Taro kei na Kena isau
“Na cava na kena ibalebale me da doka na matabete ni Kalou?”
Na matabete sai koya na kaukauwa erau qarava kina na Nodrau cakacaka na Tamada Vakalomalagi kei Jisu Karisito. Sai koya na kaukauwa cecere duadua e vuravura. Na matabete, e dau qaravi kina na cakacaka vakalotu, soli kina na veivakalougatataki, rawati kina na cakacaka ni valetabu, vunautaki kina na kosipeli, ka vakayacori kina na cakacaka mana.
O ira na matabete era dau matataka na iVakabula, era sa doka tiko na matabete ena nodra cakava na veika ena cakava na iVakabula kevaka e tiko eke. Era na doka na matabete ena nodra bula kilikili kaya. Era na doka na matabete ena nodra isulusulu, nodra ivalavala, vosa, veiqaravi, kei na vakanananu sara mada ga.
E rawa talega me ra dau doka na matabete na Goneyalewa ena nodra dinata tiko na nodra veiyalayalati ni papitaiso kei na nodra dau vakaitavi ena vakarokoroko ena cakacaka vakalotu ni matabete me vaka na sakaramede se na cakacaka ni valetabu. E rawa ni ra tokoni ira na tamadra, ganedra, kei ira tale eso na matabete ena nodra muria na ivakaro ka bula kilikili me ra qarava na nodra itavi ni matabete.
E rawa vei keda kece me da doka na noda matabete ena noda veiqaravi ena yalodina ena noda veikacivi, ena noda vakarokorokotaka na cakacaka e qaravi mai kina, kei na noda vakarokorokotaka na cakacaka vakalotu kei na veiyalayalati e vukei keda kina me da ciqoma.
iValavala Me Vaka e Dua na Mata ni Kalou
Kevaka e rawa ni da tekivu ena noda kila na vakasakiti ni nona isolisoli oqo vei keda na Kalou, ena qai rawa ni rawarawa na noda doka na matabete: Vakavinavinakataka ka rokova na kaukauwa e nuitaki vei iko. Tarogi iko, Kevaka era kila na tamata kece era tu volekati au ni tu vei au na kaukauwa ni Kalou, era na raici Koya cake beka se raici Koya sobu? Oqori na ibalebale ni doka na matabete—sai koya na nomu kila ni o matataka tiko na Kalou ka solia na nomu vinaka duadua me vakaraitaki ena nomu ivalavala na nomu vakarokorokotaka na Nona veivakabauti vei iko.
Mason R., yabaki 19, Colorado, Amerika
Dau iValavala Savasava
Me vaka niu dua na goneyalewa au rawa ni kaya niu sega ni gadreva meu rokova na matabete. Ia na goneyalewa kece sara e gadreva vakakina. Keimami doka na matabete ena neimami ivalavala savasava. Keimami doka na matabete ena neimami dau vukei ira na cauravou me dau savasava na nodra vakasama. Keimami dau vakaisulu rakorako ka savasava na neimami ivosavosa. Ena neimami kitaka oqo, keimami sa vukei ira tiko kina na cauravou me ra doka na matabete, keimami sa doka tale tikoga kina na matabete.
Marisa B., yabaki 14, Arizona, Amerika
Vakayacora Nomu iTavi Vua na Kalou
Na sala vinaka duadua me da rokova kina na matabete sai koya, ena noqu nanuma, me da cakava na veika ena cakava na Turaga vakataki Koya kevaka a tiko oqo e vuravura, baleta o keda eda matataki Jisu Karisito. E kena ibalebale me da dinata na veika eda sa yalataki keda kina, itavi, kei na noda yalayala vua na Kalou ena noda tabaki ki na matabete. Ni da doka na Nona matabete, eda na muria na Nona ivakaro me “cila yani na nomudou rarama me ivakaraitaki vei ira na veimatanitu” (V&V 115:5). Eda vukei ira na tani me kilai ni ra lewevuqa na nona italai vakadonui na Kalou era tu e vuravura.
Bismarck B., yabaki 18, Santo Domingo, Dominican Republic
Vakarokorokotaka na Matabete
Au nanuma ni kena dokai na matabete sai koya na kena vakarokorokotaki kei na yalodei ena kena vakayagataki na matabete. Ni ra tu na Matabete i Eroni era dau vakarokorokotaka na matabete kei na sakaramede me vaka era tu ena neitou tabanalevu, ena levu na veika cecere ena vakilai ena kena veisoliyaki ka vakarautaki na sakaramede. Eda dau daramaka taucoko na sote vulavula kei na neketai. Eda kila ni cecere na kena mana ena tabanalevu, ka sa tarai au talega na kena mana. Au kila ni ka vinaka duadua sa yaco oti vei au sai koya na noqu taura tu na matabete.
Hansen B., yabaki 15, Texas, Amerika
Kakua ni Vakawalena na Nomu iVakatagedegede
Na dokai ni matabete e kena ibalebale na nomu sega ni biuti iko ena dua na vanua o kila ni rawa ni o vakawalena kina na nomu ivakatagedegede. Ni keimami vulica na Veiyalayalati Makawa ena semineri, keimami raica ena Nai Vakatekivu 39 na ivakaraitaki nei Josefa mai Ijipita ena nona doka nona matabete ka dro tani kina mai na sasaga nei wati Potifa.
E dua na sala me ra vukei keda kina na goneyalewa me da doka na matabete me ra muria na ivakatagedegede ena Me iSakisaki ni iTabagone ka dau vakaisulu rakorako.
Joseph B., yabaki 16, Texas, Amerika
Tutaka na Matabete
Na dokai ni matabete e kena ibalebale vei au me ra vakarokorokotaka ka tutaka na cauravou na isolisoli sa solia vei ira na Turaga. Niu raica ni vakarokorokotaka na matabete e dua na cauravou, sa dau vakacegu na yaloqu kau rokova vakalevu cake na cauravou oqori. Sa nuitaka vua na Tamada Vakalomalagi na matabete, kau nanuma kina ni sa nona itavi e dua na cauravou sega walega me taura na matabete ia me tutaka talega.
Melinda B., yabaki 16, Washington, Amerika
Nanuma na iVakabula
Na matabete duadua ga sai koya na kaukauwa ni Kalou e vuravura ka na vakaraitaka vei keda na sala me da lesu yani kina Vua. Ni da vakasamataka na dokai ni matabete, eda vakasamataka me da muria na ivakavuvuli nei Peresitedi Thomas S. Monson kei ira na vo ni iApositolo. Na sala vinaka duadua me da doka kina na matabete sai koya me da cakava na veika eda sa vakavulici kina, ka na rawa kina vei keda me da nanuma na iVakabula. Ni da dau nanumi Koya, ena tiko vata kei keda na Yalona. Ni tiko vata kei keda na Yalotabu ena rawa kina ni da muadonu tiko ka da ivakaraitaki ni kosipeli.
Kalasi ni wilivola ni Sigatabu: Kylie E., Jaiten B., Joseph E., Alexandra R., Kaylie V., Alisha F., and Haylee W. (sega ni tabaki); Idaho, Amerika