Mulimuli i Ona Tulagaaao

Saunia e Melissa Zenteno

Mekasini a le Ekalesia

O le avea e faapei o le Faaola o se faagasologa faifaipea, o le olaga atoa, ma e mafai ona e amata i le faia o ni laa laiti i aso uma.

Christ walking with sheep in the background.

Ua fautuaina i tatou e tusitusiga paia ina ia avea faapei o Iesu Keriso ma “savali, … faapei ona savali o ia” (1 Ioane 2:6). Ae e mafai ona faigata lena laa muamua—ae maise lava pe afai e te le iloa le auala e amata ai.

O le a e maua se fesoasoani i le Talai La’u Talalelei: O Se Taiala mo le Galuega Faafaifeautalai. Atonu e te manatu ua na o se tusitaulima mo faifeautalai faamisiona, ae o le mea moni o se meafaigaluega maoae e mafai ona fesoasoani e te amata ai i lau sini o le avea faapei o le Faaola. O le mataupu e 6 ua mamanuina e fesoasoani ia te oe ina ia malamalama ma faaaoga ia uiga faapitoa faaKeriso e iva.

O nisi nei o fautuaga mo le auala e faaaoga ai le Talai La’u Talalelei ma tusitusiga paia a o e saili e atiina ae uiga faa-Keriso:

• Ina ia amataina, alu i le Gaoioiga o Uiga i le faaiuga o le mataupu e 6 i le Talai La’u Talalelei (itulau 135). E mafai ona fesoasoani lenei gaoioiga ia te oe e fuafua ai po o fea o uiga o avea i le taimi nei ma ou malosiaga faaleagaga ma po o fea [o uiga] e manaomia ona e galue i ai.

• A uma le gaoioiga, filifili ma le agaga tatalo se uiga taua e taulai atu i ai. Mafaufau e faitau le vaega i le mataupu e 6 e faatatau i lena uiga taua.

• Seti ni sini patino, e mafai ona fuaina o le a fesoasoani e atiina ae lenei uiga taua. Tuu atu ia te oe se taimi faatapulaa e galue ai i lau sini. Ona iloilo lea o lou alualu i luma. Mo se faataitaiga, afai o loo e taumafai ia sili atu le agaalofa, atonu e mafai ona e setiina se sini e fai atu ni upu lelei e uiga i lou uso po o lou tuafafine e faatolu i aso taitasi mo se vaiaso. I le faaiuga o le vaiaso, e mafai ona e iloilo ai pe na faapefea lau sini ma faia ni fetuunaiga o le a fesoasoani ia te oe e faaauau ai pea ona faaleleia atili.

• O le Tala’i La’u Talalelei ua tuuina atu ai mau e suesue faatasi ma uiga taitasi. E mafai ona e suesue ma le agaga tatalo i mau o loo lisiina atu ma tusi i lalo ni uunaiga e te maua a o e faitauina.

• Ole atu i le Tama Faalelagi mo se fesoasoani i le atinaeina o se uiga faa-Keriso. Ole atu mo se fesoasoani faapitoa e pei o le, “Faamolemole ia tuu mai ia te au le malosi e foia ai lou ita pe a ave e o’u tei au mea. O le tele lava o le patino o au tatalo, o le faigofie atu lea o lou iloaina o tali a le Alii.

O le avea e faapei o lo tatou Faaola, o Iesu Keriso, o se faagasologa faifaimalie ma se tuliloaga o le olaga atoa. O nisi taimi atonu e foliga mai e sili atu ona faigata nai lo le tulaga maualuga o le fisiki. Ae aua le faanoanoa. Na folafola mai e le Alii ia i tatou: “O Ia o le a mauaina le malamalama, ma tumau pea i le Atua, e mauaina le malamalama atili, ma o lena malamalama o le a tupu susulu malamalama tele pea lava pea seia oo i le aso e atoatoa ai” (MF&F 50:24). Ao tatou maua, suesue, ma faaaoga le malamalama ma le upumoni ma faaauau pea ona mulimuli i le Atua i aso taitasi, e mafai ona faamautinoa i tatou o le a avea atili i tatou e faapei o lo tatou Faaola, o Iesu Keriso.

Sailia o le Tasi, saunia e Liz Lemon Swindle, e le mafai ona kopiina; ata na tusia © Shayla Marie Fursov; tuaata © iStock/Thinkstock; filigrees © Hemera/Thinkstock

Galuega i Aso Uma

O faatinoga laiti i aso uma o tulagavae ia i le ala e avea ai e faapei o lo tatou Faaola.Mafaufau i gaoioiga faaopoopo nei e fesoasoani ia te oe e atiina ae ai uiga faa-Keriso:

• Faitau mau o loo lisiina i le Faasologa o Autu po o le Taiala i Tusitusiga Paia e faatatau i le uiga o loo e sailia e atiina ae.

• Tatalo i aso uma mo le naunau ia suia ma le malosi e faaleleia ai.

• Ia tausia se api o talaaga e faamaumau ai lou alualu i luma.

• Talanoa i ou matua. Faailoa ia i laua au sini ina ia mafai ona la fesoasoani ia te oe.

Auai i le Talanoaga

Ia Oketopa atoa, o le a outou suesue ai e uiga i le avea atili ai faapei o Keriso (pe afai o i ai i lau uarota po o le paranesi ia lesona fou i lau gagana). A uma ona faitau le tusiga lenei, filifili ma le agaga tatalo se uiga e galulue ai i lenei vaiaso po o le masina. E mafai ona e faatuina se sini ona iloilo lea o lou alualu i luma. Mo se faataitaiga, Pe na sili atu lou agaalofa po o le usiusitai po o le onosai? Na faapefea ona fesoasoani lau sini o le avea atili faapei o Keriso e foia ai faafitauli? Mafaufau e faasoa atu sou aafiaga i isi talavou po o lou aiga.

Lesona i Aso Sa

Autu o le Masina Lenei: Avea Atili e Faapei o Keriso