Savali a le Au Peresitene Sili
Auauna Atu i le Alii ma le Alofa
Na aoao mai le Alii o Iesu Keriso, “Aua ai se fia faasaogalemuina lona ola, e maumau ai ia te ia; a o le faamaumau i lona ola ona o au, e faasaoina e ia” (Luka 9:24).
“Ou te talitonu,” na saunoa mai ai Peresitene Thomas S. Monson, “ua tau mai e le Faaola ia i tatou, sei vagana ua tatou faamaumau o tatou ola ona o isi, o le a itiiti se faamoemoega o o tatou lava olaga. O i latou o e ola mo na o i latou lava, e iu ina maanuminumi ma, maumau ai lo latou ola, a o i latou o e faaalu o latou lava ola e auauna atu ai i isi, e ola ma lauusiusi—ma faasaoina ai o latou ola.”1
O vaega nei mai le auaunaga a Peresitene Monson, na ia faamanatu mai ai i le Au Paia o Aso e Gata Ai o i latou o aao o le Alii ma o loo faatalitali mai faamanuiaga o le faavavau mo i latou o e auauna faamaoni atu i isi.
Auaunaga i le Malumalu
“E tuuina atu ai se auaunaga tele pe a tatou faataunuuina sauniga sui mo i latou o e ua fai i lagi la latou folauga. O le tele lava o tulaga, tatou te le masani ia i latou o loo tatou faia i ai le galuega. Tatou te le o faamoemoe foi e faafetai mai, tatou te le mautinoa foi pe latou te talia mea sa tatou ofoina atu. Peitai, tatou te auauna atu, ma i lena faagasologa, tatou te maua le mea e leai se isi taumafaiga e maua mai ai: e avea moni ai lava i tatou ma faaola i Mauga o Siona. E pei ona ofoina mai e le Faaola Lona soifua e avea ma se taulaga sui mo i tatou, e faapena foi i tatou, i ni nai fuataga laiti, tatou te faia ai le mea lava lena e tasi pe a tatou faataunuuina galuega sui i le malumalu mo i latou e le mafai ona agai i luma, sei vagana ua faia se mea mo i latou, e i tatou o loo i ai iinei i le lalolagi.”2
O i Tatou o Aao o le Alii
“Ou uso e ma tuafafine, ua siomia i tatou e i latou e manaomia lo tatou gauai atu, la tatou faamalosiau atu, o la tatou lagolago, la tatou faamafanafana ma lo tatou agalelei—pe o nisi o le aiga, uo, paaga po o ni tagata ese. O i tatou o lima o le Alii i luga o le fogaeleele, ua i ai le tiutetauave e auauna atu ai ma siitia Ana fanau. O loo faalagolago mai o Ia ia i tatou taitoatasi. …
“O lena galuega lea ua valaauina i tatou uma i ai, o le galuega a le Alii o Iesu Keriso.”3
Auauna Atu i le Ataata o le Faaola
“I le Lalolagi Fou, sa tautino mai ai e le Alii toetu, ‘Ua outou iloa mea e tatau ona outou faia i la’u ekalesia; ona o galuega na outou vaai na ou faia o mea ia tou te faia foi; aua o mea na outou vaai ua ou faia o mea lava ia tou te faia’ [3 Nifae 27:21].
“Tatou te faamanuiaina isi a o tatou auauna atu i le ata lafoia o ‘Iesu o le Nasareta … o le sa femaliuai ma agalelei’ [Galuega 10:38]. E faamanuia i tatou e le Atua ia tatou maua le olioli i le auauna atu i lo tatou Tama o i le Lagi a o tatou auauna atu i Lana fanau i le lalolagi.”4
O Le Tulaga Manaomia o le Auauna Atu
“E manaomia ona tuu mai ia i tatou se avanoa e auauna atu ai. Mo na tagata o le ekalesia ua le o toe toaaga pe ua faatuutuu ma ua leai se naunautaiga, e mafai ona tatou saili atu ma le agaga tatalo i nisi o auala e aapa atu ai ia i latou. O le talosagaina o i latou e auauna atu i ni nai mea e gafatiaina atonu o le a avea ma pogai latou te manaomia e toe malolosi mai ai ma toaaga. Ae o na taitai o e mafai ona fesoasoani atu i lenei tulaga, o nisi taimi e le fia mananao ai e faia lea mea. E manaomia ona tatou manatua pea o tagata e mafai ona sui. E mafai ona latou lafoai ni mausa leaga. E mafai ona latou salamo mai solitulafono. E mafai ona latou umia ma le agavaa le perisitua. Ma e mafai ona latou auauna atu ma le filiga i le Alii.”5
Pe o Tatou Faia Ea Mea Uma e Tatau ona Tatou Faia?
“E manaomia e le lalolagi la tatou fesoasoani. Pe o tatou faia ea mea uma e tatau ona tatou faia? O tatou manatua ea upu a Peresitene Ioane Teila: “Afai e te le faalauteleina ou valaauga, o le a faamasinoina oe e le Atua mo i latou sa mafai ona e laveaiina, pe ana fai e te faia lou tiute’? [Aoaoga a Peresitene o le Ekalesia: Ioane Teila (2001), 175]. O loo i ai vae e faatutu, o lima e uu mai, o mafaufau ia faamalosiau, o loto ia musuia, ma agaga e laveai. O loo faatalitali mai ia te oe ia faamanuiaga o le faavavau. Ua ia te oe le avanoa e lē ia matamata ai ae ia auai ai i le tulaga o le… auaunaga.”6
Aoao Atu mai Lenei Savali
“Afai e ia te oe le alofa faaKeriso, o le a e saunia lelei e aoaoina atu le talalelei. O le a musuia oe ina ia fesoasoani atu i isi ia iloa le Faaola ma mulimuli ia te Ia.”7 Mafaufau e tatalo mo le faateleina o le alofa moni mo i latou o loo e asia. Ao e atiina ae le alofa faaKeriso mo i latou, o le a mafai atili ona e auauna atu i ni auala anoa i le Alii ma i latou e te aoaoina.