“Tera ae N na taekinna nakoia aika tiaki kaain te aro ake a titiraki bukin tera tabeman kaain te Ekaretia a aki maiuakin ara kainibaire?”

E na rangi ni kamiimi ngkana a bane ni maiuakina te euangkerio raoi kaain te Ekaretia. A na aki ti kimwareirei ma ana kakabwaiaki riki inanon maiuia ao n riki bwa katooto aika tamaroa nakoia ake irarikia. Ma ti bon mamate, ngaia are ngaira ni kabane iai tabeua kabwakara. Oina ni koaua bwa tabeman a maiuakina te euangkerio raoi nakoia tabeman bon aio bwa a kakaokoro taai n rairakira ao inanon korakoran ara kakoaua. Iai iroura kataakira aika kakaokoro ao taabo ao aomata aika kakaokoro ni buokiira.

Ake tiaki kaain te aro a na kona n aki oota n taeka n aiaron “rairaki” ao “kakoaua,” ma a oota bwa ngaira n tatabemaniira ti kona n rinea arora ni maiu. Ko kona ni kabwarabwara bwa te Tama are i Karawa e kantaningaia kawaina anne. E anganiira inaomatara n rinea ae eti ao ae bure bwa ti aonga n rikirake n te tamnei man rinean ae tamaroa. Ma te Tama are i Karawa e ataia naba bwa aomata ni kabane—ma tii Iesu Kristo—ae a na karaoa te kairua, ai ngaia are E a karekea te Tia Kamaiu ibukira. Ibukin te Mwakuri ni Kamaiu, ti kona n rairinanora, kabwara bure, n reirei man ara kairua, ao ni waaki rake ni maiura.

Ko kona naba ni kabwarabwara bwa ti aki motikitaekaia ake a aki ira ana kainibaire te Ekaretia. N onea mwiina, ti kataia ni buokiia, n ataia, ao n taotaona nanora ma ngaia. Ngkai ti bon aki kariaia te bure, ti aki kabuakaka te tia bure (tara Ioane 8:11). Te rairannano e bon teimatoa ni kona n riki, ibukira ni kabane.

Kakaae ni Booki aika tabu

Te kaeka nakon te titiraki e kona ni kuneaki inanon booki aika tabu. Ngkana aomata a aki kawakin tuua, ti riai n aki kabuakaka (tara Mataio 7:1). I-Rom 3:23 e taku, “Bwa a bane ni bure, ma n aki karekea te neboaki mai iroun te Atua.” E ngae n anne, e bon koaua bwa kaain te Ekaretia a riai ni kataia n ongotaeka.

Madison M., ana ririki 13, Texas, USA

Anga reirei ibukin te Mwakuri ni Kamaiu

Ngkana aomata a taekini bwaai n aroia akanne, nakon are kakaean kairuan te membwa are e aki irii tuua, I kabongana bwa te tai ae riai n anga reirei ibukin te Mwakuri ni Kamaiu. I tuangiia bwa ngkai ngaira kaain te Moomon tiaki nanona bwa ti kororaoi ao bwa iai iroura te Mwakuri ni Kamaiu ai ngaia are ti kona n rairananora man ara bure ao ni kaitiakiira man buure akanne. Aio e tataneiai te aba bwa e na kauka te mataroa nakon titiraki riki aika bati.

Jayde H., ana ririki 16, Oregon, USA

Te Ekaretia e Reireiniira ni Karaoa ae Tamaroa

N aiarora ni kabane, kaain te Ekaretia a rinanon kakaewenako ao kairiri. Ngaira ni kabane bon iai mamaarara, ma tiaki nanona bwa te Ekaretia e aki koaua. Aio bon ana Ekaretia Iesu Kristo, are e buokiia aomata n ata te euangkerio ae koaua ao ni karekea te karietataaki. Bon te aro n aomata ae e aki ongotaeka n taian tua (tara Motiaea 3:19), ao tiaki ana kairua te Ekaretia. Te Ekaretia e reireiniira bwa ti na karaoi mwakuri aika tamaroa. Ma ngaira ni kabane iai ara rinerine.

Lavinia S., ana ririki 19, Bulacan, Philippines

Kainibaire Bon ibukin Kukureira

Te titiraki aio I aki toki ni kakaitibo ma ngaia ibukina bwa I ataia tabeman aomata ake a tia ni karaoa aia rinerine are e a tia ni uotinako man te euangkerio. Te Uea e anganiira tuua ibukin kukureira ao ni kakoroa bukin te aki mamate ao te maiu are akea tokina iroun te aomata (tara Moses 1:39). Te Uea e tangiriira bwa ti na okiria; e ngae n anne, E tangiriira bwa ti na karaoi oin ara rinerine. Anne bukina ae tabeman aomata a aki maiuakina ara kainibaire. Te kainibaire e buokai ngai ibukina I ataia bwa te Tama are i Karawa e a tia n anganai n te aro bwa I kona n okiria ao ni maeka ma Ngaia ao n riki ni kukurei. Bon kakoauan Ana tangira ibukiu.

Morgane D., ririki 18, Languedoc-Roussillon, France

Maiuakina Ara Kainibaire

N aiaron botaki tabeua ke aaro, iai tabeman aomata aika a rangi ni kakaonimaki riki ke aki bati ni kakaonimaki. Ti na bon tii maiuakina ara kainibaire n te kabanea n tamaroa are ti kona ao ni kantaninga ao n tataro ibukia tabeman bwa a na karaoia naba.

Maren S., ririki 16, Arizona, USA

Tataro ibukiia ao Kawariia

Membwa ake a aki maiuakina ara kainibaire a na kona n akea aia kakoaua ae boboto iaon Iesu Kristo. Ti riai n tataro ibukiia, bwa a na kakaea ana kairiiri te Tamnei ao bwa a na kona ni karekea oin aia kakoaua. Ti riai ni kawaria aomata aikai ao ni buokiia n nakon Kristo.

Andrea C., ririki 13, Lima, Peru

Riki bwa te Katooto

Te Ekaretia aio e kakawaki ni buokiira ni kakoroi tuua mai iroun te Tama are ii Karawa ao ni maeka ma Ngaia riki. Ma ti ibukina bwa temanna e kaaina te Ekaretia tiaki nanona bwa teuanne ke neienne e na riki n taainako bwa te aomata ae raoiroi. Tara ara aonaaba n te bong aio, e onrake n te buakaka ao te riribai, e ngae ngke te aonaaba e onrake ma aomata ake a baireia bwa a na ira Iesu Kristo n te maiu are i mwain aio. I taku bwa te bwai ae te kabanea n tamaroa are ti na kona ni karaoia bon karaoan te katoto ibukia raoraora.

Kaden S., ririki 15, Utah, USA