Mwanangan Mamá Sefi nakon te Tembora
Betty Ventura, Utah, USA
N te bong teuana ngke I mena n aobitin te Mition i Mexico inanon te ririki ae 1940 tabun, te titita ae e roko man te taun ae uarereke mai Ozumba, are e mena mai inanon Popocatépetl, te warekano ae maiu ae tao 43 te maire raroana (70 km) meangmainikun te kaawa ae Mexico. Ti bane ni kina neiei. Arana bon Mamá Sefi.
A maeka ni mweengana ae kateaki man te buriki are e karaoaki man te tano ao te uteute ae tawaki ae uarereke are a maeka iai mitinare aika bwanin aia tai, are e aki toki ni kakawakina ana ruu bon tii ibukiia. Mamá Sefi, e aki nang roko n te abwabwaki ae 5 te buti (1.5 m) abwakina, e karekea boon maiuna man kabonakoan ana uanikai n te mwakete n te taun ae uakaan ma Ozumba. Taun ni kabane a kakaokoro aia tai ni mwakete n te bongina, ao e katoatai ni kaei mwakete ni kabonakoi ana uanikai.
E rinnako inanon aobitin te mition n te bong anne n uouota te baeki ae bubura ni burawa. E onrake n totiton, mwane ae tirewa ae te itera n peso are e a tia ni kakawakinna inanon ririki aika a mwaiti. Tabeua mwakorokoro a roko n ana bong Porfirio Díaz, are e tautaekana Mexico man 1884 nakon 1911. Mamá Sefi e a tia ni mwananga mai Ozumba nakon mweengan te mition n te bwati ma ana buua ni mwane. E tuanga Beretitenti Arwell L. Pierce bwa e a tia ni kakawakina te mwane inanon ririki aika a mwaiti bwa e aonga ni kona ni mwananga nakon te Salt Lake Tembora bwa e na karekea ana entaumente.
E karekea te kariaiakaki ni kitana te aba, te mitinare e anganna ana tutikeeti bwa e na tangoia, ao e kairia nakon te turein. Beretitenti Pierce e tareboonia temanna I El Paso, Texas, bwa e na kaeka te turein are e rinuukan te tia n te US ao ni katoka Mamá Sefi iaon te bwati nako Salt Lake City. Membwa n te mwaanga ae taian Spanish i Salt Lake a kaea te bwati bwa a na kaitibo ma ngaia, ni kawakinna ni kairia nakon te auti are e na maeka iai, ao ni buokia nakon te tembora.
Tabeua te wiiki imwiina, Mamá Sefi e oki rikaaki nakon te Kaawa i Mexico ao imwiina e okira mweengana i Ozumba. E a tia ni kawakinaki raoi inanon te mwananga ae abwabwaki. Imwiina e a manga okira kabonakoan ana uanikai n tabo ni mwakete.
Mamá Sefi e memere ana taetae n Imatang, ngaia are ti titirakinna bwa e kanga ni kona n otana kanana ngkana e toka n te bwati mai El Paso nako Salt Lake—te mwananga inanon tabeua te bong ngkai e kabi n taetae n Imatang. E taku bwa e reireinna temanna aron atongan “te aboro bwaai”, ngaia are ni katoa tai e tei te bwati, e na bae n otana kanana te aboro bwaai.
Ibukina bwa bon tii akanne taeka aika e bwati n taekinana n Imatang,ai bon ti kakanana te bwaai n aboro inanon mwanangana—nako ao n oki. Ma e aki tabe iai Mamá Sefi. E kukurei riki n okina ibukin te namakin ae tamaroa are e a tia n rinanona n te tembora.