Doka na Noda Veiyalayalati

Wilika ka masulaka na itukutuku oqo, ke gadrevi, mo veivosakitaka kei ira na marama o sikova. Vakayagataka na taro me vukei iko mo vaqaqacotaki ira kina na nomu itokani marama ka cakava na iSoqosoqo ni Veivukei me dua na tiki ni veivakabulabulataki ena nomu bula vakai iko.

iVakatakilakila

iVakatakilakila ni iSoqosoqo ni Veivukei

Vakabauta, Matavuvale, Veivukei

Na dauveisiko sa ivakaraitaki ni bula vakatisaipeli ka ivakatakilakila ni noda dinata na noda veiyalayalati ena noda dauveiqaravi ka veivakaukauwataki. Na veiyalayalati sa dua na yalayala tabu ka me na bulataki mai vua na Kalou kei ira na luvena. “Ni da sa vakila ni da sa luve ni veiyalayalati, eda sa kila se o cei o keda kei na ka e vinakata vei keda na Kalou,” kaya o Elder Russell M. Nelson ena Kuoramu ni iApositolo Le Tinikarua. “Sa volai tu e yaloda na Nona lawa. O Koya e noda Kalou ka da sa Nona tamata.”¹

Ni da sa dauveisiko eda rawa ni vaqaqacotaki ira eda sikova tiko mera nanuma tiko na nodra veiyalayalati. Ni da cakava o ya, eda sa vukea tiko na nodra vakavakarau kina kalougata ni bula tawamudu. “O ira kece na marama ena Lotu oqo era sa ia oti na veiyalayalati kei na Turaga era sa yalayala ni ra na veivakabulai, mera liutaki ira na yalewa e vuravura, mera vaqaqacotaka na veivuvale e Saioni, ka tara cake na matanitu ni Kalou,”² kaya o Elder M. Russell Ballard ena Kuoramu ni Le Tinikarua.

Ni da sa cakava ka maroroya na veiyalayalati, eda sa iyaya ni cakacaka ena liga ni Kalou. Eda sa na rawa ni semata vata na noda vakabauta ka vaqaqacotaka na nodra vakabauta na Tamada Vakalomalagi kei Jisu Karisito, o ira e so tale.

Mai na iVolanikalou

1 Nifai 14:14; Mosaia 5:5–7; 18:8–13; Vunau kei na Veiyalayalati 42:78; 84:106

Mai na Keda iTukutuku Makawa

Na valetabu, “sa ikoya na vanua ni vakacacabo ni yalododonu kece sara,” e a vakaraitaka vua na Parofita o Josefa Simici ena 1833. Sa ikoya na “nodra vale ni vakavinavinaka na lewe ni lotu, mera tuberi kina ko ira sa kacivi kina cakacaka ni kaulotu, kei ira sa kacivi kina ilesilesi tale e so; io, mera tuberi kina mera kila vinaka sara na nodra itavi, io na nodra ilesilesi kei na kena cakacaka, kei na vakavuvuli kece sa baleta na matanitu ni Kalou e vuravura” (V&V 97:13–14).

Era veivuke na yalewa ena iSoqosoqo ni Veivukei mai Nauvoo, Illinois, ena itekitekivu ni yabaki 1840 ena kena vakarautaki na cakacakatabu vakalotu ni valetabu. Ena cakacakatabu vakalotu ni matabete levu ka ra a ciqoma na Yalododonu mai na Valetabu mai Nauvoo, “na kaukauwa va-Kalou [sa] vakatakilai kina” (V&V 84:20). “Ena nodra sa maroroya na Yalododonu na nodra veiyalayalati, sa vaqaqacotaki ira ka tokoni ira na kaukauwa oqo ena veigauna ni dredre ena veisiga kei na veiyabaki e tarava.”³

Ena gauna oqo, ena loma ni Lotu, era sa veiqaravi na turaga kei na marama ena yalodina ena veivaletabu ena veiyasai vuravura, ka sa tomani tiko ga na nodra kune kaukauwa mai na veiqaravi ka rawa duaduaga ena cakacakatabu vakalotu ni valetabu.

Nauvoo Illinois Valetabu, mai vei Scott Goodwin