Nanumi na Bula Yaga
Dan Jones (1810–62)
Era sa kacivi oti e sivia ni dua na milioni na daukaulotu me tekivu mai na gauna e tauyavutaki kina na Lotu, ia o Dan Jones e a levu cake sara mai na dua ga vei ira na milioni oqori. Ena vukuna na daukaulotu ni Welesi oqori, e kaya kina o Peresitedi Gordon B. Hinckley (1910–2008), “Ena iwiliwili ni saumaki mai, sa dodonu me na okati o Dan Jones vata kei iratou na le ono na daukaulotu gugumatua duadua ena itukutuku ni Lotu.”1
Ni se bera ni daukaulotu, a biuvanua o Dan mai Welesi ki Amerika ka mai cakacaka vakakavetani ena dua na sitima ena Uciwai na Mississippi ka yacana na Maid of Iowa, ka a kauti ira mai e vuqa na Yalododonu Edaidai ki Nauvoo e Illinois. A curu ki na Lotu ena 1843 ka yaco me itokani voleka sara ni Parofita o Josefa Simici.
Na kaulotu nei Dan sa vakayacori kina na iotioti ni parofisai ka volai nei Josefa Simici. Ena bogi ni bera ni vakamatei na Parofita o Josefa Simici, a nanuma me moce ga ena buturara, ni a rogoca na cabolo ni dakai ena tautuba ni nona katubaleka ena Valeniveivesu mai Carthage. A koto voleka vua o Dan Jones. A tarogi Dan na Parofita se rerevaka me mate. A sauma ka vaka, “O nanuma beka ni sa yaco mai oqo na kena gauna? Ni da vakaitavi tu ena dua na inaki vakaoqo au sega ni vakabauta me ka vakarerevaki sara na mate.” A qai parofisaitaka o Josefa, “O na raici Welesi tale, ka vakacavara na itavi e lesi vei iko ni se bera ni o mate.”2
A vakayacori na nona yalayala na Parofita ena 1845, ni rau kacivi o Dan kei na watina o Jane, me rau lai veiqaravi e Welesi. A vakayagataka o Dan na nona taledi ni vosa me vakatavuvulitaka kina na kosipeli ena yalodina. E madila sara o koya ena vosa vaka-Welesi kei na vosa vaka-Valagi, ka ra tukuna na kena ivakadinadina ni dau veirawai sara na nona vosa ka rawa ni vesuka tu na nodra vakarorogo na tamata ena dua ga vei rau na vosa oqori me vica na auwa.
Ni tiko voli mai Welesi, e dau tabaka o Dan na niusipepa eso, tikidua, kei na ivola vaka-Welesi. Ena veiliutaki nei Dan Jones, era tauyavutaka kina na daukaulotu mai Welesi e 29 na tabana ka papitaisotaka e voleka ni 1,000 na tamata e veiyabaki. A kacivi ki na ikarua ni nona kaulotu ki Welesi ena 1852, ka dina ni levu tu na veivakacacani ki na Lotu, era a papitaiso e rauta ni 2,000 na tamata ena loma ni va na yabaki.
Ni lesu tale ki Utah, a veivuke o Dan ena nodra kau mai e vuqa na curuvou mai Welesi ki Utah. Ni mate ena yabaki 51, a sa veivuke taumada ena nodra kau mai e rauta ni 5,000 na tamata ki na ra kei Amerika.
Mai na imawi: Kena ivakatakarakara na daukaulotu ni Welesi o Dan Jones. Na melisitima, me vaka a kavetanitaka o Dan Jones, ni vakarau kabi yani e Nauvoo, e Illinois. Vukei ira na biuvanua mai Welesi o Dan Jones.