Buoka Violet

Iroun Charlotte Mae Sheppard

E boboto i aon te karaki ae koaua

“Ko na tangira raom n ai aron tangiram i bon i roum” (Mareko 12:31).

E na kanga Emma n riki n raoiroi ngkana Violet e bon buakaka?

Emma e kamatoa baina i aon ana baekibaeki ngke e a rinnako nakon nanon ana umwanreirei ae boou. Bon te moa ni bong n te reirei. Are i aona bon ana kunnikai ae tatangiria, ao Tinana e a tia ni katauraoa kanana ae onoti ma ana katawanou—berena aika katooton taian man.

“Te bong aio e na rangi n tamaroa,” Emma e iango inanona. “N aron ae—”

Emma e toki ao e tara iteran te umanreirei. Are e mena ikekei. Violet.

Te ririki ae nako, Violet e a tia n takakaro n taian kaibiti are ko kona n tamarake iai ni katoa bureiki n tii ngaia. E a tia ni wetea Emma n ara aika bati. E a tia naba n iraea raoraon Emma ae e rangi n tatangiria!

Violet e nora Emma ao e kaotinakoa newena. Emma e taraia ma te un, ni kona ni kamatoa riki ana baekibaeki. Violet e a tia n aki rangi n iraorao ni kabane te ririki ae nako, ao e tara n ae n te ririki aio a na akea te bitaki.

“Mauri nakon te ririki ae boou, kiraati!” e taetae Nei Caldwell i moan te ru. “Ti a bairei kaintekateka.”

Taian tetike a karainiaki i nanon uoua rinan n te umanreirei. Nei Caldwell e kabuta baina iaon taian kaintekateka; imwiina e kotea taian tetike mai ibuki. “Emma. Ko na tekateka i buki ikekei.”

Emma e tekateka i aon te tetike are i buki. E kantaninga bwa Liselle e na tekateka i rarikina. Ke Jaime. Ke‒

“Violet.”

Atun Emma e kawekoa n tabekiarake. E koaua ana kakauongo?

Eng. Nei Caldwell e bon teimatoa ni kotea te tetike irarikin ana tetike. “Ko na riki bwa raon Emma, Violet,” e taku.

Violet e karaurau ni mwaing ma te mata ae e aki kukurei. Emma e katoka atuna i aon ana tetike ao ni karekea taraan te o. E na riki bwa te ririki ae abwaabwaki.

N tain te Numera, Nei Caldwell e korei tabeua aia numera i aon te burakiboti ibukin te kiraati bwa a na kakaea rekena. “Ko kona ni mwakuri n tii ngkoe ke ma raom,” e taku.

Emma e waekoa ni baraki iaon ana beba, angkoa are e bon tabetabe. Bwaai ake a na karaoi a bon rangi ni bebete. E bon kataia n aki mutiakina Violet. E tuai n taraia teuana te tai ni kabane te ingabong.

Iai te bwai teuana ae totokoaki nakon angana. E namakinaki n ai aron te bentira. Emma e aki tabeakinna.

E a manga notuaki riki. Bon Violet ae e notuia! Emma e teimatoa ni mwakuri n taua arona.

Ana kateniua n notu Violet e a bon matoa ni kammaraki. Emma e a namakina ae rikirake unna. Ngkai te ririki ae bwanin ai arona aio? E iangoia ni katea baina n tuanga Nei Caldwell. Ke tao e na tii manga karekea taraan riki Violet.

Ngkanne Emma e ongo te tang ae karaurau. Iai ae e tang? Te bentira e a manga notuaki riki. E taraia rake ao e nora Violet ni kaitara moana. Ana bentira i nanon baina, ao iai rannimata i nanon matana. Ana beba e onrake ma barekan te bwainikamauna.

Violet e kaminoa te bentira i nanon baina. “Ko kona ni buokai?” e titiraki ni karaurau.

Emma e taraia teuana te miniti, ao e tiaoki. Violet e tangiria bwa e na buokia? Imwiin ae e a tia ni buakaka n tainako? Emma e okirikaki nakon oin ana beba. Violet e kona ni mwakuri i bon irouna. E aki riai ni karekea ana buoka Emma, e ngae ngkana e bon kainnanoia …

… kaain rarikina?

Emma e aki kakarongoa n tara moaa. E kona n ongo tangin Violet ni karaurau irarikina. Booki aika tabu a aki toki n taekina ae ko na tangira kaain rarikim—ma Violet e bon kaokoro! Emma e bon tii tekateka irarikina i nanon te kiraati!

Emma e oki rikaaki nakon oin ana mwakuri. Ngkanne e katoka ana mwakuri. Tao Violet e bon aki kaokoro. Tao ngke booki aika tabu a taku bwa ko na tangiria kaain rarikim, a nanonna bwa ni kabane aomata. E ngae ngke aomata aika buakaka. E ngae ngkana e bon matoatoa.

Emma e ikerake ao ni kaotinakoa te ang ni kabaibati ao ni karaurau ni katuka ana bentira. E rairaki nakon Violet ao ni kata ana kabanea n tamaroa ni moangare. “I kona n ibuobuoki?” e titiraki.

Violet e katoutoua atuna, ni kaoi rannimatana ma baina.

Emma e rara iaon ana beba Violet ao ni moana buokana ma te moan kangaanga. E a tia ni karekea te namakin ae tamaroa i nanona. E mimi ngkana Violet e tangira te kuuki.