Tukuna Mada Vei Keimami na Nomu Lotu
Shauna Moore, Virginia, Amerika
Ena ilakolako ni veisiko vei taciqu, au a dabe toka ena yatu emuri ni waqavuka na vanua era dau dabe kina o ira na dauveiqaravi ni waqavuka. Na yatu rua ni dabedabe e kea e rau dabe veidonui.
Au a vakatakilai au vei ira era dabe vakavoliti au tiko kau tukuna sara niu na laki vuli tiko ena Brigham Young Univesiti. A kaya sara mai e dua na tagane e dabe basai au toka ni dua na itokani vinaka i luvena se qai biubiu walega oq o me laki kaulotu tudei. E kila ga vakalailai o luvena yalewa na veika e baleta na Lotu, ia e sega ni kila o koya e dua na ka baleta na Lotu. A kaya cake sara mai o dauveiqaravi ni waqavuka ni sega ni vinakata me lewena “na lotu baleta ni saqati ira na yalewa. A kaya mai na turaga o ya ni rogoca e dua na ka vaka oya—ni o ira na marama Yalododonu Edaidai era raici ni ra lolovira mai vei ira na tagane, ni sega ni rawa mera taura na matabete se veiliutaki ena soqoni ni lotu, ka ra levu cake na tagane ena loma ni Lotu.
Oti, sa qai vuki mai vei au, ka taroga, “Na cava beka na nomu nanuma baleta na ka o ya?” E ratou a raici au taucoko mai na lewe vitu oqo ka wawa toka.
Sa tekivu tavatukituki na utoqu. Niu se gone au a dau wiligusutaka na Yavu ni Vakabauta me baleta na veigauna vakaoqo, niu sa tubu cake tiko ka dua na itabagone qase cake au sa dau tekivu vakadinadinataka tiko na nona raivotu o Josefa Simici kei na iVola i Momani. Ia au sega sara ga ni kila meu na sauma vakacava na taro nei koya na turaga o ya. Au a masuta lo na Tamada Vakalomalagi me dusimaki au.
Au sa qai cavuta na imatai ni vosa e lako mai na noqu vakasama: “O sega tiko beka ni kila na iSoqosoqo ni Veivukei.” Na rairai ni matadra e tukuna mai ni ra sega ni kila.
“Na matabete e cakacaka vata kei ira na marama, era lewena taucoko na iSoqosoqo ni Veivukei,” au a vakamacalataka yani. “E tiko na peresitedi ni iSoqosoqo ni Veivukei e dusimaka na nodra itaviqaravi na marama ena Lotu e vuravura raraba. Na nodra ilesilesi na marama o ya me ra kauta mai na yalovinaka kei na loloma ena nodra bula na lewenilotu vakabibi ki na nodra bula na nodra matavuvale.”
E ra sa tekivu vakarorogo vagumatua sara mai o ira era dabe voliti au toka.
“Eda sa bula donuya tiko e dua na gauna veilecayaki ena nodra gadreva tu eso na yalewa mera cakacaka ka vakanananu eso na marama me vakataki ira na tagane. Ia eda vakabauta ni Kalou e vidavida na itavi. Eda sa namaka tiko vei ira na yalewa mera dauveiliutaki ena kedra maliwa na yalewa ka iliuliu veitokoni talega ena nodra dui itikotiko. Era vakararavi sara o ira na tagane me baleta na ivakasala ena vanua vakaoqo. Oqo e dua na ituvatuva dodonu vakatautauvata. E yaco kina me gugumatua na neimami mataisoqosoqo ni Lotu kei na neimami itikotiko. Ka keimami vakabauta dina sara ni tagane sa sega ni tu tani mai vua na yalewa, se o yalewa sa sega ni tu tani mai vua na tagane (raica na 1 Koronica 11:11). Keimami vakabauta ni keimami sa sega ni taucoko ke sega o koya ka dua. Keimami sega ni vakabauta ni keimami a buli me keimami mai veiqati ia me keimami mai veitataki cake vakai keimami.”
Au vakila niu sa vakalougatataki niu sa vosa oti. Au kila ni vosa au cavuta sa mai vua na Yalotabu. Sa vaka mera vakacegu o ira yadua ena noqu vakamacala. Sa qai vosa tale mai na turaga o ya, “Tukuna mai na veika tale so ni nomu lotu.”
Ia, ena loma ni rua na auwa e tarava, au a marautaka vakalevu na noqu tukuna na veika ni Vakalesuimai, sauma eso na taro, ka cavuta na ivakadinadina baleta na kosipeli au lomana.