Ibukin Kakorakoraia Kairake
Kakorakorako, Kamarurungko, Kawanawanako
Ko tangiria n namakina te tamaroa riki ao n koaua riki n rabwatam ao n am iango? Te kamarurung n tai nako e na ibuobuoki.
I a tibwa tia ni wareka te koaua teuana i aon te kamarurung. I warekia bwa ngkana ko utimwaaka n te moan ingabong, ko karin oneam ni kamarurung, ao n iango “N na ti bwaina aei, I otinako n rianna, ao ngkana I namakina te nakoraoi, N na moanna ni biri ni karaurau,” ko na tara ni karekea te kamarurung ae tamaroa i mwaain ae ko ataia. N reken te baire ae bebete n aron aei e kona n ibuobuoki nakoim ni karikirakea te kamarurung ae tamaroa ao te tararua ibukin rabwatam. Irouia aomata aika mwaiti, te moan waki ao kateimatoan karaoana bon te itera ae kaangaanga. Ngkana ko uringnga bwa te kamarurung e kakabwaia tiaki ti nakon rabwatam ma am iango ao am kaburoro, e na buokiko ni karekea te nano ni kan karekea riki marurungin te rabwata. Ngkai ko kamarurung, ko na riki bwa te aomata ae korakora ae namakina te korakora, te mwengaraoi, te tatauraoi, ao te kamanoaki.
Ko na tai riki bwa te mannikiba ae taningaroti are e iokinibwaia buraena ibukiia mwata.
Kamatata n te tamnei iroun Greg Newbold
I uringa karakinan te manikiba are e waaki n rairi buraena ibukin te mwata. E bebete aron karekean te amwarake n te aro anne, ao te mannikiba e taku bwa e mwaiti buraena. Ngke e reitinako n rarairi buraena, te mannikiba e irananona n aki kakautimwaka ni kakai kanana. E tekateka iaon ngaona ni katoabonga ao e aki kakamarurunga. Ni bon tokina, te mannikiba e a taneiai n te aro aei ao e a ataia bwa e aki kona ni manga kiba ibukina bwa a bua buraena ake moan te kakaawaki.
Aio e kona n riki nakon temanna are e bwaka i nanon te bwai ni kamwane n anua aika buakaka, waki n taningaroti, ke kabonganakin bwai aika kareke. I nanon Kakorakoraia Kairake ti warekia bwa bwai aikai a kona n “urua marurungin rabwatam, te iango, ao maiuraoin te tamnei. A urua te reitaki n te utu ao rao ao a kamauna am namakin n kakawakim ibon iroum. A tiana am konabwai ni karaoi rinerine ibon ibukim”1 Te kakamwakuri ao kanakin amwarake aika riai e buokiko n totokoi anua aika bubuaka aikai. Ngke arona bwa te mannikiba e reitinako ni kiba ao n akawa, e na bon aki kabuai buraena. N ai arora, ngkana ti “kabonganai ara mwatireti” ao ni kamarurung n tainako, ti karikirakea te kona n totokoi ananga ni kabuanibwai ao ni kamamara nakoira.
N ai aroia tabeman aika iai aia kaangaanga ma marurungin rabwataia, tabeman iai aia kaangaanga ni marurungin aia iango. Te maiu e kona ni kaangaanga, ao n tabetai e na kona n reke iroura te namakin n nakonnano, n nanokawaki, ke ni kerikaaki onimakinara ibon iroura. Ma uringnga bwa ibukin marurungin te rabwata ao te iango, te mwakuri ni kamarurung ao te mwakuri korakora e ibuobuoki ni kateimatoa te taratara ae tamaroa. Kawakinan rabwatam e kakabwaia naba am iango ao e kakabwaia am iango ni buokiko n uringnga bwa ngkoe natin te Atua ao ko na mwengaraoi mani kukurei. Ara iango, rabwatara, ao tamneira a bane ni irekereke ni kabane. Ibukin Kakorakoraia Kairake e reirei: “Marurungin am iango e kakawaki naba ao e kona n roota maiuraoin tamneim ao rabwatam. Te bwarannano ao te nanokawaki ae ririki bon iteran te maiu ae mamate aei. E ngae n anne, ngkana ko kamaana te namakin n nanokawaki, bwarannano, nakonnano, ke n rawawata, maroro ma am karo ao am bitiobi ao karekea te ibuobuoki.”2
Bukin tera ngkai ti nooria aomata ni katobibira aika tara n rangi ni korakora ao ni kimareirei? Teuana bukina bon te anua. Ngkana ti tarai rabwatara man ana taratara te maiu n tamnei ao n ataia bwa aio “te tembora, te bwaintangira mai iroun te Atua,” ti na tangiria ao ni kawakinna ni katabua.3
Irou, tabu nanona e itiaki, maiuraoi, ao korakora. Teuana man kawai ake e buokira iai Tamara are i Karawa ni kawakin rabwatara bwa a tabu bon man anganakira Taekan te Wanawana. Ibukin Kakorakoraia Kairake e kabwarabwara: “Ngkana ko ongotaeka nakon [Taekan te Wanawana], ko teimatoa n inaaomata man anua aika kakamaku ake a na kona n tautaekana maium. Ko karekea te kakabwaia ni marurungin te rabwata, te iango ae tatauraoi, ao ana kairiiri te Tamnei ae Raoiroi. Ko na tatauraoi ni beku ibukin te Uea. Tai kariaia Tatan ke tabeman bwa a na mwamwanaiko n iangoan uruakakin Taekan te Wanawana bwa e na kakukureiko riki, ko na tatangiraki riki, ke ko na tamaroa riki.”4 Ngkai ko ira nanon Taekan te Wanawana, uringnga bwa ko kawakin rabwatam ao am iango ao e na reke iroum “karekean te wanawana ao kaubwain te atatai” (D&C 89:19).
Onean mwin te riki ni mannikiba ae taningaroti n iokinibwaia buraena, karin am kau n teneti ao kakamwakuri. Kamarurung n tai nako. Karina aram n am takaakaro ae ko tatangiria ke karekeiia raraom ake ko kona ni biri ke ni karaoi waki ni kakukurei riki tabeua ma ngaiia. Ngkana ko karaoi waki ni kamarurung, ko kataneiiai tiaki ti nakon rabwatam ma bon am iango naba. Te kamarurung e kamarururnga am iango naba. Uringa bwa te bwai ae moan te kakawaki tiaki bwa birimwaakara ke kona riki bwa te tia takaakaro ngkoe—e taraki bwa kakaonimakira ngkoe. Ngkai ko kamarurung n tai nako, ko na bon aki ti kukurei ma ko na rikirake naba ni korakora, marurung ao n timwati riki.