O Se Pusa o Ata

Cindy Heggie, Alberta, Kanata

I ni nai tausaga ua mavae, na ma sasaaina ai ma lo’u toalua se uta lapisi i le nofoaga i le lotoifale e tiai ai lapisi, ae ou matauina ai se tasi o tamaitai e galue ai iina na ia pikiina i luga se pusa e togi i totonu o le masini e susunu ai lapisi. Na faafuasei ona matala le pusa, ma toulu mai ai i fafo ni ata.

A o ou vaavaai atu i ai, sa ou maua se uunaiga malosi ou te alu e aumai lena pusa o ata. Sa ou oso i fafo mai le taavale e fesoasoani i le tuua’eina i luga o ata. Na ma tau fai lagona ma le tamaitai e masalo ua tiai sese ia ata, ma sa ou tauanauina o ia e tuu mai ia te au ia ata ou te taumafai e saili se tagata e manao i ai.

O le lagalagaina o le fiaselau o ata sa i le pusa, sa ou maua ai se teutusi na faatuatusi i se tagata i Warburg, Alberta, Kanata. I le aluga o le ni tausaga na sosoo ai, sa ou tusi atu ai ni nai tusi i tagata e tutusa faaiu, ae ou te le’i mauaina lava se tali.

Ina ua i ai le Initoneti i lo’u aiga, sa ou iloa ai o loo i ai se sosaiete anamua i Warburg. Sa ou fesili pe i ai se tagata e galue ai iina e iloaina ia igoa ia sa ou maua i tua o ata.

E tasi le masina mulimuli ane ae matou maua se valaau mai se tamaloa sa faafesootai e le sosaiete anamua. Sa fai mai o lona tuafafine e nofo latalata i le mea o loo ma i ai, ma sa talosaga mai pe mafai ona tilotilo lona tuafafine i ata. Ioe sa ma fai atu ua lelei.

O le aso na sosoo ai, na o mai ai Floyd ma Beth Hawthorn, o i laua uma o ni tagata o le Au Paia o Aso e Gata Ai, e tilotilo i ata Ina ua ou tatalaina le pusa, sa fai mai Brother Hawthorn, “Ia, vaai ia lele,” a o tusi atu lona lima i le ata na pito i luga. O se ata o le tamamatua a Sister Hawthorn.

A o la tuu a’e i luga lea ata ma lea ata, na faamatala mai e Brother ma Sister Hawthorn ni tala e uiga i tagata o loo i ata taitasi. E le talitonu le au Hawthorns e i ai so latou sootaga i le tagata sa tia’ia ia ata, ma e la te leiloa pe na faapefea ona oo ia ata i le nofoaga e tiai ai lapisi.

E malosi lava ou lagona na fesoasoani le Tama Faalelagi ia te au e toe faafoi atu ata i le aiga o Hawthorn. Ou te molimau atu o le galuega o talafaasolopito o aiga o se tasi o galuega aupito sili ona taua e tatau ona fai. Afai tatou te naunau e faia le galuega, o le a fesoasoani le Alii ia i tatou i le faiga.