Vakaisulu ki na dua na Danisi
Qai muri na kena vakavinavinaka
Au a temaki meu muria na ilala oya, oti au qai kila ni dodonu meu ivakaraitaki.
Niu yabaki tinivakacaca, ena so na gauna e dau dredre na bulataka na kosipeli. Na vanua au vakaitikotiko kina e sega ni levu kina na lewe ni Lotu, ena so na gauna era dau vakadredretaka vei au na noqu icaba ka ra sega ni lewe ni Lotu meu tiko ga ena sala dodonu.
“Daramaka qo; ena vakavotuya mai na roka ni matamu,” a kaya vei au e dua na noqu itokani ni bera e dua na danisi. A vakaraitaka tu mai e dua na ivinivo e sa vakadonuya meu kerea, ia e tabaleka. Au mani nanuma meu dara na ivinivo oya kei na dua na jakete.
Niu yaco yani ki na danisi e sega tale ni dua e daramaka tiko e dua na ivinivo vakaligana, kau nanuma niu duatani kina. Ni sa tekivu meu katakata mai, era tukuna vei au na noqu itokani meu luvata ga na jakete me vaka ka niu na rairai vinaka cake kina.
Sa vakarau sara ga meu vakadonuya me sa luva na jakete, au qai nanuma na noqu veivakalougatataki vakapeteriaki. E tukuna vei au na noqu veivakalougatataki ni na levu na noqu veitemaki ia kevaka au na lutu, era na muri au e lewe vuqa. Oqori na gauna au kila kina ni dodonu meu muri donu tikoga—sega ni baleti au walega ia me baleti ira talega era dau raici au cake. Au sa mani lewa meu dara tikoga na jakete.
Ena so na gauna au dau dredrevaki niu sega ni dau cakava na veika era cakava tiko na tamata kecega, ia au a tudei tikoga kau vakalougatataki kina. Au qai kila e muri ni vuqa na tamata era dau raici au cake. Eso na noqu itokani era dau tukuna vei au ni ra rokovi au ena noqu dau muria tiko na noqu ivakatagedegede. Era dau kerea na veivosoti ena nodra dau dredrevaki au ena noqu sega ni dau cakava na veika era dau cakava na tamata kecega mai koronivuli.
Baleta niu a dau muria na ivakatagedegede ni Lotu ka tovolea meu ivakaraitaki, a rawa kina niu vakila na itovo ni bula vakadaukaulotu kau vakavulica na kosipeli vei ira na tani. Ena sega beka ni rawa niu veivakauqeti vei ira tale eso kevaka au a sega ni tikoga ena sala dodonu.