagiti dadduma, mabigbigto dagiti tao ti ayatko para iti Nailangitan nga Ama ken iti Silaw ni Cristo a rumanraniag iti kaunggak.