O Auala e Sefulu e Iloa Ai Ua E Liua

Saunia e Tyler Orton

O Tyler Orton e nofo i Java, Initonesia.

Ata

Sa ou aoaoina i sauniga perisitua e faapea, o se tasi o faamoemoega o le Perisitua Arona o le fesoasoani lea ia i tatou ia “liua i le talalelei a Iesu Keriso ma ola i ona aoaoga.”¹ Sa ou le mautinoa po o le a le uiga o le “ia liua i le talalelei a Iesu Keriso.” Sa ou fesili atu i o’u matua ma nai ou tei matutua po o a ni o latou manatu i lona uiga, ma sa matou talanoaina faatasi i ni auala e mafai ona e iloa ai ua e liua.

Atonu e i ai foi ni isi auala, ae e 10 ni auala sa matou mauaina. Talu ai o le liua o se faagasologa i le olaga atoa, o lea e le faapea ai ia tatou atoatoa i nei vaega taitasi i le taimi nei, ae e mafai ona fesoasoani tatou te iloa ai pe o tatou alualu i luma.

A e liua, e le gata ina e iloa le mea e tatau ona e faia, ae e te manao foi e fai mea sa’o. E le lava le na ona taumafai e aloese mai le faia o mea sese ona e te fefe i le maua o oe pe faasalaina. A e liua moni, e te manao moni lava e filifili le mea sa’o.
O le isi faailoga o le liua o le, ua le toe i ai sou manao e fai mea sese. O Aneti-Nifae-Liae o se faataitaiga sili lea o lenei vaega. Ina ua latou liliu mai i le talalelei a Keriso, sa latou “ulu atu foi i latou lava i se feagaiga ma le Atua e auauna atu ia te ia ma tausi i ana poloaiga” (Mosaea 21:31). E pei o sa Nifae sa aoaoina e le Tupu o Peniamina, sa “le toe i ai so [latou] manao e fai mea leaga” (Mosaea 5:2). Sa latou liliu moni i le talalelei a Keriso, ma o faaosoosoga a Satani sa leai so latou mana ia i latou.

Ata

Ina ia faaalia o le a latou faamaoni i a latou feagaiga e ola i le talalelei, sa tanumia ai e sa Lamana na liua a latou auupega (tagai i le Alema 24).
A e liua, e sili atu lou popole i le mea e finagalo ai le Atua nai lo manatu o isi tagata e uiga ia te oe. I la’u aoga i Initonesia, e matele lava tamaiti aoga ina inu ava malosi. O nisi taimi e taufaaosooso lava le o e pati pe afai o loo fai uma e isi tagata ma taufaifai mai ia te oe ona o lou le alu. E tele taimi sa valaaulia ai lo’u uso e inupia ma pati, ae na te le’i faia lava—sa tu atu o ia mo le mea sa ia talitonu i ai. Sa faigata, ma sa ia faaaluina le tele o po e nofo toatasi ai i le fale. Ina ua faamavae ma faatofa tamaiti aoga i lona faauuga, sa faasoa mai e nisi o tagata ia te ia lo latou maofa i lona mafai ona tetee atu i faatosinaga a le tupulaga ma tumau faamaoni i ona tulaga faatonuina. Sa latou ta’u atu ia te ia le maualuga o la latou vaai ia te ia ona o lena mea. Sa ia faaalia sa liua o ia e ala i le tetee atu i faatosinaga a le tupulaga.
A liua, e te taumafai e le aunoa i le mea sili e te mafaia e ola i le talalelei—e le na o Aso Sa po o le pe a talafeagai foi ae o taimi uma lava. E le suia au amioga ona o le tagata o loo oulua i ai faatasi po o le tagata foi o loo ono mata’ia oe. A faamatala e lau tupulaga se tala tausua le migao pe manao e matamata se atatifaga leaga, e te le alu atu ai ma oe ona e leai se tasi o vaavaai atu; nai lo lena e te tu atu mo le mea ua e talitonu i ai.
Ata

A e liua, e sili atu lou agalelei ma le agaalofa i le taulimaina o isi. E te le faamasino atu pe faitio pe faitatala. Ua sili atu lou magafagafa i lagona o isi, ma e avea o se mea masani le vaavaai mo ni auala e auauna ma fesoasoani atu ai. Afai e te savali atu i le faletele o la outou aoga ae toulu ni tusi a se tagata, e te le tau mafaufau po o le a se mea e te faia. E otometi lava ona e tu e fesoasoani atu.
Ata

A e liua, e faateleina lou naunau e tatalo ma e te lagona le pei o loo e matuai fesootai atu i le Atua pe a e tatalo. O le a e faaavanoaina e le aunoa le taimi e tatalo ai e tusa lava pe o a ou lagona po o le a foi se mea o loo tupu i lou olaga. Na ta’u mai e Peresitene Ezra Taft Benson (1899–1994) ia i tatou, “Afai tatou te le fia tatalo, ona tatau lea ona tatou tatalo seia oo ina tatou lagona le fia tatalo.”²
A e liua, e te tulimatai atu i le Aso Sa aua o le Sapati. A oo mai le Aso Sa, nai lo le mafaufau, “Oi sole, o le aso e le mafai ai ona matou tafafao ma a’u uo pe o i le tifaga,” e te mafaufau, “Manaia tele, o se aso e mafai ai ona ou alu i le lotu ma taulai atu i mea faaleagaga ma faaalu le taimi faatasi ma lo’u aiga!”

Ata
A liua, e te tausia poloaiga ma e te le suea ni ‘alofaga, fetuunai amioga, pe taumafai e sue ni itu e faaletonu ai. E te le taumafai e sopo tuaoi; e te tausia lava poloaiga ona e te iloa o le auala sili lea.
Ata

A e liua, e te tulimatai atu i le totogiina o lau sefuluai. E te vaai i ai o se faamanuiaga ma lagona ai o le 10 pasene e le o se mea telē, ae maise pe a faatusa atu i faamanuiaga ma le lotomalie e te maua. O nei faamanuiaga e sili atu lava nai lo le tupe e te totogiina.
Ata

Afai ua e liua, e i ai sou naunautai malosi e fesoasoani atu i isi ia iloa le upumoni ma le fiafia ua e maua. O se faataitaiga lelei lava mai tusitusiga paia o le miti a Liae, lea sa i ai sona naunautai malosi ia faasoa atu i lona aiga le fua suamalie o le laau o le ola. Ina ua ‘ai o ia i le fua [o le laau], o lona manatu muamua lava sa le o le ave o nisi fua mo ia lava ae ia vaai lona aiga ina ia mafai ona latou tofo i le fua ma maua ai lea lava fiafia e tasi (tagai i le 1 Nifae 8:12).

O le aotelega, e te iloa ua e liua pe a amata ona e ola i le tulafono maualuga atu, o le talalelei a Iesu Keriso. E te ola i le agaga o le tulafono faapea foi ma mataitusi o le tulafono. E te ola i le talalelei i vaega uma o lou olaga. E te ola i le talalelei i lona atoatoa, e le faapea ona e tatau lava ona e ola ai ae ona e te manao ai. O oe o se tagata ua sili atu lou fiafia ma lou lelei, ma e te manao e avea ma tagata e finagalo le Tama Faalelagi e avea ai oe. E te manao e faapei o Iesu Keriso ma mulimuli i Ana faataitaiga. A e avea e faapei o lena tagata, ua e liua moni lava.