Vaiaso o le Eseta
Sa faataunuuina e lo tatou Faaola o Iesu Keriso le Togiola—lea na aofia ai Lona mafatia i Ketesemane, Lona Faasatauroga i Kolokota, ma Lona Toetu mai le tuugamau—i le vaiaso faaiu o Lona soifuaga.
I le Fono i le Lagi ao le’i foafoaina le lalolagi, sa faailoa mai ai e le Tama Faalelagi Lana fuafuaga mo i tatou, o Lana fanau. Sa tatou alalaga fiafia ina ua filifilia e le Tama Faalelagi ia Iesu Keriso e faataunuu le ata o le faaolataga (tagai i le Iopu 38:7 ma le Aperaamo 3:27). Sa fanau mai ia Maria i Peteleema, sa soifua Iesu e aunoa ma se agasala. Ona o Lana Togiola, ua mafai ai ona tatou toe foi atu e nonofo faatasi ma lo tatou Tama Faalelagi ma maua le ola e faavavau. O le a toe afio mai Iesu Keriso i le mana ma le mamalu e afio i luga o le fogaeleele i le taimi o le Meleniuma, ma o le a tu o Ia o le Faamasino o tagata uma i le aso mulimuli.
O loo i lalo ni ata mai vitio o le Tusi Paia o loo faaalia ai le vaiaso mulimuli o le soifuaga o le Faaola. Fuafua e faitau ia mau o loo lisi atu i ata taitasi. Mo se faasologa atoa o mea na tutupu, tagai i le ogatasi o Tusi/Talalelei e fa i le Lomifefiloi o le Tusi Paia po o le Taiala i Tusitusiga Paia. O loo maua vitio o le Tusi Paia i le biblevideos.lds.org.
I le aso lona lima a o lumanai le Paseka, sa tietie atu ai Iesu i Ierusalema i se asini e pei ona sa valoiaina. Sa iloa e tagata o Ia o lo latou Tupu, ma alalaga ai “Osana,” ma tuu o latou ofu ma laupama i luga o le palapala i luma atu o le asini. (Tagai i le Mataio 21:1–11; Mareko 11:1–11; Sakaria 9:9.)
Ata © IRI
Mo le taimi lona lua a o i ai i Lana galuega i le tino, sa faamama ai e Iesu lotoa o le malumalu. “E ta’ua lo’u fale,o le fale tatalo; a ua faia e outou ma ana o e faomea,” o Lana fetalaiga lea i e faatau oa (Mataio 21:13). Ona o mai ai lea o le toatele o e tauaso ma e pipili ia te Ia i le malumalu, ma sa Ia faamaloloina i latou. Ae ina ua vaai faitaulaga sili ma le au tusiupu i Ana vavega, sa latou feita ma taumafai e saili e fasioti o Ia. (Tagai i le Mataio 21:12–17; Mareko 11:15–19.)
Ata © IRI
O Iesu Keriso, le Alo e Toatasi na Fanaua e le Tama, sa lotomaualalo e afio mai i le lalolagi e togiola tagata uma mai le Pau. (Tagai i le 1 Nifae 11:16–22, 26–33; Alema 7:10–13.)
Ata © IRI
I le aluga o le vaiaso atoa, sa fofogaina ai e le Faaola ia nisi o Ana fetalaiga e sili ona manatua pea, e aofia ai Lana aoaoga e uiga i le tupe iti a le fafine ua oti lana tane. (Tagai i le Mareko 12:41–44; Luka 21:1–4.)
Ata © IRI
I le Faatoaga o Ketesemane, sa tootuli ai le Faaola ma tatalo, o Lona tiga ona o agasala a le lalolagi sa mafua ai ona Ia “le gatete ona o le tiga, ma tafe toto ai i pu afu uma, ma mafatia ai i le tino atoa ma le agaga” (MF&F 19:18). E le’i leva ae pueina Iesu e Iuta le Sekara ma se motu o tagata faaauupegaina, ma sa lafoaia e le au soo uma le Alii ae sosola. (Tagai i le Mataio 26:36–56; Mareko 14:32–50; Luka 22:39–53.)
Ata © IRI
I Lana talisuaga mulimuli, sa folafola atu ai e Iesu i Ana aposetolo o le a latou maua le Fesoasoani, po o le Agaga Paia, pe a aluese o Ia. Sa Ia aoaoina i latou ia manatua o Ia e ala i le aai ma feinu i le faamanatuga. Ina ua maea lea afiafi, sa ofoina atu ai e Iesu le Tatalo Faatoga, lea sa Ia tatalo ai ina ia mafai ona tasi le au soo. (Tagai i le Mataio 26:17–30; Mareko 14:12–26; Luka 22:14–32; Ioane 13–17.)
Ata © IRI
Ina ua uma se faamasinoga le faamaoni ma faasalaga faalealofa, sa faatagaina e Iesu Keriso o Ia lava ina ia faasatauroina, ma faamaeaina ai le “taulaga sili ma faaiu” e mafai ai ona maua e fanau uma a le Atua le faaolataga (tagai i le Alema 34:14–15). A o le’i po, sa aveese mai e e na mulimuli ia Iesu ia Lona tino mai le satauro, ‘aui o Ia i ie ma mea faamanogi, ma tuu o Ia i totonu o se tuugamau. (Tagai i le Mataio 27; Luka 23; Mareko 15; Ioane 19.)
Ata © IRI
Na tafa mai ata o le taeao o le Aso Sa, ma sa taunuu atu Maria le Makatala ma isi tamaitai faamaoni i le tuugamau e toe uu le tino o Iesu. Latou te o atu ua fuli ese le maa o le tuugamau ma ni agelu se toalua sa tau maia le tala fiafia: “E le o iinei o ia: aua ua toe tu mai o ia” (Mataio 28:6). Ua manumalo le Faaola toetu i le oti faaletino ma ua mafai ai e i tatou taitoatasi ona toe ola: “Aua faapei ona oti uma ia Atamu, e faapea foi ona faaolaina uma ia Keriso” (1 Korinito 15:22). (Tagai i le Mataio 28; Mareko 16; Luka 24; Ioane 20).
Ata © IRI