Tauyavutaki na iSevu ni iTeki mai Idia
E laurai e matanalevu na nodra taleitaka ka vakavinavinakataka vakalevu e sivia na 1,500 na lewenilotu kei na itokani ena nodra kumuni vata yani ena Novotel Convention Center e Hyderabad, mai Idia, ena kena laki tauyavutaki na iTeki o Hyderabad Idia, na isevu ni iteki ena matanitu o ya, ena ika 27 ni Me, 2012. A dabe vakatulewa kina o Elder Dallin H. Oaks ena Kuoramu ni iApositolo Le Tinikarua ka a tomani koya kina o Elder Donald L. Hallstrom ena Mataveiliutaki ni Vitusagavulu vata kei Elder Anthony D. Perkins ena Vitusagavulu, na Peresitedi ni iWasewase o Esia. Era a tomani ira talega ena koniferedi oqo na dui marama watidra na iliuliu oqo.
A tokoni kina o John Gutty me peresitedi ni iteki kei Suresh Natarajan me imatai ni daunivakasala kei Rajaratnam Bushi me ikarua ni daunivakasala. Sa mai isevu ni peteriaki kei Idia o Prasad Rao Gudey, na peresitedi vakacegu ni tikina.
Ena nona vosa kivei ira na ivavakoso levu duadua ni Yalododonu e Idia, a kaya kina o Randy D. Funk, na peresitedi ni Kaulotu e Idia Bangalore ni “Oqo sa dua dina na ivakaraitaki lagilagi ni itukutuku ni veigauna edaidai, e dua na siga ka da na daunanuma tu ga. Eda na daunanuma tikoga ni a tiko eke e dua na iApositolo ni Turaga.”
A vakaraitaka o Elder Perkins na nodratou iloloma na Mataveiliutaki ni iWasewase na Esia vei ira na lewenilotu e Idia ka kaya kina, “Eda sa raica oqo na kena sa tekivutaki e dua na cakacaka totoka ena vanua oqo. Na kena tubu na Lotu kei na tauyavutaki na iteki sa mai vakayacori tiko ena ivakarau ni vakavuvuli ni kosipeli tawamudu vakakina na ivakarau ni matabete sa tauyavutaki oti tu.”
Ena nona vakamacalataka ni o koya na ikarua ni ivakadinadina bula ena nodra kacivi na mataveiliutaki vou ni iteki, a vakamacalataka kina o Elder Hallstrom na sala ni ivakatakila mera dau digitaki kina na veiliutaki ena dua na iteki vou. A kaya o koya, me vaka ni lewe ni Vitusagavulu, sa nona ilesilesi oqo me tadu mai kina sega ena veitotaki se vakatulewa cala. E lako mai kina oqo ena sala ni Turaga, ka vakararavi ga ki na Nona Yalotabu me ciqoma na ivakatakila. A kaya kina o Elder Hallstrom, “Sa lewa ni Turaga o ya me sa peresitedi ni iteki o Peresitedi Gutty”.
O Kristen Oaks, ka tomani turaga watina tiko mai, a vosa me baleta na nodra tuberi na gone me rawa ni ra vakabauta “na nodra ivakavuvuli na tinadra” (raica na Alama 56:48).
Ni vakayatuyatutaka vakaitinitini ni vosa ena soqoni, a tukuna kina o Elder Oaks na nona vakavinavinaka ki na matanitu o Idia, e dua na vanua e soli kina na galala ni sokalou era vakadonui kina na lewe ni Lotu “mera soqoni vata ka vosataka na ivakavuvuli ni noda vakabauta.”
A vakadinadinataka kina o Elder Oaks ni sa mai ivakadinadina bula ni Yalotabu o ya ni Turaga sa mai vakarautaka ka digitaki ira na iliuliu era sa mai kacivi. A vosa vakakina o Elder Oaks me baleta na ilesilesi vou ni dua na iteki.
Ena Veiyalayalati Makawa a vakatautauvatataki Isireli na parofita o Aisea ki na dua na valelaca sa vakarurugi ira na luvei Isireli. Nikua na Lotu sa ikoya na valelaca. Eda sa kila tiko ni valelaca e dodonu me tokoni ena iteki. Ia oqo ni sa mai dua na iteki kei Saioni o Hyderabad, sa namaki tiko mo ni kalawa mai ki liu ka vakarautaka na veitokoni e cecere ena ikatini kei na kaulotu.”
Ena kena sa mai tauyavutaki e dua na iteki, sa rawa kina vei ira na lewenilotu e Hyderabad mera ciqoma na nodra veivakalougatataki vakapeteriaki. A vakamacalataka o Elder Oaks na veika era umani tu ena veivakalougatataki vakapeteriaki, ka tukuna tiko ni veivakalougatataki era sa “ivolanikalou ni tamata yadudua.”
“Ena vakaraitaki mai ena nomu veivakalougatataki vakapeteriaki na nomu kawa dina ni mataqali cava e Isireli ka na ciqomi mai kina na veivakalougatataki cecere,” a kaya o Elder Oaks. “Na veivakalougatataki vakapeteriaki e vakaraitaki talega mai kina na veivakalougatataki kei na yalayala eda rawa ni taura kevaka eda sa yalodina tiko.”
“Ena kena sa tubu tiko na Lotu e Idia, ena yaco na gauna me na vakauqeti kina vakayalo na parofita me tara e dua na valetabu e Idia,” a tomana. “Na kena tauyavutaki na veiiteki yadua sa vakavurea na sasaga ni na tara rawa e dua na valetabu. Ni gauna era vakaraitaka kina na nodra bula kilikili ka gugumatua na lewenilotu, sa na tarava sara mai na valetabu.”
A tinia o Elder Oaks ena nona vakatikora na veivakalougatataki oqo: “Ena isevu ni iteki oqo ena matanitu levu o Idia, au sa vakalougatataki kemuni mo ni nanuma tiko na ivakavuvuli ni auwa oqo. Au sa vakalougatataki kemuni mo ni nanuma tiko na veiyalayalati ko ni a vakayacora ena gauna ni nomuni papitaiso. Au sa vakalougatataki kemuni ena vakasama donu kei na gugumatua mo ni maroroya tiko na ivakaro ni Kalou mo ni marautaka kina na Nona veivakalougatataki.”
Na mataveiliutaki ni iteki vou sa tauyavutaki e Hyderabad Idia (imawi ki na imatau): Suresh Natarajan, imatai ni daunivakasala; John Gutty, peresitedi; Rajaratnam Bushi, ikarua ni daunivakasala.
E volekata ni 600 na isausauvou mai Idia, Nepali, kei Sri Lanka era a soqoni vata yani ki na dua na koniferedi ni bera na kena mai tauyavutaki na isevu ni iteki e Idia.
Vakavinavinaka
Ena ilakolako ni veisiko oqo e Hyderabad, e Idia, e a sotavi ira e drau na lewenilotu mai Idia, Nepali, kei Sri Lanka o Elder Oaks kei na so tale na iliuliu ni Lotu.
Vakavinavinaka
iTaba mai vei James Dalrymple