Noqu a Qaqaco Tikoga ena Kosipeli

Mai vei Tua Rogers

Au a papitaiso niu a se yabaki 12, ka vuqa na yabaki au lewe ni Lotu duadua tu ga ena noqu matavuvale. Oqo e sega ni ka rawarawa, ia e ka ni marau au a kalougata ni ra tiko na iliuliu vinaka era a vukei au ena noqu ilakolako ni vulica na vunau ni kosipeli ka vakayagataka na vunau oqori meu qaqaco ka vakatorocaketaki kina na noqu bula. Ena vuku ga ni noqu sa lewa meu dina tiko ga ki na veika au sa vakabauta, au sa raica kina na veivakalougatataki cecere sa yaco mai ki na noqu bula, ka vakakina e muri, ki na nodratou bula na noqu lewe ni matavuvale.

Oqo eso na ka a vukei au meu qaqaco tikoga kina:

Volekata tikoga na Tamada Vakalomalagi ena itaviqaravi me vakataka na masu kei na vulica na ivolanikalou. Sa kila vakavinaka tu o Koya na veika eda sotava tiko. Niu volekati Koya tiko e vukea meu nanuma tiko o cei oi au.
Vakamuria na nodra ivakasala na iliuliu ni Lotu. Au sa raica ena noqu bula vakai au na dina ni nodra ivakasala na parofita kei na iapositolo.
Noqu kila tiko ni kena bulataki na kosipeli ena tauyavutaka e dua na bula vinaka cake ena gauna oqo kei na veigauna tawamudu. E vukei au na veika oqo meu tudei tikoga ena noqu ivakatagedegede kei na vakabauta. Era vakayaloqaqataki au na iliuliu meu curuma na valetabu, ni a vukei au meu raica na bula tawamudu.
Veimaliwai vakavoleka kei ira na itokani vinaka e tautauvata na nomuni ivakatagedegede. Au a vakalougatataki ena itokani vinaka era vakarawarawataka meu vakatulewa vinaka ka maroroya tiko na noqu vakabauta.
Vakavolekati iko ki na nomu matavuvale. Au lomana na noqu matavuvale kau gadreva meu taracake e dua na neitou veimaliwai kaukauwa.
Bulataka na bula. Vakamuria na ivakatagedegede ka vakaitavi ena parokaramu ni Lotu. Era na vukei iko mo bula tiko ena vakabauta ka vakayacora na digidigi vinaka. Na digidigi vinaka e dau vakarawarawataka na bula, ka ra dau vakavuna me marautaki vakalevu cake na bula.